ലോക ഫുട്ബോൾ ഇതിഹാസവും അർജന്റീനയുടെ നായകനുമായ ലയണൽ മെസ്സി അന്താരാഷ്ട്ര ഫുട്ബോളിൽ നിന്ന് വിരമിക്കൽ പ്രഖ്യാപിച്ചു. 39-ാം വയസ്സിൽ, 21 വർഷം നീണ്ടുനിന്ന തിളക്കമാർന്ന കരിയറിനാണ് മെസ്സി വിരാമമിടുന്നത്.അർജന്റീനയ്ക്കായി 207 മത്സരങ്ങളിൽ നിന്ന് 125 ഗോളുകൾ നേടിയാണ് താരം പടിയിറങ്ങുന്നത്. 2022 ലോകകപ്പിൽ ടീമിനെ കിരീടത്തിലേക്ക് നയിച്ച മെസ്സി, 2014, 2026 ലോകകപ്പുകളിൽ അർജന്റീനയെ ഫൈനലിൽ എത്തിക്കുകയും 2008 ബെയ്ജിംഗ് ഒളിമ്പിക്സിൽ സ്വർണം നേടുകയും ചെയ്തിട്ടുണ്ട്.
ലോകകപ്പ് ഫൈനൽ കഴിഞ്ഞ് രണ്ടാം നാൾ തന്നെ വിരമിക്കുന്നതിനെക്കുറിച്ച് ആലോചിച്ചിരുന്നുവെന്ന് മെസ്സി വ്യക്തമാക്കി. കിരീടങ്ങൾ നേടിയ നാളുകളിൽ മാത്രമല്ല, അതിന് മുൻപും ടീമിനായി തന്റെ സർവ്വസ്വവും നൽകിയാണ് കളിച്ചതെന്നും രാജ്യത്തിനായി ഇനി നൽകാൻ ഒന്നുമില്ലെന്നും താരം വൈകാരികമായി കുറിച്ചു. അർജന്റീനക്കാരനായി ജനിപ്പിച്ചതിന് ദൈവത്തിന് നന്ദി പറഞ്ഞ മെസ്സി, വലിയ അഭിമാനത്തോടും മനസ്സമാധാനത്തോടുമാണ് പടിയിറങ്ങുന്നതെന്ന് അറിയിച്ചു.
കുട്ടിക്കാലത്ത് സ്വപ്നം കണ്ട അവിസ്മരണീയ നിമിഷങ്ങൾ സമ്മാനിച്ചതിന്റെ വലിയ സന്തോഷത്തോടെയും സംതൃപ്തിയോടെയുമാണ് താൻ കളമൊഴിയുന്നതെന്ന് മെസ്സി കൂട്ടിച്ചേർത്തു. അർജന്റീന ദേശീയ ടീമിലെ തന്റെ അധ്യായം അവസാനിപ്പിക്കുന്നത് ഏറെ വേദനയോടെയാണെങ്കിലും പുതിയ തലമുറയ്ക്ക് അവസരം നൽകേണ്ട സമയം എത്തിയിരിക്കുന്നുവെന്ന ബോധ്യത്തോടെയാണ് ഈ തീരുമാനമെന്നും മെസ്സി വ്യക്തമാക്കി.
