ടെന്നസി: സര്‍ക്കാര്‍ പ്രഖ്യാപിച്ച വധശിക്ഷ പരാജയപ്പെട്ട ശേഷം ആദ്യമായി പ്രതികരണവുമായി ക്രിസ്റ്റ പൈക്ക്. കഴിഞ്ഞ മാസം അമേരിക്കയിലെ ടെന്നസിയില്‍ വിഷമരുന്ന് കുത്തിവെച്ച് വധശിക്ഷ നടപ്പാക്കാനുള്ള ശ്രമം പരാജയപ്പെട്ടതിനെത്തുടര്‍ന്ന് ഗുരുതരമായി പരിക്കേറ്റ പൈക്ക്, അധികൃതരുടെ കഴിവുകേടാണ് തന്നെ ഇത്രയധികം ദുരിതത്തിലാക്കിയതെന്ന് പ്രതികരിച്ചു. വെള്ളിയാഴ്ച അഭിഭാഷകര്‍ പുറത്തുവിട്ട പ്രസ്താവനയിലാണ് 50കാരിയായ പൈക്ക് തന്റെ അനുഭവങ്ങള്‍ വിവരിച്ചത്. ശരീരത്തിലും കൈകളിലും തൊണ്ടയിലും ഇപ്പോഴും വേദനയുണ്ടെന്നും സംസാരിക്കാന്‍ പോലും ബുദ്ധിമുട്ട് നേരിടുന്നുണ്ടെന്നും അവര്‍ പറഞ്ഞു. ശാരീരിക വേദനയ്‌ക്കൊപ്പം മനസിലും ആത്മാവിലും ആഴത്തിലുള്ള മുറിവുകളുണ്ടെന്നും പ്രസ്താവനയില്‍ വ്യക്തമാക്കി.
വധശിക്ഷ നടപ്പാക്കാന്‍ നിശ്ചയിച്ച ദിവസം മരണം സ്വീകരിക്കാന്‍ മാനസികമായി തയ്യാറായിരുന്നുവെന്ന് പൈക്ക് പറഞ്ഞു. റിവര്‍ബെന്‍ഡ് ജയിലിലെ വധശിക്ഷാ മുറിയിലേക്ക് കടക്കുമ്പോള്‍ തന്റെ ജീവിതത്തിന് വിരാമമാകുമെന്നായിരുന്നു പ്രതീക്ഷ. വര്‍ഷങ്ങളായി ഒപ്പം നിന്നവരോടും പിന്തുണച്ചവരോടും നന്ദി പറഞ്ഞിരുന്നുവെന്നും വധശിക്ഷ കാണാനെത്തിയവരോടും സ്‌നേഹത്തോടെയാണ് യാത്ര പറഞ്ഞതെന്നും അവര്‍ വ്യക്തമാക്കി. എന്നാല്‍ വധശിക്ഷാ നടപടിക്കുശേഷം ജീവനോടെ തിരിച്ചെത്തിയപ്പോള്‍ ദിവസങ്ങള്‍ക്കുശേഷം ബോധം വീണ്ടെടുത്തത് ആശയക്കുഴപ്പത്തോടെയും കടുത്ത വേദനയോടെയുമായിരുന്നു. ആ രാത്രിക്കപ്പുറം ഒരു ജീവിതത്തെക്കുറിച്ച് താന്‍ ചിന്തിച്ചിരുന്നില്ലെന്നും ഇത്രയധികം ആളുകളെ ദുരിതത്തിലാക്കിയ അധികൃതരുടെ കഴിവുകേടില്‍ അതീവ ദുഃഖമുണ്ടെന്നും പൈക്ക് പറഞ്ഞു.
നിലവില്‍ നാഷ്വില്ലെയിലെ ഡെബ്ര കെ. ജോണ്‍സണ്‍ റീഹാബിലിറ്റേഷന്‍ സെന്ററിലെ ജയില്‍ മെഡിക്കല്‍ വിഭാഗത്തിലാണ് പൈക്ക് കഴിയുന്നത്. എന്നാല്‍ മറ്റ് വനിതാ തടവുകാരില്‍നിന്ന് പൂര്‍ണമായും ഒറ്റപ്പെടുത്തിയിരിക്കുകയാണെന്ന് അവര്‍ ആരോപിക്കുന്നു. 28 വര്‍ഷത്തോളം ഏകാന്ത തടവില്‍ കഴിഞ്ഞ അനുഭവത്തിന് സമാനമാണ് ഇപ്പോഴത്തെ അവസ്ഥയെന്നും ഈ ഒറ്റപ്പെടല്‍ മറ്റൊരു തരത്തിലുള്ള വേദന സൃഷ്ടിക്കുന്നുണ്ടെന്നും പൈക്ക് പറഞ്ഞു. 2024ല്‍ സംസ്ഥാന സര്‍ക്കാരുമായി ഉണ്ടാക്കിയ ഒത്തുതീര്‍പ്പ് കരാര്‍ ലംഘിക്കപ്പെട്ടുവെന്നാണ് അഭിഭാഷകരുടെ ആരോപണം. മറ്റ് വനിതാ തടവുകാരുമായി സാമൂഹിക ബന്ധം പുലര്‍ത്താന്‍ അനുവദിക്കണമെന്ന വ്യവസ്ഥയാണ് കരാറിലുണ്ടായിരുന്നത്. ഈ വ്യവസ്ഥ നടപ്പാക്കണമെന്നാവശ്യപ്പെട്ട് വെള്ളിയാഴ്ച ഫെഡറല്‍ കോടതിയില്‍ അടിയന്തര ഹര്‍ജിയും സമര്‍പ്പിച്ചു. ഓരോ ദിവസവും തുടരുന്ന ഒറ്റപ്പെടുത്തല്‍ പൈക്കിന് കൂടുതല്‍ മാനസികവും ശാരീരികവുമായ ദോഷമുണ്ടാക്കുന്നുവെന്ന് അഭിഭാഷകര്‍ വ്യക്തമാക്കി.
