തങ്ങളുടെ ക്ഷമയ്ക്ക് പരിധിയുണ്ടെന്നും നാവിക ഉപരോധം തുടർന്നാൽ മുൻമാതൃകകളില്ലാത്ത വിധം തിരിച്ചടിക്കുമെന്നും ഇറാൻ മുന്നറിയിപ്പ് നൽകി. നയതന്ത്ര ചർച്ചകൾക്ക് അവസരം നൽകാനാണ് ഇതുവരെ നിയന്ത്രണം പാലിച്ചതെന്ന് ഇറാൻ സൈന്യത്തെ ഉദ്ധരിച്ച് പ്രസ് ടിവി റിപ്പോർട്ട് ചെയ്തു. നാവിക ഉപരോധത്തെ മറികടക്കാൻ ഇറാന്റെ കരമാർഗങ്ങൾക്കുള്ള ശേഷി പ്രയോജനപ്പെടുത്തുമെന്നും രാജ്യം വ്യക്തമാക്കി.
അതേസമയം, ഇറാനിൽ ഭരണ അട്ടിമറി നടത്താൻ അമേരിക്ക ശ്രമിച്ചതായി പാർലമെന്റ് സ്പീക്കർ മുഹമ്മദ് ബാഗർ ഗാലിബാഫ് ആരോപിച്ചു. ഇസ്ഫഹാനിൽ സൈന്യത്തെ ഇറക്കി അധികാരം പിടിച്ചെടുക്കാനായിരുന്നു അമേരിക്കൻ നീക്കമെന്നും എന്നാൽ ഇത് ദയനീയമായി പരാജയപ്പെട്ടെന്നും അദ്ദേഹം പറഞ്ഞു. രാജ്യത്തിന്റെ സുരക്ഷയുമായി ബന്ധപ്പെട്ട നിർണ്ണായക തീരുമാനങ്ങൾ പരമോന്നത നേതാവിന്റെ നിർദ്ദേശപ്രകാരം കൈക്കൊള്ളുമെന്നും ഗാലിബാഫ് കൂട്ടിച്ചേർത്തു.
പശ്ചിമേഷ്യയിൽ സംഘർഷം പുകയുന്ന സാഹചര്യത്തിൽ ഇറാന്റെ ഈ പുതിയ പ്രസ്താവനകൾ സ്ഥിതിഗതികൾ കൂടുതൽ സങ്കീർണ്ണമാക്കുന്നു. അമേരിക്കയുടെ ഉപരോധങ്ങളെ പ്രായോഗികമായി നേരിടുമെന്ന ഇറാന്റെ പ്രഖ്യാപനം ആഗോള വിപണിയെയും നാവിക ഗതാഗതത്തെയും ആശങ്കയിലാഴ്ത്തിയിട്ടുണ്ട്. വരും ദിവസങ്ങളിൽ സൈനികവും നയതന്ത്രപരവുമായ നീക്കങ്ങൾ മേഖലയിൽ ശക്തമാകാനാണ് സാധ്യത.
