കൊച്ചി: ചേരാനല്ലൂര്‍ വാഹനാപകടക്കേസില്‍ പ്രതിയായ 17 കാരന്റെ പിതാവായ അഡീഷണല്‍ ജഡ്ജി മുന്‍കൂര്‍ ജാമ്യം തേടി കോടതിയെ സമീപിച്ചു. ജഡ്ജിയെ വീണ്ടും ചോദ്യം ചെയ്യാന്‍ ക്രൈബ്രാഞ്ച് നോട്ടീസ് നല്‍കിയിരുന്നു.ഇന്നു രാവിലെ 11 ന് ചോദ്യം ചെയ്യലിനായി വീണ്ടും ഹാജരാകാന്‍ ജഡ്ജിയോട് ക്രൈംബ്രാഞ്ച് സംഘം ആവശ്യപ്പെട്ടിട്ടുണ്ട്. ഇന്നലെ കൊച്ചിയിലെ പൊലീസ് ക്ലബ്ബില്‍ ജഡ്ജിയെ വിളിച്ചുവരുത്തിയുള്ള ചോദ്യം ചെയ്യല്‍ മൂന്ന് മണിക്കൂറോളം നീണ്ടു.
17 കാരന്റെ ജാമ്യം റദ്ദാക്കണമെന്ന പൊലീസ് അപ്പീലില്‍ മറുപടി സമര്‍പ്പിക്കാന്‍ പ്രതിഭാഗത്തിനു കോടതി നിര്‍ദേശം നല്‍കി. കേസ് വെള്ളിയാഴ്ച വീണ്ടും പരിഗണിക്കും. 17-കാരന്‍ ഓടിച്ച ബെന്‍സ് കാറിടിച്ച് സ്‌കൂട്ടര്‍ യാത്രക്കാരന്‍ മരിച്ച സംഭവത്തില്‍ കാറുടമയായ ജഡ്ജിക്കെതിരേ കഴിഞ്ഞദിവസമാണ് കേസെടുത്തത്. പ്രായപൂര്‍ത്തിയാകാത്തയാള്‍ വാഹനമോടിച്ച് അപകടമുണ്ടാക്കിയതിനാലാണ് വാഹന ഉടമയായ പിതാവും പ്രതിയായത്.
കേസില്‍ രണ്ടാം പ്രതിയാണ് വാഹന ഉടമയായ ജഡ്ജി. അപകടത്തില്‍ മരിച്ച ജയബാലകൃഷ്ണന്റെ കുടുംബം ഹൈക്കോടതി റജിസ്ട്രാറുമായി ഇന്നലെ കൂടിക്കാഴ്ച നടത്തി പരാതികള്‍ കോടതിയെ അറിയിച്ചു. പൊലീസ് റിപ്പോര്‍ട്ട് ലഭിച്ച ശേഷമേ തുടര്‍ നടപടികള്‍ ഉണ്ടാകൂവെന്നാണ് ഹൈക്കോടതി അഡ്മിനിസ്ട്രേറ്റീവ് കമ്മിറ്റിയുടെ തീരുമാനമെന്ന് റജിസ്ട്രാര്‍ കുടുംബത്തെ അറിയിച്ചിട്ടുണ്ട്.
മോട്ടര്‍ ആക്സിഡന്റ് ക്ലെയിംസ് ട്രൈബ്യൂണല്‍ അഡീ. ജില്ലാ ജഡ്ജിയായ ഇദ്ദേഹത്തിനെതിരെ പ്രായപൂര്‍ത്തിയാകാത്തയാള്‍ക്കു വാഹനം നല്‍കിയതിന് മോട്ടര്‍ വാഹന നിയമത്തിലെ 199 എ(2) വകുപ്പ് പ്രകാരം കേസെടുത്തിട്ടുണ്ട്. മൂന്നു വര്‍ഷം വരെ തടവും 25,000 രൂപ പിഴയും ലഭിക്കാവുന്ന കുറ്റമാണിത്. 2026 ഒക്ടോബര്‍ 25-ന് പുലര്‍ച്ചെ എറണാകുളം ചേരാനല്ലൂര്‍ കണ്ടെയ്നര്‍ റോഡില്‍ വെച്ചാണ് അഡീഷണല്‍ ജഡ്ജിയുടെ മകനായ പ്രായപൂര്‍ത്തിയാകാത്ത (17 വയസ്സുള്ള) കുട്ടി ഓടിച്ച ബെന്‍സ് കാര്‍ ഇടിച്ച് തട്ടുകട ഉടമ ജയബാലകൃഷ്ണന്‍ (55) മരിച്ചത്.
Teranallur vehicle accident case: Additional Judge seeks anticipatory bail
