ലോകമാധ്യമ ചരിത്രത്തിൽ 24 മണിക്കൂർ വാർത്താ സംപ്രേഷണം എന്ന വിപ്ലവകരമായ മാറ്റത്തിന് തുടക്കമിട്ട സിഎൻഎൻ സ്ഥാപകൻ ടെഡ് ടെർണർ അന്തരിച്ചു. 87 വയസ്സായിരുന്നു. 1980-ൽ കേബിൾ ന്യൂസ് നെറ്റ്വർക്ക് (CNN) ആരംഭിച്ചതിലൂടെ വാർത്താ വിതരണത്തിന്റെ ഗതി മാറ്റിയ അദ്ദേഹം, ടെലിവിഷൻ മാധ്യമ രംഗത്തെ അനിഷേധ്യ വ്യക്തിത്വമായിരുന്നു. അസാധ്യമെന്ന് പലരും കരുതിയ തത്സമയ വാർത്താ സംപ്രേഷണം എന്ന ആശയം യാഥാർത്ഥ്യമാക്കിയതോടെയാണ് ടെർണർ ആഗോള ശ്രദ്ധ നേടിയത്.
വാർത്തകൾക്ക് പുറമെ വിനോദ, കായിക മേഖലകളിലും തന്റെ സാമ്രാജ്യം വ്യാപിപ്പിക്കാൻ ടെർണർക്ക് സാധിച്ചു. കാർട്ടൂൺ നെറ്റ്വർക്കിന്റെ രൂപീകരണവും എംജിഎം സ്റ്റുഡിയോയുടെ സിനിമാ ശേഖരം സ്വന്തമാക്കിയതും മാധ്യമ വിപണിയിലെ അദ്ദേഹത്തിന്റെ ദീർഘവീക്ഷണത്തിന് തെളിവായിരുന്നു. 1996-ൽ ടർണർ ബ്രോഡ്കാസ്റ്റിംഗ് സിസ്റ്റത്തെ ടൈം വാർണറുമായി ലയിപ്പിച്ചതോടെ ലോകത്തിലെ ഏറ്റവും വലിയ മാധ്യമ ശൃംഖലയുടെ അമരക്കാരനായി അദ്ദേഹം മാറി. ഗുഡ്വിൽ ഗെയിംസ് എന്ന കായിക മാമാങ്കത്തിന് തുടക്കമിട്ടതും അദ്ദേഹമായിരുന്നു.
ഒരു മാധ്യമ ഭീമൻ എന്നതിലുപരി മികച്ച ജീവകാരുണ്യ പ്രവർത്തകൻ കൂടിയായിരുന്നു ടെഡ് ടെർണർ. ഐക്യരാഷ്ട്രസഭയ്ക്ക് ഒരു ബില്യൺ ഡോളർ സംഭാവനയായി നൽകി അദ്ദേഹം ലോകത്തെ വിസ്മയിപ്പിച്ചു. പരിസ്ഥിതി സംരക്ഷണത്തിനും മനുഷ്യാവകാശങ്ങൾക്കുമായി നിരന്തരം നിലകൊണ്ട അദ്ദേഹം മാധ്യമ ചരിത്രത്തിലെ ഏറ്റവും സ്വാധീനശക്തിയുള്ള വ്യക്തിത്വമായി വിലയിരുത്തപ്പെടുന്നു. ടെർണറുടെ വിയോഗം ആഗോള മാധ്യമ മേഖലയ്ക്ക് വലിയ നഷ്ടമാണ്.
