ഓർത്തഡോക്സ് ഈസ്റ്ററിനോടനുബന്ധിച്ചുള്ള വെടിനിർത്തൽ ധാരണകൾ പാടെ ലംഘിച്ചുകൊണ്ട് യുക്രെയ്നിൽ റഷ്യയുടെ അതിശക്തമായ വ്യോമാക്രമണം. 700 ലധികം മിസൈലുകളും ഡ്രോണുകളും ഉപയോഗിച്ച് റഷ്യ നടത്തിയ കടന്നാക്രമണത്തിൽ 17 പേർ കൊല്ലപ്പെട്ടു. തെക്കൻ തുറമുഖ നഗരമായ ഒഡെസയിലാണ് ഏറ്റവും വലിയ നാശനഷ്ടങ്ങൾ റിപ്പോർട്ട് ചെയ്തത്; ഇവിടെ മാത്രം ഒമ്പത് പേർക്ക് ജീവൻ നഷ്ടമായി. തലസ്ഥാനമായ കീവിൽ ഒരു കുട്ടി ഉൾപ്പെടെ നാല് പേരും മധ്യ നഗരമായ ഡിനിപ്രോയിൽ നാല് പേരും റഷ്യൻ ആക്രമണത്തിൽ കൊല്ലപ്പെട്ടതോടെ മേഖല വീണ്ടും യുദ്ധഭീതിയിലായി.
റഷ്യൻ ആക്രമണത്തിന് പിന്നാലെ യുക്രെയ്നും ശക്തമായ തിരിച്ചടി നൽകി. റഷ്യയിലെ തെക്കൻ ക്രാസ്നോഡർ മേഖല ലക്ഷ്യമാക്കി യുക്രെയ്ൻ നടത്തിയ ഡ്രോൺ ആക്രമണത്തിൽ ഒരു കുട്ടി ഉൾപ്പെടെ രണ്ട് റഷ്യൻ പൗരന്മാർ കൊല്ലപ്പെട്ടതായി റഷ്യൻ സൈന്യം സ്ഥിരീകരിച്ചു. സമാധാന ചർച്ചകൾക്കും വെടിനിർത്തലിനുമുള്ള നീക്കങ്ങൾക്കിടെ ഇരുരാജ്യങ്ങളും പരസ്പരം ആക്രമണം കടുപ്പിച്ചത് അന്താരാഷ്ട്ര സമൂഹത്തെ വലിയ ആശങ്കയിലാഴ്ത്തിയിരിക്കുകയാണ്. 2022 ഫെബ്രുവരിയിൽ തുടങ്ങിയ യുദ്ധം നാലാം വർഷത്തിലേക്ക് കടക്കുമ്പോഴും സിവിലിയൻമാരുടെ മരണം തുടരുന്നത് വലിയ പ്രതിഷേധങ്ങൾക്ക് കാരണമാകുന്നുണ്ട്.
നിലവിൽ ഒഡെസയിലെയും കീവിലെയും ജനവാസ മേഖലകൾ ലക്ഷ്യമാക്കിയാണ് റഷ്യൻ മിസൈലുകൾ പതിച്ചത്. വെടിനിർത്തൽ പ്രഖ്യാപനം നിലനിൽക്കുന്നതിനാൽ ആളുകൾ ജാഗ്രത കുറഞ്ഞ സമയത്ത് നടത്തിയ ഈ ആക്രമണം വലിയ ചതിയാണെന്ന് യുക്രെയ്ൻ ഭരണകൂടം ആരോപിച്ചു. വരും ദിവസങ്ങളിൽ റഷ്യ ആക്രമണം കൂടുതൽ ശക്തമാക്കുമെന്ന സൂചനകൾ പുറത്തുവരുന്ന സാഹചര്യത്തിൽ സമാധാന ചർച്ചകൾ ഇനിയെങ്ങോട്ട് എന്ന ചോദ്യം പ്രസക്തമാവുകയാണ്. ആക്രമണത്തിൽ തകർന്ന കെട്ടിടങ്ങൾക്കിടയിൽ ഇനിയും ആളുകൾ കുടുങ്ങിക്കിടക്കാൻ സാധ്യതയുള്ളതിനാൽ മരണസംഖ്യ ഇനിയും ഉയർന്നേക്കാമെന്നാണ് ലഭിക്കുന്ന വിവരം.
