നടൻ നിവിൻ പോളിയുമായുള്ള സിനിമാ നിർമ്മാണ തർക്കം മധ്യസ്ഥതയ്ക്ക് (Arbitration) വിടണമെന്ന പ്രമുഖ സിനിമാ നിർമ്മാതാവ് ലിസ്റ്റിൻ സ്റ്റീഫന്റെ ആവശ്യം എറണാകുളം മുൻസിഫ് കോടതി തള്ളി. ലിസ്റ്റിൻ സ്റ്റീഫന്റെ മാജിക് ഫ്രെയിംസും നിവിൻ പോളിയുടെ പോളി ജൂനിയർ പിക്ചേഴ്സും തമ്മിൽ ‘രാമചന്ദ്ര ബോസ് ആൻഡ് കോ’, ‘മലയാളി ഫ്രം ഇന്ത്യ’ എന്നീ ചിത്രങ്ങളുമായി ബന്ധപ്പെട്ടുണ്ടായ സാമ്പത്തിക തർക്കങ്ങളിലാണ് കോടതിയുടെ ഈ സുപ്രധാന നടപടി. കേസിൽ ലിസ്റ്റിൻ സ്റ്റീഫന് ഉണ്ടായ വലിയൊരു തിരിച്ചടിയായാണ് ഈ കോടതി ഉത്തരവ് വിലയിരുത്തപ്പെടുന്നത്.
2012 സെപ്റ്റംബർ 12-നാണ് ‘രാമചന്ദ്ര ബോസ് ആൻഡ് കോ’ എന്ന സിനിമയുമായി ബന്ധപ്പെട്ട നിർമ്മാണ കരാർ ഇരു കമ്പനികളും തമ്മിൽ ഒപ്പുവെക്കുന്നത്. എന്നാൽ ഈ കരാറിൽ തർക്കങ്ങൾ ഉണ്ടായാൽ അത് മധ്യസ്ഥതയ്ക്ക് വിടണം എന്ന തരത്തിലുള്ള നിർബന്ധിത ആർബിട്രേഷൻ വ്യവസ്ഥകൾ ഇല്ലെന്ന് കോടതി കണ്ടെത്തുകയായിരുന്നു. കൂടാതെ കരാറിന്റെ യഥാർത്ഥ രേഖകൾ ഹാജരാക്കാൻ ലിസ്റ്റിൻ സ്റ്റീഫന് സാധിച്ചില്ലെന്നും, നിവിൻ പോളിക്കെതിരെ ഉയർന്ന അപകീർത്തികരമായ പ്രസ്താവനകളുടെ കുറ്റം ഒരിക്കലും മധ്യസ്ഥ ചർച്ചയിലൂടെ മാത്രം പരിഹരിക്കാൻ കഴിയുന്നതല്ലെന്നും കോടതി വ്യക്തമാക്കി.
മാജിക് ഫ്രെയിംസ് കമ്പനി സുപ്രധാനമായ സാമ്പത്തിക വിവരങ്ങൾ തങ്ങളിൽ നിന്നും മറച്ചുവെച്ചു എന്നാണ് പോളി ജൂനിയർ പിക്ചേഴ്സ് പ്രധാനമായും ആരോപിക്കുന്നത്. സിനിമാ വരുമാന രേഖകളിൽ ലിസ്റ്റിൻ സ്റ്റീഫന്റെ കമ്പനി കൃത്രിമത്വം കാണിച്ചെന്നും, യാതൊരു രേഖകളുമില്ലാത്ത 7.5 കോടി രൂപയുടെ ബാധ്യത തങ്ങളുടെ മേൽ അടിച്ചേൽപ്പിച്ചെന്നുമാണ് നിവിൻ പോളിയുടെ കമ്പനിയുടെ പരാതി. 5.5 കോടി രൂപയുടെ ലോൺ കൃത്യമായി തിരിച്ചടച്ചിട്ടും തീയതി രേഖപ്പെടുത്താത്ത സെക്യൂരിറ്റി ചെക്കുകൾ ലിസ്റ്റിൻ സ്റ്റീഫൻ കൈവശം വെച്ചതായും കോർപ്പറേറ്റ് സുതാര്യത കാണിച്ചില്ലെന്നും ഇവർ ആരോപിക്കുന്നു. ഇതിന് പുറമെ ‘മലയാളി ഫ്രം ഇന്ത്യ’ എന്ന ചിത്രത്തിന്റെ ലാഭവിഹിതം പങ്കുവെക്കുന്നതുമായും ഇരുവരും തമ്മിൽ നിലവിൽ ശക്തമായ തർക്കങ്ങളുണ്ട്.
Cinema Disputes With Nivin Pauly: Ernakulam Court Rejects Producer Listin Stephen’s Plea for Arbitration
