വാഷിംഗ്ടണ്‍: യുഎസ് പ്രസിഡന്റ് ഡൊണാള്‍ഡ് ട്രംപിന്റെ കടുത്ത വിമര്‍ശകയും ഡെമോക്രാറ്റിക് പാര്‍ട്ടി ജനപ്രതിനിധിയുമായ ഇല്‍ഹാന്‍ ഒമറിന്റെ വീട്ടില്‍ ഫെഡറല്‍ ഏജന്‍സികള്‍ പരിശോധന നടത്തി. ക്രിമിനല്‍ അന്വേഷണത്തിന്റെ ഭാഗമായാണ് തിങ്കളാഴ്ച പരിശോധന നടത്തിയതെന്നാണ് റിപ്പോര്‍ട്ട്. സംഭവത്തിനെതിരെ രംഗത്തെത്തിയ ഒമര്‍, രാഷ്ട്രീയ എതിരാളികളെ ലക്ഷ്യമിടാനും ഫെഡറല്‍ നിയമപാലന സംവിധാനത്തെ രാഷ്ട്രീയ ആവശ്യങ്ങള്‍ക്കായി ദുരുപയോഗം ചെയ്യാനുമുള്ള ശ്രമമാണിതെന്ന് ആരോപിച്ചു. തന്നെ നിശ്ശബ്ദയാക്കാന്‍ കഴിയില്ലെന്നും അവര്‍ വ്യക്തമാക്കി.
അടുത്ത മാസം നടക്കുന്ന ഇടക്കാല തെരഞ്ഞെടുപ്പിന് മുന്നോടിയായി പരിശോധന നടന്നത് യുഎസ് രാഷ്ട്രീയത്തില്‍ വലിയ വിവാദത്തിന് വഴിവെച്ചിട്ടുണ്ട്. ജനപ്രതിനിധിസഭയുടെയും സെനറ്റിന്റെയും നിയന്ത്രണം നിര്‍ണയിക്കുന്ന തെരഞ്ഞെടുപ്പില്‍ വീണ്ടും മത്സരിക്കുന്ന ഒമറിന്റെ വീട്ടില്‍ പരിശോധന നടത്താന്‍ തെരഞ്ഞെടുത്ത സമയത്തെ മുതിര്‍ന്ന ഡെമോക്രാറ്റിക് നേതാക്കള്‍ ചോദ്യം ചെയ്തു. തെരഞ്ഞെടുപ്പിന് തൊട്ടുമുമ്പുള്ള കാലയളവില്‍ സ്ഥാനാര്‍ഥികളെ ബാധിക്കുന്ന അന്വേഷണ നടപടികള്‍ പരസ്യമായി സ്വീകരിക്കുന്നത് ഒഴിവാക്കണമെന്ന നീതിന്യായ വകുപ്പിന്റെ ദീര്‍ഘകാല കീഴ്വഴക്കവും അവര്‍ ചൂണ്ടിക്കാട്ടി. എന്നാല്‍ അന്വേഷണം ഏത് വിഷയത്തെക്കുറിച്ചാണെന്നോ പരിശോധനയ്ക്ക് പിന്നിലെ കൃത്യമായ കാരണമെന്താണെന്നോ അധികൃതര്‍ വ്യക്തമാക്കിയിട്ടില്ല.
ഹോംലാന്‍ഡ് സെക്യൂരിറ്റി ഇന്‍വെസ്റ്റിഗേഷന്‍സ് (എച്ച്എസ്‌ഐ) വിഭാഗത്തിലെ ഉദ്യോഗസ്ഥരാണ് പരിശോധന നടത്തിയത്. വാഷിങ്ടണ്‍ ഡിസി മേഖലയിലെ നിലവിലുള്ള ഫെഡറല്‍ ക്രിമിനല്‍ അന്വേഷണവുമായി ബന്ധപ്പെട്ട് കോടതി അംഗീകരിച്ച പരിശോധനാ വാറണ്ട് നടപ്പാക്കിയതാണെന്ന് യുഎസ് നീതിന്യായ വകുപ്പ് അറിയിച്ചു. പരിശോധനയ്ക്കിടെ തെളിവുകളായി പിടിച്ചെടുത്ത വസ്തുക്കള്‍ എന്ന ലേബലുള്ള പെട്ടികള്‍ ഉദ്യോഗസ്ഥര്‍ പുറത്തേക്ക് കൊണ്ടുപോകുന്നതും കണ്ടതായി റിപ്പോര്‍ട്ടുകള്‍ പറയുന്നു. ഒമറിന്റെ കുടുംബത്തിന്റെ കുടിയേറ്റ രേഖകളുമായി ബന്ധപ്പെട്ട് തട്ടിപ്പ് നടന്നിട്ടുണ്ടോയെന്ന സംശയം പരിശോധിക്കുന്ന അന്വേഷണമാണ് നടക്കുന്നതെന്ന് ഹോംലാന്‍ഡ് സെക്യൂരിറ്റി സെക്രട്ടറി മാര്‍ക്ക്വെയ്ന്‍ മുള്ളന്‍ കഴിഞ്ഞ മാസം സൂചിപ്പിച്ചിരുന്നു. എന്നാല്‍ കുടിയേറ്റ തട്ടിപ്പ് സംബന്ധിച്ച ആരോപണങ്ങള്‍ ഒമര്‍ നിഷേധിച്ചിട്ടുണ്ട്.
