പാരിസ്: മികച്ച പഠനസൗകര്യങ്ങള്‍ ഉറപ്പാക്കണമെന്നും അധ്യാപകരുടെയും മറ്റ് ജീവനക്കാരുടെയും വര്‍ഷങ്ങളായുള്ള കുറവ് പരിഹരിക്കണമെന്നും ആവശ്യപ്പെട്ട് ഫ്രാന്‍സില്‍ ആരംഭിച്ച വിദ്യാര്‍ത്ഥി പ്രക്ഷോഭം കൂടുതല്‍ ശക്തമാകുന്നു. കഴിഞ്ഞ മാസം പാരിസിലെ ഒരു ഹൈസ്‌കൂളില്‍ ആരംഭിച്ച പ്രതിഷേധം പിന്നീട് രാജ്യവ്യാപക പ്രക്ഷോഭമായി മാറുകയായിരുന്നു. ചൊവ്വാഴ്ച മാത്രം രാജ്യത്തിന്റെ വിവിധ ഭാഗങ്ങളിലായി 2.5 ലക്ഷത്തിലേറെ പേര്‍ തെരുവിലിറങ്ങിയതായി ആഭ്യന്തര മന്ത്രാലയം അറിയിച്ചു. പാരിസില്‍ മാത്രം 56,000 പേര്‍ പ്രതിഷേധത്തില്‍ പങ്കെടുത്തു
പ്രതിഷേധം ശക്തമായതോടെ രാജ്യത്തെ നിരവധി സ്‌കൂളുകളുടെ പ്രവര്‍ത്തനം തടസപ്പെട്ടു. വിവിധയിടങ്ങളില്‍ സംഘര്‍ഷങ്ങളും അറസ്റ്റുകളും റിപ്പോര്‍ട്ട് ചെയ്തു. പ്രധാനമായും കൗമാരക്കാരായ വിദ്യാര്‍ത്ഥികള്‍ക്കെതിരെ പോലീസ് കണ്ണീര്‍വാതകവും മറ്റ് കലാപനിയന്ത്രണ സംവിധാനങ്ങളും പ്രയോഗിച്ചതും പ്രതിഷേധത്തിന് കൂടുതല്‍ ജനപിന്തുണ ലഭിക്കാന്‍ ഇടയാക്കി. വിദ്യാര്‍ത്ഥികള്‍ നേരിടുന്ന പ്രശ്‌നങ്ങള്‍ പരിഹരിക്കാത്തതിനെതിരെ മാതാപിതാക്കളും അധ്യാപകരും രംഗത്തെത്തിയിട്ടുണ്ട്.
അധ്യാപകരുടെയും ജീവനക്കാരുടെയും കടുത്ത ക്ഷാമമാണ് വിദ്യാര്‍ത്ഥികള്‍ പ്രധാനമായും ചൂണ്ടിക്കാട്ടുന്ന പ്രശ്‌നം. ഒരു സര്‍വേ പ്രകാരം രാജ്യത്തെ പകുതിയിലേറെ സ്‌കൂളുകളിലും ആവശ്യത്തിന് ജീവനക്കാരില്ല. അധ്യാപകരുടെ ഒഴിവുകള്‍ സമയബന്ധിതമായി നികത്താത്തതിനാല്‍ വിദ്യാര്‍ത്ഥികള്‍ക്ക് പഠനം നഷ്ടപ്പെടുന്ന സാഹചര്യമുണ്ടെന്നാണ് ആരോപണം.
സ്‌കൂള്‍ കെട്ടിടങ്ങളുടെ ശോചനീയാവസ്ഥയും പ്രതിഷേധത്തിന് പ്രധാന കാരണമാണ്. പ്രതിഷേധം ഫ്രഞ്ച് പ്രസിഡന്റ് ഇമ്മാനുവല്‍ മാക്രോണിന്റെ സര്‍ക്കാരിന് പുതിയ രാഷ്ട്രീയ വെല്ലുവിളിയായിരിക്കുകയാണ്. പ്രധാനമന്ത്രി സെബാസ്റ്റ്യന്‍ ലെകോര്‍ണു ബുധനാഴ്ച രാജ്യത്തെ അഭിസംബോധന ചെയ്ത് മാസാവസാനത്തോടെ പുതിയ നടപടികള്‍ പ്രഖ്യാപിക്കുമെന്ന് ഉറപ്പുനല്‍കി. വിദ്യാര്‍ത്ഥികള്‍ക്ക് തങ്ങളുടെ പരാതികളും ആവശ്യങ്ങളും നേരിട്ട് അറിയിക്കാനായി സര്‍ക്കാര്‍ ആരംഭിച്ച ഓണ്‍ലൈന്‍ പ്ലാറ്റ്‌ഫോമില്‍ ഇതിനകം ഏകദേശം 40,000 പ്രതികരണങ്ങള്‍ ലഭിച്ചതായും അധികൃതര്‍ അറിയിച്ചു. വിദ്യാര്‍ത്ഥികളുടെ ആവശ്യങ്ങള്‍ പരിഹരിക്കാന്‍ സര്‍ക്കാര്‍ സ്വീകരിക്കുന്ന നടപടികളിലേക്കാണ് ഇനി രാജ്യത്തിന്റെ ശ്രദ്ധ.
Student protests intensify in France: 250,000 students take to the streets.
