മുൻ മുഖ്യമന്ത്രി പിണറായി വിജയന്റെ സുരക്ഷാ ഉദ്യോഗസ്ഥർ യൂത്ത് കോൺഗ്രസ്, കെ.എസ്.യു. പ്രവർത്തകരെ മർദ്ദിച്ച സംഭവത്തിൽ സമഗ്രമായ പുനരന്വേഷണത്തിന് പ്രത്യേക സംഘത്തെ നിയോഗിച്ച് കേരള പൊലീസ് ഉത്തരവിറക്കി. വി.ഡി. സതീശൻ സർക്കാർ അധികാരമേറ്റതിന് പിന്നാലെ ഈ കേസിൽ കൃത്യമായ അന്വേഷണം ഉണ്ടാകുമെന്ന് പ്രഖ്യാപിച്ചിരുന്നു. ഇതിന് തൊട്ടുപിന്നാലെയാണ് ഇപ്പോൾ ആറംഗ പ്രത്യേക അന്വേഷണ സംഘത്തെ രൂപീകരിച്ചിരിക്കുന്നത്. ആലപ്പുഴ ക്രൈംബ്രാഞ്ച് എസ്.പി. ഷൗക്കത്തലിയുടെ നേതൃത്വത്തിലുള്ള സംഘത്തിൽ പ്രമുഖ ഉദ്യോഗസ്ഥനായ ഡി.വൈ.എസ്.പി. ബൈജു പൗലോസാണ് പ്രധാന അന്വേഷണ ഉദ്യോഗസ്ഥൻ.
2023 ഡിസംബറിൽ നവകേരള യാത്രയ്ക്കിടെ ആലപ്പുഴയിൽ വെച്ച് കരിങ്കൊടി കാണിച്ച പ്രതിഷേധക്കാരെ മുഖ്യമന്ത്രിയുടെ അകമ്പടി വാഹനത്തിൽ നിന്നിറങ്ങി ഗൺമാൻമാർ ക്രൂരമായി മർദ്ദിച്ചതാണ് കേസിനാസ്പദമായ സംഭവം. അന്ന് ഈ നടപടിയെ ‘രക്ഷാപ്രവർത്തനം’ എന്ന് വിശേഷിപ്പിച്ച് പിണറായി വിജയൻ ന്യായീകരിച്ചത് വലിയ രാഷ്ട്രീയ കൊടുങ്കാറ്റിന് വഴിവെച്ചിരുന്നു. പൊലീസ് ആദ്യം നടപടിയെടുക്കാൻ വിമുഖത കാണിച്ചതിനെ തുടർന്ന് മർദ്ദനമേറ്റ പ്രവർത്തകർ കോടതിയെ സമീപിക്കുകയും, തുടർന്ന് കോടതി ഉത്തരവിന്റെ അടിസ്ഥാനത്തിലാണ് ഗൺമാൻമാരായ അനിൽ കുമാർ, സന്ദീപ് എസ്. എന്നിവർക്കെതിരെ കേസെടുക്കുകയും ചെയ്തത്.
പുതിയ ഉത്തരവ് പ്രകാരം അന്വേഷണ സംഘം വളരെ വേഗത്തിൽ നടപടികളിലേക്ക് കടക്കും. കേസന്വേഷണത്തിന്റെ പുരോഗതി റിപ്പോർട്ട് രണ്ടാഴ്ചയ്ക്കുള്ളിലും, അന്തിമ അന്വേഷണ റിപ്പോർട്ട് ഒരു മാസത്തിനകവും സമർപ്പിക്കണമെന്നാണ് പൊലീസിന്റെ കർശന നിർദ്ദേശം. സംസ്ഥാനത്ത് ഭരണം മാറിയതിന് പിന്നാലെ മുൻ സർക്കാരിനെ പ്രതിരോധത്തിലാക്കിയ പ്രമാദമായ കേസിൽ പുനരന്വേഷണം പ്രഖ്യാപിച്ചത് വരും ദിവസങ്ങളിൽ രാഷ്ട്രീയ വൃത്തങ്ങളിൽ വലിയ ചർച്ചകൾക്ക് കാരണമാകും.
