ടെഹ്റാൻ: യുണൈറ്റഡ് സ്റ്റേറ്റ്സുമായി നിലനിൽക്കുന്ന യുദ്ധം അവസാനിപ്പിക്കുന്നതിനുള്ള സുപ്രധാന ധാരണാപത്രം അന്തിമമാക്കുന്നതിലാണ് തങ്ങൾ ഇപ്പോൾ ശ്രദ്ധ കേന്ദ്രീകരിക്കുന്നതെന്ന് ഇറാൻ വിദേശകാര്യ മന്ത്രാലയ വക്താവ് ഇസ്മായിൽ ബഗായ് ഔദ്യോഗികമായി വ്യക്തമാക്കി. കഴിഞ്ഞ ഒരു ആഴ്ചയായി ഇരുരാജ്യങ്ങളും തമ്മിൽ നടത്തിയ നിരന്തരമായ ചർച്ചകളുടെ ഫലമായി പല പ്രധാന വിഷയങ്ങളിലുമുള്ള അഭിപ്രായവ്യത്യാസങ്ങൾ ഗണ്യമായി കുറയ്ക്കാൻ സാധിച്ചിട്ടുണ്ടെന്നും അദ്ദേഹം വെളിപ്പെടുത്തി.
പ്രതിസന്ധി പരിഹരിക്കുന്നതിനായി നിർണായകമായ ചില നീക്കങ്ങളാണ് അണിയറയിൽ നടക്കുന്നത്. വരും ദിവസങ്ങളിൽ എന്താണ് സംഭവിക്കുക എന്നതിനെ ആശ്രയിച്ചായിരിക്കും കരാറിന്റെ ഭാവി. അടുത്ത മൂന്ന് മുതൽ നാല് ദിവസങ്ങൾക്കുള്ളിൽ രാജ്യങ്ങൾ തമ്മിലുള്ള നയതന്ത്ര ചർച്ചകളിൽ കൂടുതൽ വ്യക്തത വരുമെന്നും എന്ത് മാറ്റങ്ങളാണ് ഉണ്ടാകുകയെന്ന് കാത്തിരുന്ന് കാണണമെന്നും ഇസ്മായിൽ ബഗായ് മാധ്യമങ്ങളോട് പറഞ്ഞു. യുദ്ധം അവസാനിപ്പിക്കുന്നതിനും മേഖലയിൽ ശാശ്വത സമാധാനം കൊണ്ടുവരുന്നതിനും ഇരുപക്ഷവും തമ്മിലുള്ള അകലം കുറഞ്ഞുവരുന്നത് അതീവ പ്രാധാന്യത്തോടെയാണ് അന്താരാഷ്ട്ര സമൂഹം വീക്ഷിക്കുന്നത്.
