ടെഹ്റാൻ: ഈ വർഷമാദ്യം അമേരിക്കയും ഇസ്രായേലും നടത്തിയ ആദ്യഘട്ട ആക്രമണങ്ങളിൽ കൊല്ലപ്പെട്ട മുൻ പരമോന്നത നേതാവ് ആയത്തുള്ള അലി ഖമേനിയുടെ ശവസംസ്കാര ചടങ്ങുകളുടെ സമയവിവരപ്പട്ടിക ഇറാൻ ഔദ്യോഗികമായി പ്രഖ്യാപിച്ചു. ഇറാൻ ഔദ്യോഗിക മാധ്യമങ്ങൾ പുറത്തുവിട്ട വിവരങ്ങൾ പ്രകാരം, ജൂലൈ നാലിന് ടെഹ്റാനിൽ ആരംഭിക്കുന്ന ചടങ്ങുകൾ ജൂലൈ ആറ് വരെ നീണ്ടുനിൽക്കും.
തുടർന്ന് ജൂലൈ ഏഴിന് വിഖ്യാത തീർത്ഥാടന നഗരമായ ഖുമിലും ആദരാഞ്ജലി അർപ്പിക്കുന്നതിനുള്ള ചടങ്ങുകൾ നടക്കും. ജൂലൈ ഒൻപതിന് ഖമേനിയുടെ ജന്മദേശമായ വടക്കുകിഴക്കൻ നഗരമായ മഷാദിലാണ് മൃതദേഹം സംസ്കരിക്കുക. പ്രധാന ചടങ്ങുകൾ നടക്കുന്ന ദിവസങ്ങളിൽ പൊതുജനങ്ങൾക്ക് പങ്കാളിത്തം ഉറപ്പാക്കുന്നതിനായി ടെഹ്റാനിൽ അധികൃതർ പൊതുഅവധി പ്രഖ്യാപിച്ചിട്ടുണ്ട്.
തലസ്ഥാന നഗരിയിൽ നടക്കുന്ന ചടങ്ങുകളിൽ മാത്രം ഏകദേശം രണ്ട് കോടിയോളം ആളുകൾ പങ്കെടുക്കുമെന്നാണ് ഇറാന്റെ ഔദ്യോഗിക കണക്കുകൂട്ടൽ. മാർച്ച് മാസത്തിൽ നടത്താൻ നിശ്ചയിച്ചിരുന്ന ശവസംസ്കാര ചടങ്ങുകൾ രാജ്യത്ത് യുദ്ധം പൊട്ടിപ്പുറപ്പെട്ടതിനെ തുടർന്നാണ് ജൂലൈയിലേക്ക് മാറ്റിവെക്കേണ്ടി വന്നത്.
