ടെഹ്റാൻ: അമേരിക്കയുമായുള്ള കടുത്ത ഭിന്നതകൾക്കിടയിൽ സൈനിക നീക്കം, ജനകീയ ഐക്യം, നയതന്ത്രം എന്നീ മൂന്ന് പ്രധാന തൂണുകളിൽ അധിഷ്ഠിതമായ തന്ത്രങ്ങളുമായി മുന്നോട്ട് പോകാൻ ഒരുങ്ങി ഇറാൻ. രാജ്യം വീണ്ടുമൊരു യുദ്ധക്കളത്തിലേക്ക് ഇറങ്ങാൻ പൂർണ്ണ സജ്ജമാണെന്നും, അതേസമയം തന്നെ നയതന്ത്ര ചർച്ചകൾക്കുള്ള വാതിലുകൾ അടച്ചിട്ടില്ലെന്നുമാണ് ഇറാനിയൻ ഉന്നത ഉദ്യോഗസ്ഥർ വ്യക്തമാക്കുന്നത്. അമേരിക്കയിലുള്ള പൂർണ്ണമായ അവിശ്വാസം കാരണം ഇസ്ലാമിക് റെവല്യൂഷണറി ഗാർഡും രാജ്യത്തെ ഉന്നത അധികാരികളും യുദ്ധത്തിനുള്ള ഒരുക്കങ്ങൾ അതീവ രഹസ്യമായി നടത്തിവരികയാണെന്നാണ് പുറത്തുവരുന്ന വിവരങ്ങൾ.
ഇരുരാജ്യങ്ങളും തമ്മിൽ ഒരു തുറന്ന യുദ്ധമുണ്ടായാൽ അത് മിഡിൽ ഈസ്റ്റിനെയും ലോകത്തെയും മുഴുവൻ ബാധിക്കുന്ന വൻ ദുരന്തമായിരിക്കുമെന്ന് ഇറാന് നന്നായി അറിയാം. അതുകൊണ്ടുതന്നെ ലോകത്തെ ഏറ്റവും പ്രധാനപ്പെട്ട എണ്ണക്കപ്പൽ പാതയായ ഹോർമുസ് കടലിടുക്കിന്റെ നിയന്ത്രണം അത്ര എളുപ്പത്തിൽ വിട്ടുകൊടുക്കാൻ ഇറാൻ തയ്യാറല്ല. അമേരിക്കയെ പ്രതിരോധിക്കാനും സമ്മർദ്ദത്തിലാക്കാനുമുള്ള തങ്ങളുടെ ഏറ്റവും വലിയ ആയുധം ഹോർമുസ് കടലിടുക്കാണെന്ന് ടെഹ്റാൻ വിശ്വസിക്കുന്നു. തങ്ങൾക്കെതിരെ എന്തെങ്കിലും നീക്കമുണ്ടായാൽ മേഖലയിലെ അമേരിക്കൻ സൈനിക താവളങ്ങൾ, ഊർജ്ജ സംഭരണശാലകൾ, അമേരിക്കയുമായി ബന്ധമുള്ള മറ്റ് ആസ്തികൾ എന്നിവയ്ക്ക് നേരെ നേരിട്ടോ അല്ലാതെയോ ശക്തമായ ആക്രമണം നടത്തുമെന്നാണ് ഇറാന്റെ ഭീഷണി.
കഴിഞ്ഞ ദിവസങ്ങളിൽ ഐആർജിസി പുറത്തുവിട്ട പ്രസ്താവനയിൽ, അമേരിക്കയുടെ ഭാഗത്തുനിന്ന് എന്തെങ്കിലും തരത്തിലുള്ള ആക്രമണമുണ്ടായാൽ അതിലും ശക്തവും മാരകവുമായ രീതിയിലായിരിക്കും ഇറാൻ തിരിച്ചടിക്കുകയെന്ന് മുന്നറിയിപ്പ് നൽകിയിരുന്നു. ഈ തിരിച്ചടിയുടെ ആഘാതം മിഡിൽ ഈസ്റ്റിൽ മാത്രം ഒതുങ്ങില്ലെന്നും അതിരുകൾക്കപ്പുറത്തേക്ക് വ്യാപിക്കുമെന്നും അവർ വ്യക്തമാക്കി. ഇത്തരത്തിലുള്ള ശക്തമായ നിലപാടുകളിലൂടെയും പ്രസ്താവനകളിലൂടെയും മേഖലയിലെ മറ്റ് അറബ് രാജ്യങ്ങൾക്ക് മേൽ വലിയ സമ്മർദ്ദം ചെലുത്താനാണ് ഇറാൻ ശ്രമിക്കുന്നത്. ഇറാന് നേരെയുള്ള ആക്രമണങ്ങളിൽ നിന്ന് അമേരിക്കയെ പിന്തിരിപ്പിക്കാൻ ഈ അയൽരാജ്യങ്ങൾ ഇടപെടും എന്നാണ് ടെഹ്റാൻ കണക്കുകൂട്ടുന്നത്. നിലവിലെ സാഹചര്യത്തിൽ മിഡിൽ ഈസ്റ്റ് വീണ്ടുമൊരു യുദ്ധത്തിന്റെ നിഴലിലാണ്.
