ഇംഗ്ല്വുഡ്: ലോകകപ്പ് ഫുട്ബോളില് അതിശക്തരായ ബല്ജിയത്തെ സമനിലയില് ഇറാന് തളച്ചത് മൈാനത്ത് ആശ്വാസം പകരുമ്പോഴും മൈതാനത്തിനു പുറത്തുള്ള തര്ക്കങ്ങള് അതിരൂക്ഷമായി തുടരുന്നു. മത്സരം അവസാനിച്ചതിനു പിന്നാലെ , ഇസ്ലാമിക വിപ്ലവത്തിന് മുമ്പുണ്ടായിരുന്ന ഇറാനിയന് പതാക അച്ചടിച്ച ഷര്ട്ട് ധരിച്ച ഒരു ആരാധകനെ മൈതാനത്തേക്ക് ഓടിക്കയറാന് ശ്രമിച്ചതിനെ തുടര്ന്ന് സുരക്ഷാ ഉദ്യോഗസ്ഥര് കസ്റ്റഡിയിലെടുത്തു. കൂടാതെ, പ്രതിഷേധക്കാരുമായി വാക്കുതര്ക്കത്തിലും സംഘര്ഷത്തിലും ഏര്പ്പെട്ട ഒരു ആരാധകനെ പരിക്കേറ്റതിനെ തുടര്ന്ന് ആശുപത്രിയിലേക്ക് കൊണ്ടുപോയി.
മത്സരം ആരംഭിക്കുന്നതിന് മുന്പ് തന്നെ, അമേരിക്കന് ആഭ്യന്തര സുരക്ഷാ വകുപ്പിലെ ഉദ്യോഗസ്ഥനായ മാര്ക്ക്വെയ്ന് മുള്ളിന്, ഇറാന്റെ വിപ്ലവ ഗാര്ഡുമായി നേരിട്ടുള്ള ബന്ധമുള്ള ഒരാളെ അമേരിക്കയിലേക്ക് പ്രവേശിപ്പിക്കാന് ഇറാന് ശ്രമിച്ചുവെന്ന് ആരോപിച്ചു. എന്നാല് ഇറാന് ഫുട്ബോള് ഫെഡറേഷന് ഈ ആരോപണം ശക്തമായി നിഷേധിച്ചു.അമേരിക്കന് അവകാശവാദം പൂര്ണമായും അസത്യമാണെന്നു’ ഫെഡറേഷന് പ്രസ്താവനയില് പറഞ്ഞു.
സാധാരണയായി ഒരു ദേശീയ ടീം ഏകദേശം 120 അംഗങ്ങളുമായാണ് യാത്ര ചെയ്യുന്നതെങ്കിലും, ഇറാന്റെ കാര്യത്തില് അമേരിക്ക 53 പേര്ക്കാണ് അനുമതി നല്കിയതെന്ന് മുള്ളിന് ഫോക്സ് ന്യൂസിനോട് പറഞ്ഞു. ബാക്കിയുള്ളവര്ക്ക അനുമതി നലകാതിരുന്നത് അവര് ഐആര്ജി സിയുമായി നേരിട്ടുള്ള ബന്ധമുണ്ടെന്നുമായിരുന്നു അദ്ദേഹത്തിന്റെ ആരോപണം. എന്നാല് ഈ ആരോപണങ്ങള്ക്ക് യാതൊരു തെളിവോ രേഖകളോ ഇല്ലെന്നും, വിവേചനപരമായ നടപടികളെ ന്യായീകരിക്കാനുള്ള ശ്രമമാണിതെന്നും ഇറാന് ഫെഡറേഷന് മറുപടി നല്കി.
ടൂര്ണമെന്റിന്റെ തുടക്കം മുതല് രാഷ്ട്രീയ വിഷയങ്ങള് ഫുട്ബോളിനെ ബാധിക്കുന്നുവെന്ന പരാതിയാണ് ഇറാന് ഉയര്ത്തുന്നത്. അതിനിടെ, അമേരിക്കന് വൈസ് പ്രസിഡന്റ് ജെ.ഡി. വാന്സ്, യുദ്ധം അവസാനിപ്പിക്കുന്നതിനുള്ള ഇടക്കാല കരാറുമായി ബന്ധപ്പെട്ട ചര്ച്ചകള് സ്വിറ്റ്സര് ലന്ഡില് ആരംഭിച്ചതോടെ പുതിയൊരു അധ്യായം തുടങ്ങാനുള്ള അവസരമുണ്ടെന്ന് അഭിപ്രായപ്പെട്ടു.
