വാഷിംഗ്ടൺ: ഇറാനെതിരെയുള്ള യുഎസ് സൈന്യത്തിന്റെ വ്യോമാക്രമണ പദ്ധതികൾ താൽക്കാലികമായി മാറ്റിവെച്ച തീരുമാനം വളരെ കുറഞ്ഞ ദിവസങ്ങളിലേക്ക് മാത്രമായിരിക്കുമെന്ന് യുഎസ് പ്രസിഡന്റ് ഡോണൾഡ് ട്രംപ് വ്യക്തമാക്കി. പശ്ചിമേഷ്യൻ മേഖലയിലെ സമാധാന ചർച്ചകളിൽ പുരോഗതിയില്ലാത്തതിൽ കടുത്ത അതൃപ്തി രേഖപ്പെടുത്തിയ ട്രംപ്, ഈ ആഴ്ചയോടെ തന്നെ കാര്യങ്ങളിൽ അന്തിമ തീരുമാനമുണ്ടാകുമെന്ന സൂചനയാണ് നൽകിയത്. ഖത്തർ, സൗദി അറേബ്യ, യുണൈറ്റഡ് അറബ് എമിറേറ്റ്സ് എന്നീ മൂന്ന് ഗൾഫ് രാജ്യങ്ങളിലെ ഭരണാധികാരികളുടെ പ്രത്യേക അഭ്യർത്ഥന മാനിച്ചാണ് ചൊവ്വാഴ്ച നടത്താനിരുന്ന കടുത്ത സൈനിക ആക്രമണം താൻ താൽക്കാലികമായി മാറ്റിവെക്കുന്നതെന്ന് തിങ്കളാഴ്ച ട്രംപ് സോഷ്യൽ മീഡിയയിലൂടെ വെളിപ്പെടുത്തിയിരുന്നു.
എന്നാൽ ചൊവ്വാഴ്ച വൈറ്റ് ഹൗസിൽ മാധ്യമപ്രവർത്തകരെ കണ്ടപ്പോൾ ഈ താൽക്കാലിക ആശ്വാസം ‘വളരെ പരിമിതമായ സമയത്തേക്ക്’ മാത്രമായിരിക്കുമെന്ന് അദ്ദേഹം വീണ്ടും ആവർത്തിച്ചു. നയതന്ത്ര ചർച്ചകൾക്കായി താൻ എത്ര ദിവസം കാത്തിരിക്കുമെന്ന കാര്യം ട്രംപ് കൃത്യമായി വ്യക്തമാക്കിയിട്ടുണ്ട്. “ഞാൻ പറയുന്നത് രണ്ട് അല്ലെങ്കിൽ മൂന്ന് ദിവസത്തെ കാര്യമാണ്. പരമാവധി ഈ വരുന്ന വെള്ളി, ശനി, അല്ലെങ്കിൽ ഞായറാഴ്ച വരെ. അതുമല്ലെങ്കിൽ അടുത്ത ആഴ്ചയുടെ തുടക്കം വരെ; അത്രമാത്രം. കാരണം പുതിയൊരു ആണവായുധം നിർമ്മിക്കാൻ ഇറാനെ അനുവദിക്കാൻ നമുക്കാവില്ല,” ട്രംപ് കടുത്ത ഭാഷയിൽ മുന്നറിയിപ്പ് നൽകി.
ഗൾഫ് രാജ്യങ്ങളുടെ മധ്യസ്ഥതയിൽ ഒമാൻ ഉൾപ്പെടെയുള്ള വേദികളിൽ വെച്ച് ഇറാനുമായി സമാധാന ചർച്ചകൾ നടത്താൻ അമേരിക്കൻ പ്രതിനിധികൾ ശ്രമിക്കുന്നുണ്ടെങ്കിലും, തങ്ങളുടെ ആണവ പദ്ധതികൾ പൂർണ്ണമായി ഉപേക്ഷിക്കാൻ ഇറാൻ തയ്യാറാകാത്തതാണ് ട്രംപിനെ ചൊടിപ്പിക്കുന്നത്. ഈ സാഹചര്യത്തിൽ തന്നിരിക്കുന്ന സമയപരിധിക്കുള്ളിൽ ഇറാൻ അനുകൂലമായ ഒരു തീരുമാനമെടുത്തില്ലെങ്കിൽ, വരും ദിവസങ്ങളിൽ തന്നെ പശ്ചിമേഷ്യയിൽ വലിയ തോതിലുള്ള അമേരിക്കൻ സൈനിക നീക്കങ്ങൾ ഉണ്ടാകുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്. ഇത് ആഗോള ഇന്ധന വിപണിയെയും അന്താരാഷ്ട്ര സുരക്ഷയെയും വീണ്ടും കനത്ത ആശങ്കയിലാഴ്ത്തിയിരിക്കുകയാണ്.
