ഹേഗ്: മ്യാൻമറിലെ ന്യൂനപക്ഷമായ റോഹിംഗ്യൻ മുസ്ലിംകൾക്കെതിരെ ഭരണകൂടം വംശഹത്യ നടത്തിയതായി ഐക്യരാഷ്ട്രസഭയുടെ പരമോന്നത നീതിപീഠമായ അന്താരാഷ്ട്ര നീതിന്യായ കോടതി (ഐസിജെ) വിധിച്ചു. 80 വർഷത്തെ ചരിത്രത്തിൽ വംശഹത്യയുടെ പേരിൽ ഒരു രാജ്യത്തെ ഐസിജെ കുറ്റക്കാരനായി കണ്ടെത്തുന്നത് ഇതാദ്യമാണ്. 15 ജഡ്ജിമാരടങ്ങുന്ന ബെഞ്ചിൽ ആറിനെതിരെ ഒമ്പത് വോട്ടുകൾക്കാണ് നിർണ്ണായക വിധി. 2017-ലെ സൈനിക നടപടിയിൽ പതിനായിരത്തോളം റോഹിംഗ്യൻ പൗരന്മാർ കൊല്ലപ്പെടുകയും ഏഴ് ലക്ഷത്തിലധികം പേർ പലായനം ചെയ്യുകയും ചെയ്തതായി കോടതി വിലയിരുത്തി. റോഹിംഗ്യൻ ജനതയെ ഉന്മൂലനം ചെയ്യുക എന്ന ഉദ്ദേശ്യത്തോടെയാണ് മ്യാൻമർ സൈന്യം പ്രവർത്തിച്ചതെന്നും സ്ത്രീകൾക്കും കുട്ടികൾക്കും നേരെ വ്യാപകമായ അതിക്രമങ്ങൾ നടന്നതായും കോടതി വ്യക്തമാക്കി.
റോഹിംഗ്യൻ ഗ്രാമങ്ങൾ ആസൂത്രിതമായി ബുൾഡോസർ ഉപയോഗിച്ച് ഇടിച്ചുനിരത്തിയും മൃതദേഹങ്ങൾ കത്തിച്ചും മ്യാൻമർ തെളിവുകൾ നശിപ്പിച്ചതായി കോടതി നിരീക്ഷിച്ചു. റോഹിംഗ്യകൾ ബംഗ്ലാദേശിൽ നിന്നുള്ള കുടിയേറ്റക്കാരാണെന്ന മ്യാൻമറിന്റെ വാദം തള്ളിയ കോടതി, സ്വന്തമായി ഭാഷയും സംസ്കാരവുമുള്ള സംരക്ഷിക്കപ്പെടേണ്ട വിഭാഗമാണ് അവരെന്ന് വ്യക്തമാക്കി. പലായനം ചെയ്തവർക്ക് സുരക്ഷിതവും മാന്യവുമായ തിരിച്ചുവരവ് അനുവദിക്കണമെന്നും കുറ്റക്കാരെ അന്വേഷിച്ച് ശിക്ഷിക്കണമെന്നും കോടതി ഉത്തരവിട്ടു. ഇരകൾക്ക് നൽകേണ്ട നഷ്ടപരിഹാരത്തിന്റെ അളവും രീതികളും പിന്നീട് കോടതി തീരുമാനിക്കും.
അതേസമയം, വിധി നടപ്പിലാക്കാൻ അന്താരാഷ്ട്ര നീതിന്യായ കോടതിക്ക് നേരിട്ടുള്ള അധികാരമില്ലാത്തതിനാൽ മ്യാൻമർ ഭരണകൂടം ഉത്തരവുകൾ പാലിക്കുമോ എന്നത് കണ്ടറിയണം. 2017-ൽ അതിക്രമങ്ങൾ നടക്കുമ്പോൾ ഓങ് സാൻ സൂചിയായിരുന്നു മ്യാൻമർ ഭരണത്തലവനെങ്കിലും സൈന്യത്തെ നയിച്ചിരുന്ന മിൻ ഓങ് ഹ്ലെയിംഗാണ് നിലവിലെ പ്രസിഡന്റ്. 2021-ൽ ഓങ് സാൻ സൂചിയെ അട്ടിമറിച്ചാണ് അദ്ദേഹം അധികാരത്തിലേറിയത്.