1995ല്‍ 19കാരിയായ കോളിന്‍ സ്ലെമ്മറെ കൊലപ്പെടുത്തിയ കേസിലാണ് പൈക്കിന് വധശിക്ഷ വിധിച്ചത്. വധശിക്ഷയ്ക്കായി സെപ്റ്റംബര്‍ 30ന് നടത്തിയ നടപടിക്കിടെ രണ്ട് തവണ മാരകമായ പെന്റോബാര്‍ബിറ്റല്‍ മരുന്ന് നല്‍കിയെന്നാണ് ദൃക്‌സാക്ഷികള്‍ പറയുന്നത്. എന്നാല്‍ ഒരു മണിക്കൂറിനുശേഷവും പൈക്ക് ശ്വസിക്കുന്നതായി കണ്ടതിനെത്തുടര്‍ന്ന് നടപടിയുടെ വിജയത്തില്‍ സംശയമുയര്‍ന്നു. ഗുരുതരമായി പരിക്കേറ്റ അവരെ പിന്നീട് ആശുപത്രിയിലെത്തിക്കുകയും വെന്റിലേറ്ററിന്റെ സഹായത്തോടെ ചികിത്സ നല്‍കുകയും ചെയ്തു. ബോധം വീണ്ടെടുത്തപ്പോള്‍ ‘ഞാന്‍ എവിടെയാണ്?’ എന്ന് അവര്‍ ചോദിച്ചതായി അഭിഭാഷകന്‍ വെളിപ്പെടുത്തി. മരുന്നിന്റെ ഫലമായി കൈകളില്‍ പൊള്ളലേറ്റിട്ടുണ്ടെന്നും അവ സാവധാനത്തിലാണ് ഭേദമാകുന്നതെന്നും അഭിഭാഷകന്‍ സ്റ്റീഫന്‍ ഫെറല്‍ പറഞ്ഞു. മാനസികമായും ശാരീരികമായും പൈക്ക് വലിയ പ്രതിസന്ധിയിലൂടെയാണ് കടന്നുപോകുന്നതെന്നും അദ്ദേഹം കൂട്ടിച്ചേര്‍ത്തു.
വധശിക്ഷാ നടപടിയിലെ വീഴ്ചയ്ക്കുപിന്നാലെ ടെന്നസി ഗവര്‍ണര്‍ ബില്‍ ലീ സംസ്ഥാനത്ത് നിശ്ചയിച്ചിരുന്ന വധശിക്ഷകള്‍ താല്‍ക്കാലികമായി നിര്‍ത്തിവെക്കാന്‍ ഉത്തരവിട്ടിരുന്നു. സംസ്ഥാന തിരുത്തല്‍ വകുപ്പ് കമ്മീഷണര്‍ ഫ്രാങ്ക് സ്ട്രാഡയും രാജിവെച്ചു. അതേസമയം, കോടതികള്‍ മറ്റൊരു തീരുമാനം കൈക്കൊള്ളാത്ത പക്ഷം പൈക്കിന്റെ ശിക്ഷയില്‍ മാറ്റമുണ്ടാകില്ലെന്നാണ് ഗവര്‍ണറുടെ നിലപാട്. വധശിക്ഷ ജീവപര്യന്തം തടവായി ഇളവുചെയ്യണമെന്ന് പൈക്കിന്റെ അഭിഭാഷകസംഘം ഗവര്‍ണറോട് ആവശ്യപ്പെട്ടിട്ടുണ്ട്. അതേസമയം, കൊല്ലപ്പെട്ട കോളിന്‍ സ്ലെമ്മറുടെ മാതാവ് മേയ് മാര്‍ട്ടിനെസ്, നീതി ലഭിക്കുമെന്ന പ്രതീക്ഷയിലാണ് വധശിക്ഷ കാണാന്‍ ഭര്‍ത്താവിനൊപ്പം നാഷ്വില്ലെയിലെത്തിയതെന്നും എന്നാല്‍ സംസ്ഥാനം തന്റെ കുടുംബത്തെ നിരാശപ്പെടുത്തിയെന്നും പ്രതികരിച്ചു. വധശിക്ഷയ്ക്കായി വിഷമരുന്ന് നല്‍കിയിട്ടും അതിജീവിച്ച ആദ്യ വ്യക്തിയാണ് ക്രിസ്റ്റ പൈക്കെന്നാണ് ഡെത്ത് പെനാല്‍റ്റി ഇന്‍ഫര്‍മേഷന്‍ സെന്ററിന്റെ റിപ്പോര്‍ട്ട്. തന്റെ അതിജീവനത്തിന് പിന്നിലെ കാരണം അറിയില്ലെന്നും ഓരോ ദിവസവും പ്രതീക്ഷ കൈവിടാതെ സുഖം പ്രാപിക്കാന്‍ ശ്രമിക്കുകയാണെന്നും പൈക്ക് പ്രസ്താവനയില്‍ പറഞ്ഞു.
The incompetence of the authorities wounded me deeply: Christa Pike’s first reaction following the failed execution.
