ടെഹ്റാൻ/വാഷിംഗ്ടൺ: അമേരിക്കയുമായി ദീർഘനാൾ നീണ്ടുനിൽക്കുന്ന സൈനിക പോരാട്ടത്തിൽ പിടിച്ചുനിൽക്കാൻ അമേരിക്കയേക്കാൾ കൂടുതൽ പ്രാപ്തി ഇറാന് ഉണ്ടായേക്കാമെന്ന് റിപ്പോർട്ട്. മുൻ യുഎസ് എയർഫോഴ്സ് കേണലും സിഎൻഎൻ മിലിട്ടറി അനലിസ്റ്റുമായ സെഡ്രിക് ലൈറ്റൺ ആണ് ഇങ്ങനെയൊരു വിലയിരുത്തൽ നടത്തിയത്. മാസങ്ങളായി യുഎസ് തുടർച്ചയായി ആക്രമണം നടത്തുന്നുണ്ടെങ്കിലും, തങ്ങളുടെ പക്കലുണ്ടായിരുന്ന ആയുധശേഖരത്തിന്റെ മൂന്നിൽ രണ്ട് ഭാഗവും സുരക്ഷിതമായി സൂക്ഷിക്കാൻ ഇറാന് സാധിച്ചിട്ടുണ്ടെന്നാണ് വിലയിരുത്തൽ.
യുഎസ് നടത്തുന്ന അതികൃത്യതയുള്ള ഹൈ-എൻഡ് ആയുധങ്ങൾ പുനഃസ്ഥാപിക്കാൻ വർഷങ്ങളെടുക്കുമെന്നിരിക്കെ, ഇറാന്റെ പക്കൽ ഇനിയും വൻതോതിലുള്ള മിസൈലുകളും ഡ്രോണുകളും റോക്കറ്റുകളും അവശേഷിക്കുന്നുണ്ട്. കമാൻഡ് ആൻഡ് കൺട്രോൾ കേന്ദ്രങ്ങളും ആയുധ സംഭരണശാലകളും തകർക്കാൻ അമേരിക്കയ്ക്ക് സാധിച്ചിട്ടുണ്ടെങ്കിലും, തിരിച്ചടി നൽകാനുള്ള ഇറാന്റെ ശേഷിയെ പൂർണ്ണമായി ഇല്ലാതാക്കാൻ ആക്രമണങ്ങൾക്ക് കഴിഞ്ഞിട്ടില്ല. ഇതുവരെ നടന്ന യുദ്ധത്തിൽ 1,400-ലധികം പാട്രിയറ്റ് ഇന്റർസെപ്റ്റർ മിസൈലുകൾ അമേരിക്ക ഉപയോഗിക്കേണ്ടി വന്നതായാണ് കണക്കാക്കുന്നത്.
ഈ കണക്കുകൾ ശരിയാണെങ്കിൽ, ആയുധശേഖരം വീണ്ടും നികത്തുന്നത് വരെ ലോകത്തിന്റെ മറ്റ് ഭാഗങ്ങളിൽ തങ്ങളുടെ സുരക്ഷാ പ്രതിരോധം ദുർബലമാകാൻ ഇത് കാരണമാകുമെന്ന് ലൈറ്റൺ മുന്നറിയിപ്പ് നൽകുന്നു. കഴിഞ്ഞ ദിവസം വൈറ്റ് ഹൗസിൽ നടന്ന നിർണ്ണായക യോഗത്തിൽ, ജോയിന്റ് ചീഫ്സ് ഓഫ് സ്റ്റാഫ് ചെയർമാൻ ജനറൽ ഡാൻ കെയ്നും യു.എസിന്റെ ആയുധശേഖരത്തിലുണ്ടാകുന്ന കുറവിനെക്കുറിച്ചും യുദ്ധം കൂടുതൽ വ്യാപിക്കുന്നതിലെ അപകടസാധ്യതകളെക്കുറിച്ചും ആശങ്ക പ്രകടിപ്പിച്ചിരുന്നു.
