മിയാമി: തുടർച്ചയായ കനത്ത മഴയെ തുടർന്ന് തെക്കൻ ഫ്ലോറിഡയിൽ വെള്ളപ്പൊക്ക ഭീഷണി ശക്തമാകുന്നു. മിയാമി-ഡെയ്ഡ് കൗണ്ടിയിൽ നാഷണൽ വെതർ സർവീസ് വ്യാഴാഴ്ച രാവിലെ പുതിയ പ്രളയ മുന്നറിയിപ്പ് പുറപ്പെടുവിച്ചു. പ്രാദേശിക സമയം രാവിലെ 9.10 മുതൽ 11.15 വരെയാണ് മുന്നറിയിപ്പിന്റെ കാലാവധി. ഇതിന് പിന്നാലെ സമീപത്തെ ബ്രോവാർഡ് കൗണ്ടിയിലും ഉച്ചയ്ക്ക് 12.45 വരെ പ്രളയ മുന്നറിയിപ്പ് നിലവിലുണ്ടായിരുന്നു.
ചൊവ്വാഴ്ച മുതൽ തെക്കൻ ഫ്ലോറിഡയുടെ വിവിധ മേഖലകളിൽ 15 ഇഞ്ചിലധികം മഴയാണ് ലഭിച്ചത്. കനത്ത മഴയിൽ പ്രധാന റോഡുകളിലടക്കം വെള്ളം കയറിയതോടെ നിരവധി വാഹനങ്ങൾ യാത്രയ്ക്കിടെ കുടുങ്ങി. വെള്ളപ്പൊക്ക ഭീഷണിയെ തുടർന്ന് പ്രദേശത്തെ നിരവധി സ്കൂളുകൾക്കും പ്രവർത്തനം നിർത്തിവെക്കേണ്ടിവന്നു.
കൂടുതൽ മഴയ്ക്ക് സാധ്യത; ജാഗ്രത തുടരണമെന്ന് മുന്നറിയിപ്പ്
മഴ തുടരാനുള്ള സാധ്യത കണക്കിലെടുത്ത് താഴ്ന്ന പ്രദേശങ്ങളിൽ വെള്ളക്കെട്ട് കൂടുതൽ രൂക്ഷമായേക്കുമെന്ന് അധികൃതർ മുന്നറിയിപ്പ് നൽകി. ഇതിന്റെ ഭാഗമായി വ്യാഴാഴ്ച വൈകുന്നേരം വരെ തെക്കൻ ഫ്ലോറിഡയിലെ വിവിധ പ്രദേശങ്ങളിൽ ഫ്ലഡ് വാച്ച് ജാഗ്രതാ നിർദേശം തുടരുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.














