മെഡോറ: യുഎസ് സംസ്ഥാനമായ നോർത്ത് ഡക്കോട്ടയിൽ പുതുതായി നിർമ്മിച്ച തിയോഡോർ റൂസ്വെൽറ്റ് പ്രസിഡൻഷ്യൽ ലൈബ്രറിയുടെ സമർപ്പണ ചടങ്ങിൽ പങ്കെടുത്തു സംസാരിക്കവെ ആഗോള സുരക്ഷയെയും പ്രത്യയശാസ്ത്രങ്ങളെയും കുറിച്ച് പരാമർശങ്ങളുമായി അമേരിക്കൻ പ്രസിഡന്റ് ഡോണൾഡ് ട്രംപ്. സ്പാനിഷ്-അമേരിക്കൻ യുദ്ധകാലത്തെ സൈനികരുടെ വേഷമണിഞ്ഞ പുനരാവിഷ്കർത്താക്കളുടെ സാന്നിധ്യത്തിൽ നടന്ന ചടങ്ങിലാണ് ട്രംപ് പ്രസംഗിച്ചത്.
ഹോർമുസ് കടലിടുക്കിലൂടെ നിലവിൽ റെക്കോർഡ് എണ്ണം കപ്പലുകൾ സഞ്ചരിക്കുന്നുണ്ടെന്ന് ചൂണ്ടിക്കാണിച്ച അദ്ദേഹം, ഇന്നത്തെ ലോകം നേരിടുന്ന ഏറ്റവും വലിയ ഭീഷണി കമ്മ്യൂണിസമാണെന്ന് തുറന്നടിച്ചു. അമേരിക്കയുടെ മുൻ പ്രസിഡന്റ് തിയോഡോർ റൂസ്വെൽറ്റിന്റെ ധീരമായ നേതൃത്വത്തെയും ഭരണനേട്ടങ്ങളെയും പ്രകീർത്തിച്ച ട്രംപ്, തന്നെയും റൂസ്വെൽറ്റുമായി ഉപമിച്ചാണ് സംസാരിച്ചത്.
അമേരിക്കയുടെ 250-ാം സ്വാതന്ത്ര്യദിന ആഘോഷങ്ങളുടെ ഭാഗമായാണ് മെഡോറയിലെ ഈ ചരിത്രപ്രധാനമായ മ്യൂസിയം പൊതുജനങ്ങൾക്കായി തുറന്നുകൊടുത്തത്. റൂസ്വെൽറ്റിന് ലഭിച്ച പരമോന്നത സൈനിക ബഹുമതിയായ ‘മെഡൽ ഓഫ് ഓണർ’ ഈ ലൈബ്രറിക്ക് ട്രംപ് സമ്മാനമായി നൽകി. അമേരിക്കയുടെ പടിഞ്ഞാറൻ അതിർത്തി വികസനത്തിന്റെയും വന്യജീവി സംരക്ഷണത്തിന്റെയും പാരമ്പര്യം വിളിച്ചോതുന്ന ഈ വലിയ ലൈബ്രറി സമുച്ചയം സന്ദർശിക്കുന്ന ആദ്യത്തെ ഔദ്യോഗിക അതിഥിയും ട്രംപായിരുന്നു.
