കനത്ത മഴയും റെഡ് അലേർട്ടും തുടരുന്ന സാഹചര്യത്തിൽ കോഴിക്കോട് ജില്ലയിൽ ക്വാറി പ്രവർത്തനം, മണ്ണെടുക്കൽ, ഖനനം, കിണർ നിർമാണം, മണലെടുപ്പ് എന്നിവ നിരോധിച്ച് ജില്ലാ കളക്ടർ എം.എസ് മാധവിക്കുട്ടി ഉത്തരവിട്ടു. കേന്ദ്ര കാലാവസ്ഥാ വകുപ്പ് തുടർച്ചയായി നാല് ദിവസം ഗ്രീൻ അലേർട്ട് പ്രഖ്യാപിക്കുന്നത് വരെയാണ് ഈ വിലക്ക് നിലനിൽക്കുക. കൂടാതെ, വെള്ളച്ചാട്ടങ്ങൾ, നദീതീരങ്ങൾ, ബീച്ചുകൾ തുടങ്ങിയ ജലാശയങ്ങളിലേക്കുള്ള പ്രവേശനവും അനിശ്ചിതകാലത്തേക്ക് തടഞ്ഞിട്ടുണ്ട്. ഉരുൾപൊട്ടൽ ഭീഷണിയുള്ള മലയോര മേഖലകളിലേക്കും ചുരം പ്രദേശങ്ങളിലേക്കും രാത്രി ഏഴ് മുതൽ രാവിലെ ഏഴ് വരെയുള്ള സമയങ്ങളിൽ അടിയന്തര ആവശ്യങ്ങൾക്കല്ലാത്ത യാത്രകൾ ഒഴിവാക്കാനും ദുരന്തനിവാരണ അതോറിറ്റി നിർദേശം നൽകി.
അറിയിപ്പ് ഇപ്രകാരം
ജില്ലയില് കനത്ത മഴ തുടരുന്നതിനാലും റെഡ് അലേര്ട്ട് പ്രഖ്യാപിച്ചതിനാലും ക്വാറികളുടെ പ്രവര്ത്തനം, മണ്ണെടുക്കല്, ഖനനം, കിണര് നിര്മാണ പ്രവര്ത്തനങ്ങള്, മണലെടുക്കല് എന്നിവ വിലക്കി ദുരന്ത നിവാരണ അതോറിറ്റി ചെയര്പേഴ്സണ് കൂടിയായ ജില്ലാ കലക്ടര് എം.എസ് മാധവിക്കുട്ടിയുടെ ഉത്തരവ്. കേന്ദ്ര കാലാവസ്ഥാ വകുപ്പ് തുടര്ച്ചയായ നാല് ദിവസം ഗ്രീന് അലേര്ട്ട് പ്രഖ്യാപിക്കുന്നത് വരെയാണ് വിലക്ക്. ദുരന്ത നിവാരണ നിയമം 2005ലെ സെക്ഷന് 26, 30 അടിസ്ഥാനത്തിലാണ് നടപടി. ജില്ലയില് വെള്ളച്ചാട്ടങ്ങള്, നദീതീരങ്ങള്, ബീച്ചുകള് ഉള്പ്പെടെ എല്ലാ ജലാശയങ്ങളിലേക്കുമുള്ള പ്രവേശനവും ഇനിയൊരറിയിപ്പുണ്ടാകുന്നത് വരെ നിരോധിച്ചു. ഉരുള്പൊട്ടല് ഭീഷണി നിലനില്ക്കുന്ന മലയോര പ്രദേശങ്ങള്, ചുരം മേഖലകള് എന്നിവിടങ്ങളിലേക്ക് രാത്രി ഏഴ് മുതല് രാവിലെ ഏഴ് വരെ അടിയന്തര യാത്രകള് അല്ലാത്തവ ഒഴിവാക്കണമെന്നും ഉത്തരവില് പറയുന്നു.
Mining and water body entry banned in Kozhikode district due to heavy rains
