അനില്‍ മറ്റത്തിക്കുന്നേല്‍
വാഷിങ്ടണ്‍ ഡി.സി.: അമേരിക്കയില്‍ നവംബര്‍ മൂന്നിന് നടക്കുന്ന ഇടക്കാല തിരഞ്ഞെടുപ്പില്‍ ഇന്ത്യന്‍ വംശജരായ നിരവധി സ്ഥാനാര്‍ഥികള്‍ വിവിധ സംസ്ഥാനങ്ങളിലെ നിര്‍ണായക പദവികളിലേക്ക് ജനവിധി തേടുന്നു. യുഎസ് കോണ്‍ഗ്രസ്, സംസ്ഥാന ഗവര്‍ണര്‍, അറ്റോര്‍ണി ജനറല്‍, മേയര്‍, സംസ്ഥാന നിയമസഭകള്‍ തുടങ്ങിയ സ്ഥാനങ്ങളിലേക്കാണ് ഇന്ത്യന്‍ വംശജരുടെ മത്സരം.
നിലവിലെ ഡെമോക്രാറ്റിക് കോണ്‍ഗ്രസ് അംഗങ്ങളായ റോ ഖന്ന, പ്രമീള ജയപാല്‍, അമി ബേര, സുഹാസ് സുബ്രഹ്മണ്യം എന്നിവര്‍ വീണ്ടും ജനവിധി തേടുന്നു. കാലിഫോര്‍ണിയയില്‍നിന്ന് റോ ഖന്നയും അമി ബേരയും, വാഷിങ്ടണ്‍ സംസ്ഥാനത്തുനിന്ന് പ്രമീള ജയപാലും, വെര്‍ജീനിയയില്‍നിന്ന് സുഹാസ് സുബ്രഹ്മണ്യവും മത്സരിക്കുന്നു.
ഇന്ത്യന്‍ വംശജരില്‍ ദേശീയതലത്തില്‍ ശ്രദ്ധിക്കപ്പെടുന്ന മറ്റൊരു സ്ഥാനാര്‍ഥിയാണ് റിപ്പബ്ലിക്കന്‍ പാര്‍ട്ടിയുടെ വിവേക് രാമസ്വാമി. ഒഹായോ ഗവര്‍ണര്‍ സ്ഥാനത്തേക്ക് മത്സരിക്കുന്ന രാമസ്വാമിക്ക് പ്രസിഡന്റ് ഡൊണാള്‍ഡ് ട്രംപിന്റെ പിന്തുണയുണ്ട്. ഡെമോക്രാറ്റിക് സ്ഥാനാര്‍ഥി ഏമി ആക്ടണാണ് എതിരാളി.
ന്യൂയോര്‍ക്ക് സംസ്ഥാനത്തെ അറ്റോര്‍ണി ജനറല്‍ സ്ഥാനത്തേക്ക് റിപ്പബ്ലിക്കന്‍ സ്ഥാനാര്‍ഥിയായി ഇന്ത്യന്‍ വംശജയായ സരിത കൊമതിരെഡ്ഡി മത്സരിക്കുന്നു. നിലവിലെ ഡെമോക്രാറ്റിക് അറ്റോര്‍ണി ജനറല്‍ ലെറ്റീഷ്യ ജെയിംസിനെയാണ് അവര്‍ നേരിടുന്നത്.
കാലിഫോര്‍ണിയയിലെ ലോസ് ഏഞ്ചലസ് മേയര്‍ തിരഞ്ഞെടുപ്പില്‍ ഇന്ത്യന്‍ വംശജയായ നിത്യ രാമനും മത്സരരംഗത്തുണ്ട്. നിലവിലെ സിറ്റി കൗണ്‍സില്‍ അംഗമായ നിത്യ രാമന്‍, മേയര്‍ കാരന്‍ ബാസിനെതിരെയാണ് ജനവിധി തേടുന്നത്.
