തിരുവനന്തപുരം: മുൻ മന്ത്രി കടകംപള്ളി സുരേന്ദ്രൻ ഫയൽ ചെയ്ത മാനനഷ്ടക്കേസിൽ എന്തെങ്കിലും തർക്കമുണ്ടെങ്കിൽ അത് ഉടൻ തന്നെ ബോധിപ്പിക്കണമെന്ന് പ്രതിപക്ഷ നേതാവ് വി.ഡി. സതീശന് തിരുവനന്തപുരം സബ് കോടതി നിർദേശം നൽകി. ശബരിമല സ്വർണക്കൊള്ളയുമായി ബന്ധപ്പെട്ട് വി.ഡി. സതീശൻ നടത്തിയ വിവാദ പരാമർശങ്ങൾക്കെതിരെയാണ് കടകംപള്ളി സുരേന്ദ്രൻ നിയമനടപടി സ്വീകരിച്ചത്. കേസ് വ്യാഴാഴ്ച കോടതി വീണ്ടും പരിഗണിക്കും.
കോടതി നോട്ടീസ് അയച്ച് 90 ദിവസത്തെ നിശ്ചിത കാലാവധി കഴിഞ്ഞിട്ടും പ്രതിപക്ഷ നേതാവിന്റെ ഭാഗത്തുനിന്ന് യാതൊരുവിധ തർക്കങ്ങളോ വിശദീകരണങ്ങളോ ഫയൽ ചെയ്തിരുന്നില്ല. ഈ സാഹചര്യത്തിലാണ് കോടതിയുടെ ഭാഗത്തുനിന്നും ഇപ്പോൾ കർശനമായ നിർദ്ദേശം ഉണ്ടായിരിക്കുന്നത്. നിയമപരമായ സമയപരിധി ലംഘിച്ചതിനെ തുടർന്നാണ് കോടതി നടപടികൾ വേഗത്തിലാക്കാൻ ആവശ്യപ്പെട്ടത്.
രൂക്ഷമായ രാഷ്ട്രീയ വാദപ്രതിവാദങ്ങൾക്ക് വഴിവെച്ച ശബരിമല സ്വർണക്കടത്ത് ആരോപണത്തിൽ കോടതിയുടെ അടുത്ത നീക്കം നിർണായകമാകും. വ്യാഴാഴ്ച കേസ് വീണ്ടും പരിഗണിക്കുമ്പോൾ വി.ഡി. സതീശൻ തർക്കം ബോധിപ്പിക്കുമോ അതോ കൂടുതൽ സമയം ആവശ്യപ്പെടുമോ എന്നതിനെ ആശ്രയിച്ചായിരിക്കും ഈ കേസിന്റെ തുടർന്നുള്ള മുന്നോട്ട് പോക്ക്.
