വാഷിംഗ്ടൺ: നോർത്ത് അറ്റ്ലാന്റിക് സമുദ്രത്തിൽ ‘ബെല്ല 1’ എന്ന എണ്ണക്കപ്പലിനെ പിടിച്ചെടുക്കാനുള്ള അമേരിക്കയുടെ നീക്കം റഷ്യയുമായുള്ള നേരിട്ടുള്ള നയതന്ത്ര യുദ്ധത്തിലേക്ക് വഴിമാറുന്നു. അമേരിക്കയുടെ ഉപരോധം മറികടന്ന് മയക്കുമരുന്ന് മാഫിയകൾക്കും വെനിസ്വേലയ്ക്കും വേണ്ടി പ്രവർത്തിക്കുന്ന ‘ഷാഡോ ഫ്ലീറ്റ്’ വിഭാഗത്തിൽപ്പെട്ട കപ്പലാണിതെന്ന് അമേരിക്ക ആരോപിക്കുന്നു. കഴിഞ്ഞ ദിവസം അയർലൻഡ് തീരത്തിന് സമീപമെത്തിയ ഈ കപ്പലിനെ പിടിച്ചെടുക്കാൻ അമേരിക്കൻ സ്പെഷ്യൽ ഫോഴ്സ് പദ്ധതിയിടുന്നതായാണ് ഏറ്റവും പുതിയ റിപ്പോർട്ടുകൾ.
അമേരിക്കൻ കോസ്റ്റ് ഗാർഡ് പിന്തുടരുന്നത് ശ്രദ്ധയിൽപ്പെട്ടതോടെ കപ്പലിലെ ജീവനക്കാർ കപ്പലിന്റെ പുറത്ത് റഷ്യൻ പതാകയുടെ ചിത്രം പെയിന്റ് ചെയ്യുകയും തങ്ങൾ റഷ്യൻ സംരക്ഷണയിലാണെന്ന് പ്രഖ്യാപിക്കുകയും ചെയ്തു. ‘ബെല്ല 1’ എന്ന പേര് മാറ്റി ‘മരിനേറ’ എന്നാക്കി കപ്പൽ ഇപ്പോൾ റഷ്യൻ ഔദ്യോഗിക രജിസ്റ്ററിൽ ഉൾപ്പെട്ടിട്ടുണ്ട്. തങ്ങളുടെ പതാക വഹിക്കുന്ന കപ്പലിനെ പിന്തുടരുന്നത് നിർത്തണമെന്ന് റഷ്യൻ വിദേശകാര്യ മന്ത്രാലയം അമേരിക്കയോട് ഔദ്യോഗികമായി ആവശ്യപ്പെട്ടു. ഇത് രാജ്യത്തിന്റെ പരമാധികാരത്തിന്മേലുള്ള കടന്നുകയറ്റമാണെന്ന് റഷ്യ വാദിക്കുന്നു.
എന്നാൽ കപ്പൽ ആദ്യം തടയുമ്പോൾ അതിന് ഔദ്യോഗിക പതാക ഉണ്ടായിരുന്നില്ലെന്നും അതുകൊണ്ട് തന്നെ ഇത് ഒരു ‘അരാജക കപ്പലായി’ കണക്കാക്കി പിടിച്ചെടുക്കാമെന്നുമാണ് അമേരിക്കയുടെ വാദം. വെനിസ്വേലൻ പ്രസിഡന്റ് നിക്കോളാസ് മഡുറോയെ അമേരിക്കൻ സൈന്യം പിടികൂടിയതിന് പിന്നാലെ മേഖലയിൽ സംഘർഷം നിലനിൽക്കുന്നതിനിടെയാണ് ഈ കപ്പലിനെച്ചൊല്ലിയുള്ള തർക്കം. റഷ്യൻ പതാകയുള്ള കപ്പലിനെ അമേരിക്കൻ സൈന്യം ബലംപ്രയോഗിച്ച് പിടിച്ചെടുത്താൽ അത് രണ്ട് വൻശക്തികൾ തമ്മിലുള്ള നേരിട്ടുള്ള ഏറ്റുമുട്ടലിലേക്ക് നയിച്ചേക്കാം.
