ടെഹ്റാൻ: തങ്ങളുടെ മണ്ണ് ഉപയോഗിച്ച് അമേരിക്കയ്ക്ക് സൈനിക പിന്തുണ നൽകുന്നതിനെതിരെ അയൽരാജ്യങ്ങൾക്ക് ആവർത്തിച്ച് മുന്നറിയിപ്പ് നൽകിയിട്ടുണ്ടെന്ന് യൂണിവേഴ്സിറ്റി ഓഫ് ടെഹ്റാനിലെ പ്രൊഫസറായ മൊസ്തഫ ഖോഷ്ചെഷം വ്യക്തമാക്കി. “തങ്ങളുടെ രാജ്യങ്ങളിൽ നിന്നുള്ള യുഎസിന്റെ ശത്രുതാപരമായ നീക്കങ്ങളും ആക്രമണങ്ങളും അവസാനിപ്പിക്കാൻ പേർഷ്യൻ ഗൾഫ് തീരദേശ രാജ്യങ്ങൾക്ക് ഇറാൻ ആവശ്യത്തിന് സമയവും അവസരവും നൽകിയിട്ടുള്ളതാണ്. എന്നാൽ, ഇപ്പോൾ സംസാരിക്കുമ്പോൾ പോലും ഈ രാജ്യങ്ങളിൽ ഡസനിലധികം യുഎസ് ടാങ്കർ വിമാനങ്ങൾ നിലയുറപ്പിച്ചിട്ടുണ്ട്. ഇറാനെ ആക്രമിക്കാനുള്ള ഒരു പ്രധാന പ്ലാറ്റ്ഫോമായി അമേരിക്ക ഇപ്പോഴും ഈ പ്രദേശങ്ങൾ ഉപയോഗിക്കുകയാണ്,” അദ്ദേഹം പറഞ്ഞു.
ഇതിനുപുറമേ, ഈ രാജ്യങ്ങളിലെ ചില വ്യോമതാവളങ്ങൾ യുഎസ് നവീകരിക്കുന്നുണ്ടെന്നും, ഇരുവിഭാഗവും പരസ്പരമുള്ള ശത്രുതാപരമായ നീക്കങ്ങൾ അവസാനിപ്പിക്കണം എന്ന വെടിനിർത്തൽ കരാറിന്റെ ലംഘനമാണിതെന്നും അദ്ദേഹം ചൂണ്ടിക്കാട്ടി. അന്താരാഷ്ട്ര നിയമപ്രകാരം ഹോർമുസ് കടലിടുക്കിന്റെ ഒരു ഭാഗം തങ്ങളുടെ ഇഷ്ടാനുസരണം നിയന്ത്രിക്കാൻ ഇറാന് പൂർണ്ണ അവകാശമുണ്ടെന്നും അദ്ദേഹം കൂട്ടിച്ചേർത്തു.
“നമ്മൾ ഇവിടെ സംസാരിക്കുന്നത് ഒരു യുദ്ധത്തിന് ശേഷമുണ്ടായ വെടിനിർത്തൽ കരാറിനെക്കുറിച്ചാണ്. അതുകൊണ്ടുതന്നെ നിലവിലെ ധാരണാപത്രം അമേരിക്ക വളരെ വ്യക്തമായി ലംഘിച്ചിരിക്കുകയാണ്,” ഖോഷ്ചെഷം വ്യക്തമാക്കി. യുഎസുമായുള്ള തർക്കങ്ങൾക്കിടയിൽ അമേരിക്കയെ സഹായിക്കുന്ന ഗൾഫ് അയൽരാജ്യങ്ങൾക്കെതിരെ ഇറാൻ കടുത്ത നിലപാടിലേക്ക് നീങ്ങുന്നതിന്റെ സൂചനയാണിത്.