ഇറാന് ടീം മെക്സിക്കോയില് നിന്ന് യാത്ര ചെയ്ത് മത്സരങ്ങള്ക്ക് എത്തേണ്ടിവരുന്നതും, അരിസോണയിലെ ടക്സണില് പരിശീലനത്തിന് അനുമതി ലഭിക്കാതിരുന്നതും, ചില ഉദ്യോഗസ്ഥര്ക്കും സ്റ്റാഫിനും പ്രവേശനാനുമതി നിഷേധിച്ചതുമെല്ലാം ടീം മാനേജ്മെന്റും പരിശീലകനും നേരത്തെ വിമര്ശിച്ചിരുന്നു. ഫിഫയ്ക്ക് പരാതി നല്കുമെന്നും ഇറാന് ഫെഡറേഷന് വ്യക്തമാക്കിയിട്ടുണ്ട്.
ഇറാന് താരം അലി റേസ ജഹാന്ബക്ഷ്, വിവാദങ്ങളേക്കുറിച്ച് നിരന്തരം സംസാരിക്കാന് താന് ആഗ്രഹിക്കുന്നില്ലെന്നും, അടുത്ത മത്സരത്തിനായി സിയാറ്റിലിലേക്ക് യാത്ര ചെയ്യാനും തയ്യാറെ ടുക്കാനുമാണ് ടീമിന്റെ ശ്രദ്ധയെന്നും പറഞ്ഞു. അടുത്ത മത്സരം ഈജിപ്തിനെതിരെയാണ്.
”ഞങ്ങള് അധികം ഒന്നും ആവശ്യപ്പെടുന്നില്ല. മറ്റ് 47 ടീമുകള്ക്ക് ലഭിക്കുന്ന അതേ നടപടിക്രമങ്ങള് മാത്രമാണ് ഞങ്ങള് ആവശ്യപ്പെടുന്നത്,” അദ്ദേഹം പറഞ്ഞു. ”ടീമിനെ സഹായിക്കുന്ന എല്ലാവരെയും കൂടെ കൊണ്ടുപോകാന് കഴിയുമെന്ന് പ്രതീക്ഷിക്കുന്നു.”
ലോസ് ആഞ്ചലസിന് സമീപമുള്ള സ്റ്റേഡിയത്തില് പച്ചയും ചുവപ്പും നിറത്തിലുള്ള സ്കാര്ഫുകളും ടി-ഷര്ട്ടുകളും ധരിച്ച ആരാധകര് ടീമിന്റെ മെക്സിക്കോയിലേക്കുള്ള പരിശീലന മാറ്റത്തെക്കുറിച്ച് വ്യത്യസ്ത അഭിപ്രായങ്ങളാണ് പങ്കുവെച്ചത്. ചിലര് ഇത് അന്യായമാ ണെന്ന് കരുതിയപ്പോള്, ടിജുവാനയിലേക്ക് പോയ ആരാധകര് താരങ്ങളുമായി കൂടുതല് അടുത്ത് ഇടപഴകാന് കഴിഞ്ഞതില് സന്തോഷം പ്രകടിപ്പിച്ചു.
ഇതിനിടെ മത്സരം നടന്ന സ്റ്റേഡിയത്തിന് പുറത്ത് നൂറോളം പേര് ഇറാന് സര്ക്കാരിനെതിരെ പ്രതിഷേധിച്ചു. സ്റ്റേഡിയത്തിനുള്ളില്, 1979-ലെ ഇസ്ലാമിക വിപ്ലവത്തിന് മുമ്പ് ഉപയോഗിച്ചിരുന്ന സിംഹവും സൂര്യനും ആലേഖനം ചെയ്ത ചുവപ്പ്-പച്ച പതാകകള് നിരവധി ആരാധകര് ഉയര്ത്തി ക്കാട്ടി. ഔദ്യോഗിക ഇറാന് പതാകയേക്കാള് ഈ പതാകകള് കൂടുതല് ദൃശ്യമായിരുന്നു. ബെല്ജി യം ആരാധകരും അര്ജന്റീന, അമേരിക്ക, മെക്സിക്കോ തുടങ്ങിയ രാജ്യങ്ങളുടെ ജേഴ്സി ധരിച്ചവരും സ്റ്റേഡിയത്തില് വലിയ സാന്നിധ്യം രേഖപ്പെടുത്തി.
Iran draws with Belgium in World Cup: Off-field clashes intensify; Iranian fans hold pre-1979 Islamic Revolution flag
