ഈസ്റ്റ് റതര്ഫോര്ഡ്: നോക്കൗട്ട് ഘട്ടത്തില് ഏറ്റവും കൂടുതല് ഗോളുകള് നേടുന്ന താരമെന്ന റിക്കാര്ഡ് ഫ്രാന്സിന്റെ കിലിയന് എംബാപ്പെയ്ക്ക് സ്വന്തം.സ്വീഡനെതിരെയുള്ള മത്സരത്തില് ഇരട്ടഗോള് നേടി ഫ്രാന്സിനെ 3-0ന് വിജയത്തിലേക്ക് നയിച്ച എംബാപ്പെ, ലോകകപ്പ് നോക്കൗട്ട് മത്സരങ്ങളില് ഏറ്റവും കൂടുതല് ഗോള് നേടിയ താരമെന്ന നേട്ടം സ്വന്തമാക്കി.
റിയല് മാഡ്രിഡ് താരമായ 28-കാരന് ഈ മത്സരത്തില് നേടിയ രണ്ട് ഗോളുകളോടെ ലോകകപ്പ് കരിയറിലെ ആകെ ഗോള്നേട്ടം 18 ആയി ഉയര്ത്തി. ഇതോടെ ജര്മന് ഇതിഹാസം മിറോസ്ലാവ് ക്ലോസെയെ മറികടന്ന് ലോകകപ്പ് ചരിത്രത്തിലെ എക്കാലത്തെയും മികച്ച ഗോള്വേട്ടക്കാരുടെ പട്ടികയില് മുന്നിലെത്തി.
അതിലും ശ്രദ്ധേയമായ നേട്ടം ലോകകപ്പ് നോക്കൗട്ട് മത്സരങ്ങളിലെ ഗോള് റെക്കോര്ഡാണ്. സ്വീഡനെതിരായ ഇരട്ടഗോളോടെ എംബാപ്പെയുടെ നോക്കൗട്ട് മത്സരങ്ങളിലെ ഗോള്നേട്ടം 10 ആയി. ഇതോടെ എട്ട് ഗോളുകള് വീതം നേടിയിരുന്ന ബ്രസീലിയന് ഇതിഹാസങ്ങളായ റൊണാള്ഡോ നസാരിയോയുടെയും ലിയോണിഡാസിന്റെയും റെക്കോര്ഡ് അദ്ദേഹം മറികടന്നു.ഈ പട്ടികയില് ഫ്രാന്സിന്റെ ജസ്റ്റ് ഫോണ്ടെയ്നും ബ്രസീലിന്റെ പെലെയും ഏഴ് ഗോളുകളുമായി തൊട്ടുപിന്നിലുണ്ട്.
ലോകകപ്പ് ചരിത്രത്തിലെ എക്കാലത്തെയും ഉയര്ന്ന ഗോള്വേട്ടക്കാരനായ അര്ജന്റീനയുടെ ലയണല് മെസി 19 ഗോളുകള് നേടിയിട്ടുണ്ടെങ്കിലും, നോക്കൗട്ട് മത്സരങ്ങളില് അദ്ദേഹത്തിന്റെ ഗോള്നേട്ടം അഞ്ചില് മാത്രമാണ്. പോര്ച്ചുഗല് സൂപ്പര്താരം ക്രിസ്റ്റ്യാനോ റൊണാള്ഡോയ്ക്ക് ലോകകപ്പ് നോക്കൗട്ട് മത്സരങ്ങളില് ഇതുവരെ ഒരു ഗോള് പോലും നേടാനായിട്ടില്ല.ഈ ലോകകപ്പില് എംബാപ്പെയുടെ ഗോള്നേട്ടം ആറായതോടെ ഗോള്ഡന് ബൂട്ട് പോരാട്ടത്തില് ലയണല് മെസിക്കൊപ്പവും അദ്ദേഹം എത്തി.സ്വീഡനെതിരായ മത്സരത്തില് മൈക്കല് ഒലിസെ ഒരുക്കിയ മൂന്ന് ഗോളവസരങ്ങള് പരമാവധി പ്രയോജനപ്പെടുത്തിയ എംബാപ്പെ, തന്റെ വേഗതയും കൃത്യമായ ഫിനിഷിങ്ങും കൊണ്ട് രണ്ട് തവണയും പന്ത് വലയിലെത്തിച്ചു.
‘നമ്മള് ഇപ്പോള് ഫുട്ബോള് ചരിത്രം നേരില് കാണുകയാണ്. മത്സരത്തിന് മുമ്പ് എംബാപ്പെ റെക്കോര്ഡുകളെക്കുറിച്ച് ചിന്തിക്കാറില്ല; പകരം കളത്തില് ലഭിക്കുന്ന ഇടങ്ങളെക്കുറിച്ചാണ് അദ്ദേഹം ചിന്തിക്കുന്നത്. എന്നാല് ലോകത്തിലെ ഏറ്റവും വലിയ വേദിയില് തുടര്ച്ചയായി മികവ് തെളിയിക്കാനുള്ള അദ്ദേഹത്തിന്റെ കഴിവ് അദ്ദേഹത്തെ തികച്ചും വ്യത്യസ്തമായൊരു തലത്തിലേക്ക് ഉയര്ത്തുന്നു,’ ഫ്രാന്സ് പരിശീലകന് ദിദിയര് ദെഷാം മത്സരശേഷം പറഞ്ഞു. സ്വീഡനെതിരേയുള്ള വിജയത്തോടെ ഫ്രാന്സ് ജൂലൈ 4ന് നടക്കുന്ന പ്രീക്വാര്ട്ടര് മത്സരത്തില് പരാഗ്വെയെ നേരിടും. പെനാല്റ്റി ഷൂട്ടൗട്ടില് ജര്മനിയെ അട്ടിമറിച്ചാണ് പരാഗ്വെ അടുത്ത റൗണ്ടിലെത്തിയത്.
Mbappe makes history at the World Cup; French superstar breaks Brazilian legends’ record for goals in the knockout round