ടെക്‌സസില്‍ ഡെമോക്രാറ്റിക് സ്ഥാനാര്‍ഥികളായ പൂജ സേത്തിയും സന്ദീപ് ശ്രീവാസ്തവയും സംസ്ഥാന നിയമസഭാ സീറ്റുകളിലേക്ക് മത്സരിക്കുന്നു. ഫ്‌ലോറിഡയിലെ 22-ാം കോണ്‍ഗ്രസ് മണ്ഡലത്തില്‍ പിയ ദണ്ഡിയയും അരിസോണയിലെ ഒന്നാം കോണ്‍ഗ്രസ് മണ്ഡലത്തില്‍ ഡോക്ടറും മുന്‍ സംസ്ഥാന നിയമസഭാംഗവുമായ അമീഷ് ഷായും ഡെമോക്രാറ്റിക് സ്ഥാനാര്‍ഥികളായി മത്സരരംഗത്തുണ്ട്.
രാഷ്ട്രീയം, നിയമം, ബിസിനസ്, വിദ്യാഭ്യാസം, ആരോഗ്യരംഗം, പൊതുസേവനം തുടങ്ങി വ്യത്യസ്ത മേഖലകളില്‍ പ്രവര്‍ത്തനപരിചയമുള്ളവരാണ് ഈ സ്ഥാനാര്‍ഥികള്‍. അമേരിക്കന്‍ രാഷ്ട്രീയത്തില്‍ ഇന്ത്യന്‍ വംശജരുടെ വര്‍ധിച്ചുവരുന്ന സാന്നിധ്യവും വിവിധ രാഷ്ട്രീയ പാര്‍ട്ടികളിലുള്ള പങ്കാളിത്തവും ഇത്തവണത്തെ തിരഞ്ഞെടുപ്പിലും ശ്രദ്ധേയമാണ്.
അമേരിക്കന്‍ ജനപ്രതിനിധിസഭയിലെ 435 സീറ്റുകളിലേക്കും സെനറ്റിലെ 35 സീറ്റുകളിലേക്കുമാണ് നവംബര്‍ മൂന്നിന് തിരഞ്ഞെടുപ്പ് നടക്കുന്നത്. ഒഹായോയിലും ഫ്‌ലോറിഡയിലും നടക്കുന്ന പ്രത്യേക സെനറ്റ് തിരഞ്ഞെടുപ്പുകളും ഇതില്‍ ഉള്‍പ്പെടുന്നു. കൂടാതെ 36 സംസ്ഥാനങ്ങളില്‍ ഗവര്‍ണര്‍ തിരഞ്ഞെടുപ്പുകളും നടക്കും.
പ്രസിഡന്റ് ഡൊണാള്‍ഡ് ട്രംപിന്റെ രണ്ടാം ഭരണകാലത്തിന്റെ പകുതിയില്‍ നടക്കുന്ന ഈ തിരഞ്ഞെടുപ്പ് യുഎസ് കോണ്‍ഗ്രസിലെ അധികാരസന്തുലിതാവസ്ഥ നിര്‍ണയിക്കുന്നതില്‍ നിര്‍ണായകമാണ്. സാമ്പത്തിക സ്ഥിതി, കുടിയേറ്റനയം, ആരോഗ്യപരിരക്ഷ, ജീവിതച്ചെലവ് തുടങ്ങിയ വിഷയങ്ങളും തിരഞ്ഞെടുപ്പില്‍ പ്രധാന ചര്‍ച്ചാവിഷയങ്ങളാണ്.
നവംബര്‍ മൂന്നിലെ ജനവിധി അമേരിക്കയുടെ ദേശീയ രാഷ്ട്രീയദിശ നിര്‍ണയിക്കുന്നതിനൊപ്പം ഇന്ത്യന്‍ വംശജരുടെ രാഷ്ട്രീയ പ്രാതിനിധ്യത്തിലും പ്രധാനപ്പെട്ട മാറ്റങ്ങള്‍ക്ക് വഴിയൊരുക്കുമോ എന്നതും ശ്രദ്ധേയമാണ്.
US Midterm Elections: Many individuals of Indian origin in the fray for key positions
