ബെയ്റൂട്ട്: യുഎസും ഇറാനും തമ്മിൽ നിലനിൽക്കുന്ന യുദ്ധം അവസാനിപ്പിക്കുന്നതിനുള്ള ഏതൊരു വെടിനിർത്തൽ കരാറിലും ലെബനനെക്കൂടി ഉൾപ്പെടുത്തണമെന്ന് ഇറാൻ ആവശ്യപ്പെട്ടതായി സായുധ സംഘടനയായ ഹിസ്ബുള്ള വ്യക്തമാക്കി. തങ്ങൾക്ക് നൽകിവരുന്ന എല്ലാവിധ പിന്തുണയും ഇറാൻ തുടരുമെന്ന വ്യക്തമായ സൂചന നൽകിയതായും ഹിസ്ബുള്ള നേതൃത്വം അറിയിച്ചു. ഹിസ്ബുള്ള തലവൻ നയീം ഖാസെമിന് ഇറാന്റെ വിദേശകാര്യ മന്ത്രി അബ്ബാസ് അരാഗ്ചി അയച്ച ഔദ്യോഗിക സന്ദേശത്തിലാണ് ടെഹ്റാന്റെ ഈ നിർണായക നിലപാട് വ്യക്തമാക്കിയിരിക്കുന്നത്.
നീതിക്കും സ്വാതന്ത്ര്യത്തിനും വേണ്ടി പോരാടുന്ന പ്രസ്ഥാനങ്ങളെ, പ്രത്യേകിച്ച് ഹിസ്ബുള്ളയെ പിന്തുണയ്ക്കുന്നതിൽ നിന്ന് ഇറാൻ ഒരിക്കലും പിന്നോട്ട് പോകില്ലെന്ന് വിദേശകാര്യ മന്ത്രിയുടെ സന്ദേശത്തിൽ അടിവരയിട്ടു പറയുന്നു. നിലവിലെ യുദ്ധത്തിന് ശാശ്വതവും സുസ്ഥിരവുമായ അന്ത്യം കുറിക്കുക എന്ന ലക്ഷ്യത്തോടെ പാകിസ്താൻ മധ്യസ്ഥർ മുഖേന ഇറാൻ സമർപ്പിച്ച ഏറ്റവും പുതിയ സമാധാന നിർദ്ദേശത്തിലാണ് ഈ ആവശ്യങ്ങളുള്ളത്.
ലെബനനിലെ വിവിധ നഗരങ്ങളിലും ഗ്രാമങ്ങളിലും ഇസ്രായേൽ ആക്രമണം ശക്തമായി തുടരുന്ന പശ്ചാത്തലത്തിലാണ് വെടിനിർത്തൽ കരാറിന്റെ പരിധിയിൽ ലെബനനെക്കൂടി ഉൾപ്പെടുത്തണമെന്ന ആവശ്യം ഇറാൻ ശക്തമായി മുന്നോട്ടുവെച്ചിരിക്കുന്നത്. മേഖലയിൽ സമാധാനം പുനഃസ്ഥാപിക്കണമെങ്കിൽ ലെബനനിലെ സംഘർഷങ്ങൾക്കും അടിയന്തിരമായി പരിഹാരം കാണേണ്ടതുണ്ടെന്നാണ് ഇറാന്റെ പുതിയ നിർദ്ദേശം വ്യക്തമാക്കുന്നത്.
