പശ്ചിമേഷ്യയിലെ സംഘർഷ സാഹചര്യങ്ങളിൽ അയവ് വന്നതിന് പിന്നാലെ പ്രധാനമന്ത്രി നരേന്ദ്ര മോദിയും അമേരിക്കൻ പ്രസിഡന്റ് ഡൊണാൾഡ് ട്രംപും തമ്മിൽ നിർണ്ണായക ചർച്ച നടത്തി. 40 മിനിറ്റ് നീണ്ടുനിന്ന ഫോൺ സംഭാഷണത്തിൽ മേഖലയിലെ സമാധാന അന്തരീക്ഷം നിലനിർത്തേണ്ടതിന്റെ ആവശ്യകതയാണ് പ്രധാനമായും ചർച്ചയായത്. ഇറാനുമായുള്ള വെടിനിർത്തൽ നടപടികൾക്ക് ശേഷമുള്ള ആദ്യ ഔദ്യോഗിക ചർച്ചയാണിത്. സമാധാനം ഉറപ്പാക്കാൻ ഇന്ത്യയുടെ എല്ലാ പിന്തുണയും പ്രധാനമന്ത്രി അറിയിച്ചു.
ഇന്ത്യയുടെ ഊർജ്ജ സുരക്ഷയ്ക്ക് അത്യന്താപേക്ഷിതമായ ഹോർമുസ് കടലിടുക്കിലെ സാഹചര്യം മോദി ചർച്ചയിൽ ഉന്നയിച്ചു. ചരക്കുനീക്കം തടസ്സപ്പെടാത്ത വിധത്തിൽ ഹോർമുസ് സുരക്ഷിതമായി നിലനിർത്തേണ്ടത് അത്യാവശ്യമാണെന്ന് അദ്ദേഹം ട്രംപിനോട് പറഞ്ഞു. ചൈനയടക്കമുള്ള രാജ്യങ്ങൾ മേഖലയിൽ കണ്ണുനട്ടിരിക്കെ, ഇന്ത്യയുടെ താൽപ്പര്യങ്ങൾ സംരക്ഷിക്കപ്പെടുമെന്ന സൂചനയാണ് ചർച്ച നൽകുന്നത്. മേഖലയിലെ സംഘർഷങ്ങൾ ലഘൂകരിക്കാനുള്ള നീക്കങ്ങൾക്ക് ഇന്ത്യ എല്ലാവിധ പിന്തുണയും അറിയിച്ചിട്ടുണ്ട്.
ഇന്ത്യയും അമേരിക്കയും തമ്മിലുള്ള ആഗോള പങ്കാളിത്തം പുതിയ തലങ്ങളിലേക്ക് എത്തിക്കുമെന്ന് ഇരുനേതാക്കളും ഉറപ്പുനൽകി. ഉഭയകക്ഷി ബന്ധങ്ങളിലെ പുരോഗതിയിൽ സംതൃപ്തി രേഖപ്പെടുത്തിയ അവർ, വരും ദിവസങ്ങളിൽ കൂടുതൽ സഹകരണത്തിന് പ്രതിജ്ഞാബദ്ധമാണെന്ന് അറിയിച്ചു. പശ്ചിമേഷ്യൻ സമാധാനം ആഗോള സ്ഥിരതയ്ക്ക് പ്രധാനമാണെന്നും ഈ ലക്ഷ്യത്തിനായി ഇരുരാജ്യങ്ങളും ഒത്തൊരുമിച്ച് മുന്നോട്ട് പോകുമെന്നും പ്രധാനമന്ത്രി കൂട്ടിച്ചേർത്തു.
