ഇന്ത്യയുടെ ദീർഘകാല ആണവോർജ ലക്ഷ്യങ്ങൾ കൈവരിക്കുന്നതിൽ നിർണായക വഴിത്തിരിവാകുന്ന ചരിത്രപരമായ വ്യാപാരകരാറിൽ ഇന്ത്യയും ഓസ്ട്രേലിയയും ഒപ്പുവെച്ചു. കരാറിന്റെ ഭാഗമായി ഇന്ത്യയുടെ സിവിൽ ആണവ പദ്ധതികൾക്കായി ഓസ്ട്രേലിയ ഇനി യുറേനിയം കൈമാറും. മെൽബണിൽ വെച്ച് നടന്ന കൂടിക്കാഴ്ചയ്ക്ക് ശേഷം ഓസ്ട്രേലിയയിൽ നിന്നുള്ള യുറേനിയം വിതരണം ഇന്ത്യയുടെ ഊർജ്ജ ലക്ഷ്യങ്ങൾക്ക് വലിയ ഊർജ്ജമാകുമെന്ന് പ്രധാനമന്ത്രി നരേന്ദ്ര മോദി വ്യക്തമാക്കി. അന്താരാഷ്ട്ര ആറ്റോമിക് എനർജി ഏജൻസിയുടെ (IAEA) കർശനമായ സുരക്ഷാ മാനദണ്ഡങ്ങൾ പാലിച്ചുകൊണ്ട് സമാധാനപരമായ ആവശ്യങ്ങൾക്ക് മാത്രമായിരിക്കും ഈ യുറേനിയം ഉപയോഗിക്കുകയെന്ന് ഇരുരാജ്യങ്ങളും ഉറപ്പുനൽകിയിട്ടുണ്ട്.
2047-ഓടെ രാജ്യത്തെ ആണവോർജ ഉത്പാദനം നിലവിലുള്ള 8 ജിഗാവാട്ടിൽ നിന്ന് 100 ജിഗാവാട്ട് ആയി ഉയർത്തുക എന്ന വലിയ സ്വപ്നപദ്ധതിക്കാണ് ഈ കരാറിലൂടെ അടിത്തറയിടുന്നത്. നിലവിൽ കസാഖസ്താൻ, കാനഡ, റഷ്യ തുടങ്ങിയ രാജ്യങ്ങളിൽ നിന്നാണ് ഇന്ത്യ യുറേനിയം പ്രധാനമായും ഇറക്കുമതി ചെയ്യുന്നത്. ലോകത്തിലെ മൊത്തം യുറേനിയം ശേഖരത്തിന്റെ 28 ശതമാനത്തോളം കൈവശമുള്ള ഓസ്ട്രേലിയയെക്കൂടി വിതരണക്കാരുടെ പട്ടികയിൽ ഉൾപ്പെടുത്തുന്നത് വഴി വിതരണ ശൃംഖല കൂടുതൽ ഭദ്രമാക്കാൻ ഇന്ത്യക്ക് സാധിക്കും. ആഭ്യന്തരമായി ജാർഖണ്ഡ്, ആന്ധ്രാപ്രദേശ് എന്നിവിടങ്ങളിൽ യുറേനിയം നിക്ഷേപമുണ്ടെങ്കിലും അവ ഗുണനിലവാരം കുറഞ്ഞതും ഖനനച്ചെലവ് കൂടിയതുമായതിനാലാണ് ഇന്ത്യ വിദേശ ഇറക്കുമതിയെ ആശ്രയിക്കുന്നത്.
സോളാർ, കാറ്റ് തുടങ്ങിയ പുനരുപയോഗ ഊർജ്ജ സ്രോതസ്സുകളെപ്പോലെ കാലാവസ്ഥ വ്യതിയാനങ്ങൾ ബാധിക്കാതെ 24 മണിക്കൂറും തടസ്സമില്ലാതെ വൈദ്യുതി നൽകാൻ ആണവനിലയങ്ങൾക്ക് സാധിക്കും. വർധിച്ചുവരുന്ന വൈദ്യുതി ആവശ്യകത നേരിടുന്നതിനൊപ്പം 2070-ഓടെ സീറോ കാർബൺ ബഹിർഗമനം എന്ന പരിസ്ഥിതി സൗഹൃദ ലക്ഷ്യം കൈവരിക്കാനും ഈ സഹകരണം സഹായിക്കും. ഇതിനുപുറമെ, ഭാവിയിൽ ഇന്ത്യയുടെ സ്വന്തം തോറിയം നിക്ഷേപങ്ങൾ ഉപയോഗപ്പെടുത്തിയുള്ള ആണവോർജ്ജ ഉൽപ്പാദന സാങ്കേതികവിദ്യ വികസിപ്പിക്കുന്നതിനും യുറേനിയത്തിന്റെ ലഭ്യത അത്യന്താപേക്ഷിതമാണ്.
