ടെഹ്റാൻ: കൊല്ലപ്പെട്ട ഇറാന്റെ പരമോന്നത നേതാവ് ആയത്തുള്ള അലി ഖമേനിയുടെ വിലാപയാത്രയിൽ അമേരിക്കൻ പ്രസിഡന്റ് ഡോണൾഡ് ട്രംപിനെതിരെ കടുത്ത ജനരോഷവും വധഭീഷണിയുമുയർത്തി ഇറാൻ. ടെഹ്റാനിൽ ഭരണകൂടം സംഘടിപ്പിച്ച ലക്ഷക്കണക്കിന് ആളുകൾ പങ്കെടുത്ത വൻ വിലാപയാത്രയിൽ, ഹജ്ജ് കർമ്മങ്ങളിലെ ‘പിശാചിനെ കല്ലെറിയൽ’ ചടങ്ങിന് സമാനമായ രീതിയിൽ ഡോണൾഡ് ട്രംപിന്റെ ചിത്രത്തിന് നേരെ ജനക്കൂട്ടം കല്ലെറിഞ്ഞ് പ്രതിഷേധിച്ചു.
ഇറാന്റെ ഔദ്യോഗിക വാർത്താ ഏജൻസിയായ മീസാൻ പുറത്തുവിട്ട ദൃശ്യങ്ങളിലാണ് പ്രതികാര ബുദ്ധിയോടെയുള്ള ഈ പ്രതീകാത്മക ചടങ്ങ് ലോകം കണ്ടത്. ഇറാന്റെ ദേശീയ പതാകകളും അന്തരിച്ച നേതാവിന്റെ ചിത്രങ്ങളുമേന്തി കുട്ടികളടക്കമുള്ള വലിയൊരു ജനസഞ്ചയമാണ് തലസ്ഥാന നഗരിയിലെ തെരുവുകളിൽ തടിച്ചുകൂടിയത്. അമേരിക്കൻ വിരുദ്ധ മുദ്രാവാക്യങ്ങളാൽ പ്രകമ്പനം കൊണ്ട തെരുവിൽ, ട്രംപിന്റെ മുഖമുള്ള ‘വാണ്ടഡ്’ പോസ്റ്ററും “ട്രംപിനെ വധിക്കുക” എന്ന പ്ലക്കാർഡുമേന്തി ഒരു സ്ത്രീ നടത്തിയ പ്രതിഷേധം വലിയ ശ്രദ്ധയാകർഷിച്ചു.
ഖമേനിയുടെ മരണത്തിന് പ്രതികാരം ചെയ്യുന്നവർക്ക് ‘കൊലപാതക പ്രതിഫലം’ എന്ന രീതിയിൽ ജീവനോടെയോ അല്ലാതെയോ ട്രംപിനെ പിടിച്ചുകൊടുക്കുന്നവർക്ക് 20,000,000 ഡോളർ (രണ്ട് കോടി ഡോളർ) സമ്മാനമായി നൽകുമെന്നും ഈ പോസ്റ്ററുകളിൽ രേഖപ്പെടുത്തിയിരുന്നു. 1979-ലെ ഇസ്ലാമിക വിപ്ലവം മുതൽ ഇറാനിൽ യുഎസ് വിരുദ്ധ പ്രകടനങ്ങളും പതാക കത്തിക്കലും പതിവാണെങ്കിലും, ഇത്തവണ ഖമേനിയുടെ മരണത്തിന് കാരണക്കാരായ ട്രംപിന്റെ യുദ്ധക്കൊതിയന്മാരായ ഉപദേശകരുടെ പട്ടിക തയ്യാറാക്കി അവരെയും വധിക്കാൻ വിലാപയാത്രയിൽ പങ്കെടുത്തവർ ആഹ്വാനം ചെയ്തു. പശ്ചിമേഷ്യയിൽ യുദ്ധസമാനമായ അന്തരീക്ഷം നിലനിൽക്കുന്ന സാഹചര്യത്തിൽ ഈ പ്രതിഷേധം അന്താരാഷ്ട്ര തലത്തിൽ വലിയ നയതന്ത്ര ചർച്ചകൾക്ക് വഴിവെച്ചിരിക്കുകയാണ്.
