ശബരിമല സ്വർണക്കൊള്ളക്കേസിൽ മുൻ ദേവസ്വം കമ്മീഷണറും ബോർഡ് അഡ്മിനിസ്ട്രേറ്ററുമായിരുന്ന എൻ. വാസു ജാമ്യം തേടി സുപ്രീം കോടതിയെ സമീപിച്ചു. നേരത്തെ ഹൈക്കോടതി ജാമ്യാപേക്ഷ തള്ളിയ സാഹചര്യത്തിലാണ് അദ്ദേഹം പരമോന്നത കോടതിയെ സമീപിച്ചത്. കേസിൽ മൂന്നാം പ്രതിയായ വാസുവിനെതിരെ ഗൂഢാലോചന, വ്യാജരേഖ ചമയ്ക്കൽ, സ്വർണക്കവർച്ച എന്നീ കുറ്റങ്ങളാണ് പ്രത്യേക അന്വേഷണ സംഘം (എസ്.ഐ.ടി) ചുമത്തിയിട്ടുള്ളത്.
2019-ൽ ശബരിമല ശ്രീകോവിലിന്റെ നവീകരണവുമായി ബന്ധപ്പെട്ട് സ്വർണം പൊതിഞ്ഞ പാളികൾ പുറത്തേക്ക് കൊണ്ടുപോയതിൽ എൻ. വാസുവിന് നിർണ്ണായക പങ്കുണ്ടെന്നാണ് അന്വേഷണസംഘത്തിന്റെ കണ്ടെത്തൽ. ഔദ്യോഗിക രേഖകളിൽ ‘സ്വർണ്ണപ്പാളികൾ’ എന്നത് മാറ്റി ‘ചെമ്പ് പാളികൾ’ എന്ന് രേഖപ്പെടുത്താൻ വാസു നിർദ്ദേശിച്ചതായി എസ്.ഐ.ടി റിമാൻഡ് റിപ്പോർട്ടിൽ പറയുന്നു. മുഖ്യപ്രതിയായ ഉണ്ണികൃഷ്ണൻ പോറ്റിയുമായി ചേർന്ന് ഗൂഢാലോചന നടത്തി ദേവസ്വം ബോർഡിന് വലിയ സാമ്പത്തിക നഷ്ടമുണ്ടാക്കിയെന്നും പ്രതികൾ അന്യായ ലാഭം നേടിയെന്നും പോലീസ് കോടതിയെ അറിയിച്ചിട്ടുണ്ട്.
ശ്രീകോവിലിന്റെ കട്ടിളപ്പാളികൾ അനധികൃതമായി ഉണ്ണികൃഷ്ണൻ പോറ്റിക്ക് കൈമാറാൻ ഇടപെട്ടതും വാസുവാണെന്ന് അന്വേഷണത്തിൽ വ്യക്തമായിട്ടുണ്ട്. 2019 മാർച്ച് മാസത്തിലെ ശുപാർശയിൽ വരുത്തിയ കൃത്രിമത്വമാണ് കേസിലെ പ്രധാന തെളിവായി പോലീസ് ചൂണ്ടിക്കാട്ടുന്നത്. നിലവിൽ റിമാൻഡിലുള്ള എൻ. വാസുവിന്റെ ജാമ്യാപേക്ഷ ഹൈക്കോടതി തള്ളിയത് അന്വേഷണം നിർണ്ണായക ഘട്ടത്തിലാണെന്ന പ്രോസിക്യൂഷൻ വാദം കണക്കിലെടുത്താണ്. സുപ്രീം കോടതിയുടെ നിലപാട് ഇനി കേസിൽ നിർണ്ണായകമാകും.
