അയോധ്യ രാമക്ഷേത്ര സംഭാവന തട്ടിപ്പ് വിവാദത്തിൽ ആരോപണവിധേയനായ വിശ്വഹിന്ദു പരിഷത്ത് (വിഎച്ച്പി) ഉപാധ്യക്ഷനും ക്ഷേത്ര ട്രസ്റ്റ് ജനറല് സെക്രട്ടറിയുമായ ചമ്പത് റായി ഒടുവിൽ രാജിവെച്ചു. കടുത്ത സമ്മർദ്ദത്തെ തുടർന്ന് ചമ്പത് റായിക്കെതിരെ സർക്കാർ കടുത്ത നടപടികളിലേക്ക് നീങ്ങുന്നതിനിടയിലാണ് ഈ നാടകീയ രാജി. അദ്ദേഹത്തോടൊപ്പം ക്ഷേത്ര ട്രസ്റ്റംഗമായ ഡോ. അനിൽ മിശ്രയും സ്ഥാനം രാജിവെച്ചിട്ടുണ്ട്. വിവാദങ്ങൾ ഉയർന്നതിനെ തുടർന്ന് അയോധ്യ ക്ഷേത്രത്തിന്റെ ഭരണ ചുമതല കഴിഞ്ഞദിവസം താല്ക്കാലികമായി ജില്ലാ മജിസ്ട്രേറ്റിന് കൈമാറിയിരുന്നു. ഇതിന് തൊട്ടുപിന്നാലെയാണ് ട്രസ്റ്റിന്റെ തലപ്പത്തുനിന്നുള്ള സുപ്രധാന രാജികൾ പുറത്തുവരുന്നത്.
അതേസമയം, ട്രസ്റ്റിൽ നിന്ന് രാജിവെച്ചിട്ടും ചമ്പത് റായിക്കെതിരെ ഇതുവരെ പോലീസ് കേസെടുക്കാത്തതിൽ പ്രതിപക്ഷ കക്ഷികളുടെ ഭാഗത്തുനിന്നും മറ്റ് സംഘടനകളിൽ നിന്നും വിമർശനം ശക്തമാവുകയാണ്. ചമ്പത് റായിയുടെ വിശ്വസ്തരും ക്ഷേത്ര ജീവനക്കാരുമായ എട്ട് പേർ ഇതിനകം അറസ്റ്റിലായിട്ടും അദ്ദേഹത്തെ ചോദ്യം ചെയ്യാൻ പോലും തയ്യാറാകാത്തത് ഉന്നത രാഷ്ട്രീയ ഇടപെടൽ മൂലമാണെന്ന് പ്രതിപക്ഷം ആരോപിക്കുന്നു. എന്നാൽ വിഷയത്തിൽ സമഗ്രമായ അന്വേഷണം നടക്കുന്നുണ്ടെന്നും സത്യം ഉടൻ പുറത്തുവരുമെന്നും ഉത്തർപ്രദേശ് മുഖ്യമന്ത്രി യോഗി ആദിത്യനാഥ് പ്രതികരിച്ചു. കേസന്വേഷിക്കുന്ന പ്രത്യേക സംഘം (എസ്ഐടി) കഴിഞ്ഞദിവസങ്ങളിൽ അയോധ്യയിലെത്തി വ്യാപകമായ തെളിവെടുപ്പ് നടത്തിയിരുന്നു.
തട്ടിപ്പുമായി ബന്ധപ്പെട്ട് ചമ്പത് റായിയുടെ വിശ്വസ്തനും അദ്ദേഹത്തിന്റെ ഡ്രൈവറുമായ ടിനു യാദവ് ഉൾപ്പെടെയുള്ളവരാണ് നിലവിൽ അറസ്റ്റിലായിരിക്കുന്നത്. ക്ഷേത്രത്തിലെ കാണിക്ക പെട്ടികളുടെയും പണം എണ്ണുന്ന മുറിയുടെയും പൂർണ്ണ ചുമതല ടിനു യാദവിനായിരുന്നു. ഇയാളുടെ വീട്ടിൽ നടത്തിയ പരിശോധനയിൽ കോടിക്കണക്കിന് രൂപയുടെ സ്വർണ്ണ, വെള്ളി ആഭരണങ്ങൾ അന്വേഷണ സംഘം കണ്ടെത്തിയിരുന്നു. വിഎച്ച്പിക്കുള്ളിലെ ഒരു വിഭാഗത്തിന് ചമ്പത് റായിയുടെ പ്രവർത്തനങ്ങളിൽ കടുത്ത അമർഷമുണ്ടെന്നാണ് റിപ്പോർട്ടുകൾ. കർസേവകരുടെ സംഘടനയായ ധർമ്മസേന ചമ്പത് റായിക്കെതിരെ പരസ്യമായി രംഗത്തുവന്നിട്ടുണ്ട്. എന്നാൽ ചമ്പത് റായി ഏത് അന്വേഷണത്തോടും സഹകരിക്കുമെന്നും സത്യസന്ധത തെളിയിക്കുമെന്നും വിഎച്ച്പി നേതാവ് അലോക് കുമാർ വ്യക്തമാക്കി.
