വാഷിംഗ്ടൺ: അമേരിക്കൻ പ്രസിഡന്റ് ഡോണൾഡ് ട്രംപും റഷ്യൻ പ്രസിഡന്റ് വ്ലാഡിമിർ പുടിനും തമ്മിൽ വെള്ളിയാഴ്ച അലാസ്കയിൽ നടക്കുന്ന ഉച്ചകോടിക്കുള്ള ഒരുക്കങ്ങൾ അമേരിക്കൻ ഉദ്യോഗസ്ഥർ ഊർജിതമാക്കി. ചരിത്രപരമായ കൂടിക്കാഴ്ചയ്ക്ക് നാല് ദിവസം മാത്രം ബാക്കിനിൽക്കെ, ക്രമീകരണങ്ങളെയും ഭൗമരാഷ്ട്രീയ വിഷയങ്ങളെയും സംബന്ധിച്ച കാര്യങ്ങളിൽ ഇപ്പോഴും അനിശ്ചിതത്വം നിലനിൽക്കുകയാണ്.
വാഷിംഗ്ടണിനും മോസ്കോയ്ക്കും ഇടയിലുള്ള സൗകര്യപ്രദമായ സ്ഥലം എന്ന നിലയിലാണ് അലാസ്ക ഉച്ചകോടിക്കായി തിരഞ്ഞെടുത്തത്. എന്നാൽ, തിങ്കളാഴ്ച വരെ കൂടിക്കാഴ്ച നടക്കുന്ന വേദി ഔദ്യോഗികമായി പ്രഖ്യാപിച്ചിട്ടില്ല. ഇരു രാജ്യങ്ങളുടെയും പ്രസിഡന്റുമാർ എവിടെവെച്ച് കൂടിക്കാഴ്ച നടത്തുമെന്ന കാര്യങ്ങൾ തീരുമാനിക്കാൻ ഉദ്യോഗസ്ഥർ ഇപ്പോഴും അലാസ്കയിലേക്ക് എത്തിക്കൊണ്ടിരിക്കുകയാണ്.
ട്രംപും പുടിനും തമ്മിലുള്ള ചർച്ചയുടെ ഉള്ളടക്കം സംബന്ധിച്ച വ്യക്തത വരുത്താനും ഉദ്യോഗസ്ഥർ ശ്രമിക്കുന്നുണ്ട്. യുക്രെയ്ൻ യുദ്ധം അവസാനിപ്പിക്കുന്നതുമായി ബന്ധപ്പെട്ട് ഈ കൂടിക്കാഴ്ചയിൽ നിർണായക പുരോഗതി ഉണ്ടാകുമെന്നാണ് ട്രംപ് പ്രതീക്ഷിക്കുന്നത്.
