ടെഹ്റാൻ: തീരദേശ രാജ്യമെന്ന നിലയിൽ ഇറാന്റെ പരിഗണനകളെയും താല്പര്യങ്ങളെയും അവഗണിച്ചുകൊണ്ട് രൂപീകരിക്കുന്ന അവ്യക്തമായ ക്രമീകരണങ്ങളിലൂടെയോ, ബദൽ പാതകളിലൂടെയോ, ഏകപക്ഷീയമായ തീരുമാനങ്ങളിലൂടെയോ കടന്നുപോകുന്ന കപ്പലുകൾക്ക് ഹോർമുസ് കടലിടുക്കിൽ സുരക്ഷിത ഗതാഗതം ഉറപ്പുനൽകാൻ കഴിയില്ലെന്ന് ഇറാൻ വിദേശകാര്യ ഉപമന്ത്രി കാസിം ഗരീബാബാദി വ്യക്തമാക്കി. ഗൾഫ് സഹകരണ കൗൺസിലും അമേരിക്കയും സംയുക്തമായി പുറപ്പെടുവിച്ച പ്രസ്താവനയ്ക്ക് മറുപടിയായാണ് അദ്ദേഹം കടുത്ത നിലപാട് വ്യക്തമാക്കിയത്.
അന്താരാഷ്ട്ര തലത്തിൽ അംഗീകരിക്കാൻ കഴിയുന്ന ഏത് സുപ്രധാന ചട്ടക്കൂടും ഇറാനുമായുള്ള കൃത്യമായ ഏകോപനത്തിലും ‘ഇസ്ലാമാബാദ് ധാരണാപത്രത്തിലെ’ അഞ്ചാം ഖണ്ഡികയിലെ വ്യവസ്ഥകൾക്ക് വിധേയമായും മാത്രമായിരിക്കണം രൂപീകരിക്കേണ്ടതെന്ന് അദ്ദേഹം സമൂഹമാധ്യമമായ എക്സിലൂടെ അറിയിച്ചു. അല്ലാത്തപക്ഷം, ഇറാന്റെ അനുമതിയില്ലാതെ നിശ്ചയിക്കുന്ന അത്തരം ബദൽ പാതകളെല്ലാം തടസ്സപ്പെടുന്ന സാഹചര്യം ഉണ്ടാകുമെന്നും അദ്ദേഹം മുന്നറിയിപ്പ് നൽകി. ഹൊർമുസ് കടലിടുക്ക് പൂർണ്ണമായും ഇറാന്റെയും ഒമാന്റെയും പ്രാദേശിക സമുദ്രപരിധിയിലാണ് വരുന്നതെന്നും, അതിനാൽ ഇവിടുത്തെ കപ്പൽ ഗതാഗത നിയന്ത്രണം ധാരണാപത്രത്തിലെ വ്യവസ്ഥകൾക്ക് വിധേയമായിരിക്കുമെന്നും ഇറാൻ വിദേശകാര്യ മന്ത്രാലയം കൂട്ടിച്ചേർത്തു.
കടലിടുക്കിലൂടെയുള്ള സൗജന്യവും നിബന്ധനകളില്ലാത്തതുമായ കപ്പൽ ഗതാഗതം ആവശ്യപ്പെടുകയും യാതൊരുവിധ നികുതികളും ഈടാക്കരുതെന്ന് വ്യക്തമാക്കുകയും ചെയ്ത യുഎസ്-ജിസിസി സംയുക്ത പ്രസ്താവനയെ തള്ളിക്കൊണ്ടാണ് ഇറാന്റെ ഈ പ്രതികരണം.അമേരിക്കയും ഇറാനും തമ്മിൽ ഒപ്പുവെച്ച 14 ഇന ഇസ്ലാമാബാദ് ധാരണാപത്രത്തിൽ, ഹൊർമുസ് കടലിടുക്കിലെ ഭാവി ഭരണസംവിധാനത്തെയും സമുദ്ര സേവനങ്ങളെയും കുറിച്ച് ഇറാൻ ഒമാൻ സുൽത്താനേറ്റുമായി ചർച്ചകൾ നടത്തുമെന്ന് വ്യക്തമാക്കുന്നുണ്ട്. അന്താരാഷ്ട്ര നിയമങ്ങൾക്കും കടലിടുക്കിന്റെ തീരദേശ രാജ്യങ്ങളുടെ പരമാധികാര അവകാശങ്ങൾക്കും അനുസൃതമായി, പേർഷ്യൻ ഗൾഫ് മേഖലയിലെ മറ്റ് തീരദേശ രാജ്യങ്ങളുമായി ആലോചിച്ചായിരിക്കണം ഈ തീരുമാനങ്ങൾ എടുക്കേണ്ടതെന്നും അതിൽ വ്യവസ്ഥ ചെയ്യുന്നുണ്ട്. ഈ ചട്ടക്കൂടുകൾ ലംഘിച്ചുകൊണ്ടുള്ള യാതൊരുവിധ നീക്കങ്ങളും മേഖലയിൽ അനുവദിക്കില്ലെന്ന നിലപാടിലാണ് ഇറാൻ ഇപ്പോൾ ഉറച്ചുനിൽക്കുന്നത്.
