ലണ്ടൻ: ആഗോള മാധ്യമ രംഗത്ത് വൻ ചലനങ്ങൾ സൃഷ്ടിക്കാനിരുന്ന വാർണർ ബ്രദേഴ്സ് ഡിസ്കവറിയും പാരാമൗണ്ട് സ്കൈഡാൻസും തമ്മിലുള്ള 11,000 കോടി ഡോളറിന്റെ ലയന കരാർ പ്രതിസന്ധിയിലേക്ക്. ഈ ലയന നീക്കത്തെ നിയമപരമായി ചോദ്യം ചെയ്യാൻ തങ്ങൾ ഒരുങ്ങുകയാണെന്ന് ബ്രിട്ടീഷ് സർക്കാർ ചൊവ്വാഴ്ച വ്യക്തമാക്കി. പാരാമൗണ്ട് കമ്പനി വാർണർ ബ്രദേഴ്സ് ഡിസ്കവറിയെ ഏറ്റെടുക്കുന്നതുമായി ബന്ധപ്പെട്ട അന്തിമ തീരുമാനങ്ങളെ ഈ നീക്കം സാരമായി ബാധിച്ചേക്കും.
മാധ്യമ രംഗത്തെ ബഹുസ്വരതയെയും വൈവിധ്യത്തെയും ഈ ലയനം ദോഷകരമായി ബാധിക്കുമെന്ന ആശങ്കയെത്തുടർന്ന്, സിഎൻഎൻ, എച്ച്ബിഒ, വാർണർ ബ്രദേഴ്സ് മൂവി സ്റ്റുഡിയോ എന്നിവയുൾപ്പെടെയുള്ള ആസ്തികൾ പാരാമൗണ്ട് സ്വന്തമാക്കുന്നതിനെതിരെ ഇടപെടാൻ താൻ ആഗ്രഹിക്കുന്നതായി ബ്രിട്ടീഷ് സാംസ്കാരിക മന്ത്രി ലിസ നാൻഡി പ്രസ്താവനയിലൂടെ അറിയിച്ചു. ലയനത്തിൽ ഉൾപ്പെട്ടിരിക്കുന്ന കക്ഷികളുമായി നടത്തിയ ചർച്ചകളുടെയും സ്വതന്ത്രമായ പഠനങ്ങളുടെയും അടിസ്ഥാനത്തിൽ, നിലവിലെ ഉടമകൾക്കും നിർദ്ദിഷ്ട പുതിയ ഉടമകൾക്കും തന്റെ മന്ത്രാലയം കത്തയച്ചിട്ടുണ്ടെന്ന് മന്ത്രി വ്യക്തമാക്കി. ലയനത്തിൽ ഇടപെടാൻ ഔദ്യോഗികമായി നിയമനടപടികൾ സ്വീകരിക്കുന്നതിന് മുന്നോടിയായാണ് ഈ അറിയിപ്പ് നൽകിയിട്ടുള്ളത്.
നിലവിൽ ഈ വിഷയത്തിൽ അന്തിമ തീരുമാനം എടുത്തിട്ടില്ലെന്ന് വ്യക്തമാക്കിയ ലിസ നാൻഡി, കത്തിന് മറുപടി നൽകാൻ ഇരു കമ്പനികൾക്കും ഒരാഴ്ചത്തെ സമയം അനുവദിച്ചിട്ടുണ്ട്. എന്നാൽ ബ്രിട്ടീഷ് സർക്കാർ ഈ വിഷയത്തിൽ കർശനമായ ഇടപെടലിന് തന്നെയാണ് ഒരുങ്ങുന്നത്. ഈ നീക്കവുമായി സർക്കാർ മുന്നോട്ട് പോയാൽ അത് പാരാമൗണ്ടിന് വലിയൊരു വെല്ലുവിളിയാകും. നിലവിൽ യുകെയിലെ കോമ്പറ്റീഷൻ ആൻഡ് മാർക്കറ്റ്സ് അതോറിറ്റി നടത്തുന്ന അന്വേഷണത്തിന് പുറമേ, ബ്രിട്ടീഷ് മാധ്യമ നിയന്ത്രണ ഏജൻസിയായ ‘ഓഫ്കോം’ (Ofcom) കൂടി ഈ ഇടപാടിനെക്കുറിച്ച് പ്രത്യേകം അന്വേഷണം നടത്തേണ്ടി വരും. വാർത്താ മാധ്യമങ്ങളിൽ മതിയായ അളവിൽ വിവിധ വീക്ഷണങ്ങൾ ഉണ്ടാകുന്നുണ്ടെന്ന് ഉറപ്പാക്കാനും മാധ്യമ സ്ഥാപനങ്ങളുടെ നിയന്ത്രണം ചുരുക്കം ചിലരിലേക്ക് മാത്രം ഒതുങ്ങാതിരിക്കാനും പൊതുതാൽപ്പര്യം മുൻനിർത്തിയാണ് താൻ ഈ ഇടപെടലിനെക്കുറിച്ച് ആലോചിക്കുന്നതെന്നും ലിസ നാൻഡി കൂട്ടിച്ചേർത്തു.
ബ്രിട്ടീഷ് സർക്കാരിന്റെ നിലപാടിനോട് പ്രതികരിച്ച പാരാമൗണ്ട് വക്താവ്, യുകെ ഉൾപ്പെടെയുള്ള എല്ലാ സർക്കാർ സംവിധാനങ്ങളുമായും അധികാരികളുമായും സഹകരിച്ച് പ്രവർത്തിക്കാൻ തങ്ങൾ തയ്യാറാണെന്ന് അറിയിച്ചു. തങ്ങളുടെ ലയന നീക്കം യുകെയിലെ മാധ്യമ വൈവിധ്യത്തിന് യാതൊരുവിധത്തിലുള്ള ഭീഷണിയും ഉയർത്തുന്നില്ലെന്നും നിശ്ചയിച്ച സമയത്തിനുള്ളിൽത്തന്നെ നടപടികൾ പൂർത്തിയാക്കാൻ സാധിക്കുമെന്ന ആത്മവിശ്വാസമുണ്ടെന്നും പാരാമൗണ്ട് വ്യക്തമാക്കി. ഈ വർഷം സെപ്റ്റംബർ അവസാനത്തോടെ, അതായത് മൂന്നാം പാദത്തോടെ ലയനം പ്രാബല്യത്തിൽ വരുമെന്നാണ് പാരാമൗണ്ട് പ്രതീക്ഷിക്കുന്നത്. ഇതിന്റെ ഭാഗമായി ഇരു കമ്പനികളെയും പരസ്പരം കൂട്ടിച്ചേർക്കുന്നതിനുള്ള കോർപ്പറേറ്റ് ചർച്ചകൾ മാസങ്ങളായി നടന്നു വരികയുമാണ്.
