കോൺഗ്രസിലെ മുഖ്യമന്ത്രി ചർച്ചകൾക്കിടെ എഐസിസി ജനറൽ സെക്രട്ടറി കെ.സി. വേണുഗോപാലിനെ പ്രശംസിച്ച് എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ. തിരഞ്ഞെടുപ്പിൽ പിന്നണിയിൽ നിന്ന് കാര്യങ്ങളെല്ലാം ഏകോപിപ്പിച്ചത് വേണുഗോപാലാണെന്ന് അദ്ദേഹം പറഞ്ഞു. കെ.സി. വേണുഗോപാൽ മുഖ്യമന്ത്രി സ്ഥാനത്തിന് അയോഗ്യനാണെന്ന് താൻ പറയില്ലെന്നും എന്നാൽ ആരാണ് ഏറ്റവും യോഗ്യനെന്ന് ഇപ്പോൾ പറയുന്നില്ലെന്നും വെള്ളാപ്പള്ളി വ്യക്തമാക്കി.
മറ്റ് കോൺഗ്രസ് നേതാക്കളെക്കുറിച്ചും വെള്ളാപ്പള്ളി തന്റെ നിരീക്ഷണങ്ങൾ പങ്കുവെച്ചു. പ്രതിപക്ഷ നേതാവ് വി.ഡി. സതീശൻ കൂടുതൽ പ്രവർത്തിച്ചത് ടെലിവിഷനിലാണെന്ന് അദ്ദേഹം പരിഹസിച്ചു. അതേസമയം, രമേശ് ചെന്നിത്തലയെ അപ്രസക്തനാക്കാൻ സാധിക്കില്ലെന്നും കോൺഗ്രസിന്റെ അത്യുന്നത പദവികളിൽ ഇരുന്ന പാരമ്പര്യമുള്ള നേതാവാണ് അദ്ദേഹമെന്നും വെള്ളാപ്പള്ളി ഓർമ്മിപ്പിച്ചു. തിരഞ്ഞെടുപ്പിൽ ജയിച്ചു വന്നാൽ കോൺഗ്രസിലെ എല്ലാവരും മുഖ്യമന്ത്രിയാകാൻ യോഗ്യരാണെന്നും അദ്ദേഹം കൂട്ടിച്ചേർത്തു.
ശബരിമലയിലെ ഇ.ഡി അന്വേഷണത്തെക്കുറിച്ചും വെള്ളാപ്പള്ളി പ്രതികരിച്ചു. തിരഞ്ഞെടുപ്പ് കഴിയുമ്പോൾ എല്ലാം അവസാനിക്കുമെന്ന് താൻ നേരത്തെ പറഞ്ഞതാണെന്നും ഇപ്പോൾ അത് ശരിയാണെന്ന് തെളിഞ്ഞതായും അദ്ദേഹം പറഞ്ഞു. അവസാനം അന്വേഷണവും ഉണ്ടാകില്ല, സ്വർണ്ണവും ഉണ്ടാകില്ലെന്നായിരുന്നു വെള്ളാപ്പള്ളിയുടെ പരിഹാസം. രാഷ്ട്രീയ പ്രേരിതമായ നീക്കങ്ങൾ തിരഞ്ഞെടുപ്പിന് ശേഷം സ്വാഭാവികമായും കെട്ടടങ്ങുമെന്നാണ് അദ്ദേഹം സൂചിപ്പിച്ചത്.