ഒമറിന്റെ വംശീയ പശ്ചാത്തലത്തെ പരാമര്‍ശിച്ചും ട്രംപ് വിമര്‍ശനം ഉന്നയിച്ചു. ഒഹായോയില്‍ നടന്ന രാഷ്ട്രീയ റാലിയില്‍ സോമാലിയയില്‍നിന്നുള്ള ഒമറിന്റെ പശ്ചാത്തലത്തെ അധിക്ഷേപിക്കുന്ന പരാമര്‍ശങ്ങള്‍ നടത്തിയ ട്രംപ പരിശോധനയുമായി തനിക്ക് ബന്ധമില്ലെന്നും വിഷയം നീതിന്യായ വകുപ്പിന്റെ പരിധിയിലാണെന്നും പിന്നീട് മാധ്യമങ്ങളോട് പറഞ്ഞു. അതേസമയം, ഒമറിനെതിരായ നീക്കത്തെ രാഷ്ട്രീയ പകപോക്കലായി വിശേഷിപ്പിച്ച ഡെമോക്രാറ്റിക് നേതാക്കള്‍, തെരഞ്ഞെടുപ്പിന് തൊട്ടുമുമ്പ് ജനപ്രതിനിധിയെയും കുടുംബത്തെയും ലക്ഷ്യമിടുന്നത് അംഗീകരിക്കാനാകില്ലെന്ന് വ്യക്തമാക്കി. ഒമറിനെതിരായ ആരോപണങ്ങള്‍ തെളിയിക്കപ്പെട്ട കുറ്റങ്ങളായി കാണാനാകില്ലെന്നും അന്വേഷണം സംബന്ധിച്ച ഔദ്യോഗിക വിവരങ്ങള്‍ പുറത്തുവരേണ്ടതുണ്ടെന്നും റിപ്പോര്‍ട്ടില്‍ വ്യക്തമാകുന്നു.
2018-ല്‍ ആദ്യമായി യുഎസ് ജനപ്രതിനിധിസഭയിലേക്ക് തെരഞ്ഞെടുക്കപ്പെട്ട ഇല്‍ഹാന്‍ ഒമര്‍ മിനസോട്ടയിലെ അഞ്ചാം കോണ്‍ഗ്രസ് മണ്ഡലത്തെയാണ് പ്രതിനിധീകരിക്കുന്നത്. സോമാലിയയിലെ ആഭ്യന്തരയുദ്ധത്തെത്തുടര്‍ന്ന് എട്ടാം വയസ്സില്‍ കുടുംബത്തോടൊപ്പം രാജ്യം വിട്ട അവര്‍, കെനിയയിലെ അഭയാര്‍ഥി ക്യാംപില്‍ നാലുവര്‍ഷം ചെലവഴിച്ചശേഷം 1990-കളില്‍ യുഎസിലെത്തി. കോണ്‍ഗ്രസിലെ പുരോഗമന നിലപാടുകള്‍ക്ക് പേരുകേട്ട നേതാക്കളിലൊരാളായ ഒമര്‍, ട്രംപിന്റെയും റിപ്പബ്ലിക്കന്‍ നേതാക്കളുടെയും നിരന്തര വിമര്‍ശനങ്ങള്‍ക്ക് വിധേയയായിട്ടുണ്ട്. കുടിയേറ്റ രേഖകളെയും വിവാഹത്തെയും ചുറ്റിപ്പറ്റിയുള്ള ആരോപണങ്ങള്‍ അവര്‍ നേരത്തെയും നിഷേധിച്ചിരുന്നു. നിലവിലെ അന്വേഷണത്തിന്റെ ഫലമോ ആരോപണങ്ങളില്‍ ഏതെങ്കിലും കുറ്റം തെളിയിക്കപ്പെട്ടിട്ടുണ്ടോയെന്നോ സംബന്ധിച്ച ഔദ്യോഗിക സ്ഥിരീകരണം ലഭ്യമായിട്ടില്ല.
Federal agencies search the home of US Representative and Trump critic Ilhan Omar; Ilhan responds that she cannot be silenced.
