തൃശൂര്‍ :സംഗീത സംവിധായകനും പ്രമുഖ മലയാളം റോക്ക് സംഗീതജ്ഞനുമായ ജോണ്‍ പി. വര്‍ക്കി (51) വീട്ടില്‍ കുഴഞ്ഞുവീണു മരിച്ചു. ജിഗ്‌സോ പസിലിന്റെ ആല്‍ബവുമായി സംഗീത രംഗത്തു ശ്രദ്ധേയനായ ജോണ്‍ ‘അവിയല്‍’ ബാന്‍ഡില്‍ അംഗമായിരുന്നു. എംടിവി ചാനലിലെത്തിയ ആദ്യ മലയാളി ബാന്‍ഡായിരുന്നു ജിഗ്‌സോ പസില്‍. പിന്നീടു സ്ലോ പെഡല്‍സ് എന്ന ബാന്‍ഡിലെ അംഗമായി.
ഫ്രോസണ്‍, കമ്മട്ടിപ്പാടം, ഈട, ഉന്നം, ഒളിപ്പോര് തുടങ്ങിയ സിനിമകളുടെ സംഗീത സംവിധായകനാണ്. കമ്മട്ടിപ്പാടത്തിലെ ‘പറ…പറ’, ‘ചിങ്ങമാസത്തിലെ’ എന്നീ പാട്ടുകള്‍ക്കാണ് ജോണ്‍ സംഗീതം നല്‍കിയത്. ഇദി സംഗതി എന്ന തെലുങ്കു സിനിമയ്ക്കും കാര്‍ത്തിക് എന്ന കന്നഡ സിനിമയ്ക്കും സംഗീതം ചെയ്തു. നെയ്ത്തുകാരന്‍ എന്ന സിനിമയുടെ പശ്ചാത്തല സംഗീതവും നിര്‍വഹിച്ചു.
മഡ്രിഡ് ഇമാജിന്‍ ഇന്ത്യ ഫിലിം ഫെസ്റ്റിവലില്‍ ഫ്രോസണ്‍ എന്ന സിനിമയിലൂടെ മികച്ച സംഗീത സംവിധായകനായി.
ഭാര്യ: ബേബി ജോണ്‍ (അധ്യാപിക, ഡോണ്‍ ബോസ്‌കോ സ്‌കൂള്‍, മണ്ണുത്തി). മക്കള്‍: ജോബ് ജോണ്‍, ജോസഫ് ജോണ്‍.
