കണ്ണൂർ പയ്യന്നൂരിൽ ഒന്നര വയസുകാരൻ ദേവാൻഷ് ശൗര്യ മരിച്ച സംഭവത്തിൽ നിർണായകമായ പോസ്റ്റ്മോർട്ടം റിപ്പോർട്ട് പുറത്തുവന്നു. ജനറൽ അനസ്തീഷ്യ നൽകിയതിനെ തുടർന്ന് കുട്ടിയുടെ തലച്ചോറിൽ ആവശ്യത്തിന് ഓക്സിജൻ ലഭിക്കാത്തതാണ് മരണകാരണമെന്ന് പരിയാരം മെഡിക്കൽ കോളേജിൽ നടത്തിയ പോസ്റ്റ്മോർട്ടത്തിൽ വ്യക്തമാക്കുന്നു. കുട്ടിയുടെ ചുണ്ടിലും താടിയിലുമുണ്ടായിരുന്ന മുറിവുകൾ ആഴത്തിലുള്ളതായിരുന്നില്ലെന്നും, അതിനാൽ ജനറൽ അനസ്തീഷ്യ നൽകിയുള്ള ശസ്ത്രക്രിയയുടെ യാതൊരു ആവശ്യവും ഉണ്ടായിരുന്നില്ലെന്നും റിപ്പോർട്ടിൽ ചൂണ്ടിക്കാട്ടുന്നുണ്ട്.
ചുണ്ടിലെയും താടിയിലെയും പരിക്കിന് ചികിത്സിക്കാനായി അനസ്തീഷ്യ നൽകി പത്ത് മിനിറ്റിനകം തന്നെ കുട്ടിയുടെ തലച്ചോറിലേക്കുള്ള രക്തയോട്ടം കുറയുകയായിരുന്നു. ഇതോടെ കുട്ടി പൂർണ്ണമായും ബോധരഹിതനാകുകയും തുടർന്ന് അഞ്ച് ദിവസത്തോളം ഗുരുതരാവസ്ഥയിൽ തുടർന്ന ശേഷമാണ് മരണം സംഭവിച്ചതെന്നും മെഡിക്കൽ റിപ്പോർട്ടുകൾ സ്ഥിരീകരിക്കുന്നു. ശസ്ത്രക്രിയയ്ക്കിടെ സംഭവിച്ച ഗുരുതരമായ മെഡിക്കൽ അനാസ്ഥയാണ് കുഞ്ഞിന്റെ ജീവൻ നഷ്ടപ്പെടുത്തിയത് എന്ന ആരോപണം ശരിവെക്കുന്നതാണ് നിലവിലെ കണ്ടെത്തലുകൾ.
ഡോക്ടർമാർക്കെതിരെ കേസ്; അന്വേഷണം വ്യാപിപ്പിച്ച് പോലീസ്
സംഭവത്തിൽ അനസ്തീഷ്യ നൽകിയ ഡോക്ടർ അഞ്ജലി പൊതുവാളിനെതിരെ പോലീസ് നിലവിൽ കേസെടുത്തിട്ടുണ്ട്. ഇവർക്ക് പുറമെ കുട്ടിയെ ചികിത്സിച്ച പീഡിയാട്രിഷ്യൻ ഡോ. ആശ നിർമ്മൽ, പ്ലാസ്റ്റിക് സർജൻ ഡോ. ആരതി എന്നിവരെയും പോലീസിന്റെ അന്വേഷണ പരിധിയിൽ ഉൾപ്പെടുത്തിയിട്ടുണ്ട്. ചികിത്സാ പിഴവ് സംബന്ധിച്ച പോസ്റ്റ്മോർട്ടം റിപ്പോർട്ട് ഔദ്യോഗികമായി പുറത്തുവന്നതോടെ വരും ദിവസങ്ങളിൽ ഡോക്ടർമാർക്കെതിരെയുള്ള നിയമനടപടികൾ കൂടുതൽ കർശനമാക്കാനാണ് പോലീസ് തീരുമാനം.
