എറണാകുളം മലയിടംതുരുത്തിലെ ദീർഘകാല തർക്കഭൂമിയിൽ നാളെ ഒഴിപ്പിക്കൽ നടപടികൾ ഉണ്ടാകില്ലെന്ന് സർക്കാർ വ്യക്തമാക്കി. മലയിടംതുരുത്തിലെ താമസക്കാർക്ക് ഒപ്പമാണ് സർക്കാരെന്നും ഒരു കുടുംബവും പെരുവഴിയിലാകില്ലെന്നും റവന്യൂ മന്ത്രി റോജി എം. ജോൺ ഉറപ്പുനൽകി. മുൻസിഫ് കോടതി ഉത്തരവ് നടപ്പാക്കുന്നതുമായി ബന്ധപ്പെട്ട് നാളെ പോലീസിന്റെ ഭാഗത്തുനിന്ന് യാതൊരുവിധ നടപടികളും ഉണ്ടാകില്ലെന്നും അദ്ദേഹം വ്യക്തമാക്കി. കേസ് നടത്തിപ്പിൽ ചില വീഴ്ചകൾ സംഭവിച്ചിട്ടുണ്ടെന്നും അതിനാൽ സർക്കാർ വിഷയത്തിൽ നേരിട്ട് ഇടപെടുകയാണെന്നും മന്ത്രി അറിയിച്ചു.
താമസക്കാരുടെ അവകാശങ്ങൾ സംരക്ഷിക്കുന്നതിനായി സർക്കാർ തിങ്കളാഴ്ച ഹൈക്കോടതിയെ സമീപിക്കും. കോടതിയിൽ നിന്ന് അനുകൂലമായ വിധി സമ്പാദിക്കാനാണ് സർക്കാർ നേരിട്ട് നിയമപോരാട്ടത്തിന് ഇറങ്ങുന്നത്. ഇനി അഥവാ ഹൈക്കോടതിയിൽ നിന്ന് അനുകൂല വിധി ഉണ്ടായില്ലെങ്കിൽ പോലും സ്ഥലത്തെ താമസക്കാരെ സർക്കാർ പൂർണ്ണമായി പുനരധിവസിപ്പിക്കുമെന്നും മന്ത്രി റോജി എം. ജോൺ കൂട്ടിച്ചേർത്തു. ആശങ്കയിലായ കുടുംബങ്ങൾക്ക് വലിയ ആശ്വാസം നൽകുന്നതാണ് സർക്കാരിന്റെ ഈ അടിയന്തര ഇടപെടൽ.
അതേസമയം, നിലവിലെ കോടതി കമ്മീഷൻ പ്രവർത്തനങ്ങൾ സർക്കാരിന്റെ നിയന്ത്രണത്തിലല്ലെന്നും അത് കോടതിയുടെ നേരിട്ടുള്ള ഉത്തരവിലായതിനാലാണ് മുൻപോട്ട് പോയതെന്നും മന്ത്രി വിശദീകരിച്ചു. എന്നാൽ ക്രമസമാധാന പ്രശ്നങ്ങൾ ഉണ്ടാകാതിരിക്കാനും പാവപ്പെട്ട കുടുംബങ്ങളെ സംരക്ഷിക്കാനും സർക്കാർ പ്രതിജ്ഞാബദ്ധമാണ്. ഹൈക്കോടതിയിലെ അപ്പീൽ നടപടികൾ പൂർത്തിയാകുന്നതുവരെ പ്രദേശത്ത് കടുത്ത പോലീസ് നടപടികൾ ഉണ്ടാകില്ലെന്നാണ് ലഭിക്കുന്ന സൂചന.
