കൊച്ചി: നീറ്റ് പരീക്ഷാ ക്രമക്കേടുകളുമായി ബന്ധപ്പെട്ട വിദ്യാർത്ഥി പ്രതിഷേധങ്ങൾ ശക്തമായ പശ്ചാത്തലത്തിൽ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെച്ചതിനെ സ്വാഗതം ചെയ്ത് സി.പി.എം ജനറൽ സെക്രട്ടറി എം.എ. ബേബി. വിദ്യാഭ്യാസ മന്ത്രിയുടെ രാജി രാജ്യത്തെ ബഹുജന പ്രക്ഷോഭങ്ങളുടെ ചരിത്രത്തിൽ ഒരു പുതിയ അധ്യായത്തിന് തുടക്കമിട്ടിരിക്കുകയാണെന്ന് അദ്ദേഹം വാർത്താസമ്മേളനത്തിൽ പറഞ്ഞു. രാജ്യത്തെ വിദ്യാഭ്യാസ രംഗം തകർത്ത മന്ത്രിയെ അവസാന നിമിഷം വരെ സംരക്ഷിക്കാനാണ് പ്രധാനമന്ത്രി നരേന്ദ്ര മോദി ശ്രമിച്ചതെന്നും അദ്ദേഹം വിമർശിച്ചു. ഡൽഹി ഒരു യുദ്ധക്കളത്തിന് സമാനമായ അന്തരീക്ഷത്തിലൂടെയാണ് കടന്നുപോകുന്നതെന്നും വിദ്യാർത്ഥികൾക്ക് നേരെയുണ്ടായ പോലീസ് അതിക്രമങ്ങളിൽ ജുഡീഷ്യൽ അന്വേഷണം വേണമെന്നും ബേബി ആവശ്യപ്പെട്ടു.
കേന്ദ്രമന്ത്രിയുടെ രാജിയോടെ ജന്ദർ മന്ദറിൽ നടന്നു വന്ന പ്രതിഷേധ സമരം അവസാനിപ്പിക്കാൻ സംയുക്ത സമരസമിതി ധാരണയിലെത്തിയിട്ടുണ്ട്. സമരത്തിൽ കോൺഗ്രസിന്റെ പങ്കിനെക്കുറിച്ച് ഇപ്പോൾ ചർച്ചചെയ്യേണ്ടതില്ലെന്നും വൈകിയാണെങ്കിലും പ്രതിപക്ഷ നേതാവ് രാഹുൽ ഗാന്ധി നടത്തിയ ഇടപെടലുകളെ സ്വാഗതം ചെയ്യുന്നുവെന്നും എം.എ. ബേബി വ്യക്തമാക്കി. രാഹുൽ ഇതുവരെ ജന്ദർ മന്ദർ സന്ദർശിച്ചിട്ടില്ലെങ്കിലും ഒരു ഘട്ടം കഴിഞ്ഞപ്പോൾ സമരത്തിന്റെ ഭാഗമായി രംഗത്തെത്തിയത് ശ്രദ്ധേയമാണ്. രാഷ്ട്രീയ പ്രവർത്തനത്തിൽ കഴിവും പ്രതിബദ്ധതയുമുള്ളവർക്ക് പ്രായം ഒരു തടസ്സമല്ലെന്ന് ചൂണ്ടിക്കാട്ടിയ അദ്ദേഹം, 72-ാം വയസ്സിലും താൻ പ്രക്ഷോഭത്തിൽ നേരിട്ട് പങ്കാളിയായ കാര്യം ഓർമ്മിപ്പിച്ചു.
വിവിധ വിഷയങ്ങളിൽ പാർട്ടികളും നേതാക്കളും നിലവിൽ സ്വീകരിക്കുന്ന നിലപാടുകളുടെ അടിസ്ഥാനത്തിലാണ് പിന്തുണ തീരുമാനിക്കുന്നതെന്നും ഭാവിയിലെ നിലപാടുകളെക്കുറിച്ച് ഇപ്പോൾ പറയാൻ കഴിയില്ലെന്നും സി.പി.എം ജനറൽ സെക്രട്ടറി പറഞ്ഞു. മുൻപ് ആലപ്പുഴയിൽ പിണറായി വിജയന് വേണ്ടി ഗൺമാൻമാർ നടത്തിയ ‘രക്ഷാപ്രവർത്തനവും’ ജന്ദർ മന്ദറിലെ വിദ്യാർത്ഥി സമരവും തമ്മിൽ യാതൊരു രീതിയിലും താരതമ്യം ചെയ്യാൻ കഴിയില്ലെന്നും മാധ്യമപ്രവർത്തകരുടെ ചോദ്യങ്ങൾക്ക് മറുപടിയായി അദ്ദേഹം പറഞ്ഞു. പരീക്ഷാ അട്ടിമറിക്ക് കാരണക്കാരായ യഥാർത്ഥ കുറ്റക്കാർക്കെതിരെ ശക്തമായ നടപടി വേണമെന്നും സുപ്രീം കോടതിയുടെ ചില പരാമർശങ്ങൾ സമരം കൂടുതൽ ആളിക്കത്താൻ കാരണമായെന്നും അദ്ദേഹം കൂട്ടിച്ചേർത്തു.
