ടെഹ്റാൻ: അന്താരാഷ്ട്ര ഊർജ്ജ ഗതാഗതത്തിന്റെ പ്രധാന പാതയായ ഹോർമൂസ് കടലിടുക്കിലൂടെയുള്ള സുരക്ഷിതമായ കപ്പൽ ഗതാഗതം ഉറപ്പാക്കുന്നത് സംബന്ധിച്ച് ഇറാനും ഒമാനും തമ്മിൽ നിർണ്ണായക ചർച്ചകൾ നടത്തി. ഇരു രാജ്യങ്ങളുടെയും ഡെപ്യൂട്ടി വിദേശകാര്യ മന്ത്രിമാർ പങ്കെടുത്ത രണ്ട് ദിവസം നീണ്ട ചർച്ചകൾ ടെഹ്റാനിൽ വെച്ചാണ് പൂർത്തിയായതെന്ന് ഇറാൻ വിദേശകാര്യ മന്ത്രാലയ വക്താവ് ഇസ്മായിൽ ബഖായി ടെലിഗ്രാം സന്ദേശത്തിലൂടെ സ്ഥിരീകരിച്ചു.
സമഗ്രമായ ചർച്ചകൾ തികച്ചും ഫലപ്രദമായിരുന്നുവെന്നും ഇരു രാജ്യങ്ങളുടെയും പരമാധികാര അതിർത്തിയെയും അവകാശങ്ങളെയും മാനിച്ച്, ഹോർമൂസ് പാതയിലൂടെയുള്ള കപ്പൽ ഗതാഗത സുരക്ഷ കൈകാര്യം ചെയ്യുന്നതിനുള്ള സംയുക്ത തത്വങ്ങളെക്കുറിച്ചും പ്രവർത്തന രീതികളെക്കുറിച്ചും ഇരുപക്ഷവും കാഴ്ചപ്പാടുകൾ പങ്കുവെച്ചതായും ബഖായി വ്യക്തമാക്കി.
തടസ്സമില്ലാത്ത കപ്പൽ സർവീസുകൾക്കായി ചർച്ചകളിൽ പുരോഗതിയുണ്ടായിട്ടുണ്ടെങ്കിലും നിലവിൽ ഹോർമൂസ് സമുദ്രസന്ധിയിലൂടെയുള്ള സമുദ്ര ഗതാഗത പദവിയിൽ മാറ്റങ്ങളൊന്നുമില്ലെന്ന് അദ്ദേഹം അറിയിച്ചു. ഒമാൻ പ്രതിനിധി സംഘം മടങ്ങിയെങ്കിലും സാങ്കേതിക, രാഷ്ട്രീയ തലങ്ങളിലുള്ള കൂടിയാലോചനകൾ ഇരു രാജ്യങ്ങളും തുടർന്നു വരികയാണെന്ന് ഇറാൻ വ്യക്തമാക്കി.
