ടെഹ്റാൻ: ആധുനിക സാങ്കേതികവിദ്യകളിൽ രാജ്യം നടത്തിയ നിക്ഷേപങ്ങൾ യുദ്ധസമയത്ത് ഇറാന്റെ പ്രതിരോധ ശേഷി മൂന്നിരട്ടിയായി വർദ്ധിപ്പിക്കാൻ സഹായിച്ചതായി ഇറാന്റെ ആക്ടിംഗ് പ്രതിരോധ മന്ത്രി മാജിദ് ഇബ്നു അൽ-റെസ വ്യക്തമാക്കി. ഇറാന്റെ ഔദ്യോഗിക വാർത്താ ഏജൻസിയായ തസ്നീം ആണ് പ്രതിരോധ മന്ത്രിയുടെ പ്രസ്താവന പുറത്തുവിട്ടത്. “ഇറാനിലെ പ്രതിഭകളും ആധുനിക സാങ്കേതികവിദ്യകളിൽ രാജ്യം നടത്തിയ നിക്ഷേപങ്ങളുമാണ് രാജ്യത്തിന്റെ പ്രതിരോധ ശക്തിയുടെ ഏറ്റവും പ്രധാനപ്പെട്ട ഘടകങ്ങളെന്ന് സമീപകാല യുദ്ധം തെളിയിച്ചിരിക്കുകയാണ്,” മാജിദ് ഇബ്നു അൽ-റെസ പറഞ്ഞു.
യുദ്ധം അതിന്റെ ഏറ്റവും കടുത്ത ഘട്ടത്തിൽ എത്തിയപ്പോൾ പോലും രാജ്യത്തെ പ്രതിരോധ ഉൽപ്പാദനങ്ങൾ തടസ്സപ്പെട്ടില്ലെന്ന് മാത്രമല്ല, ഡ്രോണുകളുടെ (പൈലറ്റില്ലാ വിമാനങ്ങൾ) ഉൽപ്പാദന ശേഷി മൂന്ന് മടങ്ങായി വർദ്ധിപ്പിക്കാൻ ഇറാന് സാധിച്ചതായും അദ്ദേഹം അവകാശപ്പെട്ടു. ശത്രുക്കളുടെ വ്യോമാക്രമണങ്ങളെയും ഉപരോധങ്ങളെയും അതിജീവിച്ച് ആഭ്യന്തരമായി ആയുധ ഉൽപ്പാദനം വർദ്ധിപ്പിക്കാൻ കഴിഞ്ഞത് ഇറാന്റെ സാങ്കേതിക മുന്നേറ്റത്തിന്റെ തെളിവാണെന്നാണ് മന്ത്രാലയത്തിന്റെ വിലയിരുത്തൽ.
