കാലിഫോർണിയ: അമേരിക്കയിലെ കാലിഫോർണിയയിലുള്ള റിവർസൈഡ് കൗണ്ടിയിൽ തരിശുഭൂമിയിൽ യുവതിയുടെ മൃതദേഹം കണ്ടെത്തിയ സംഭവത്തിൽ 40-കാരനെ പോലീസ് അറസ്റ്റ് ചെയ്തു. ഹെമറ്റ് സ്വദേശിനിയായ ജെസ്സിക്ക റോഡ്രിഗസ് (43) ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് ഇതേ പ്രദേശവാസിയായ ജോസഫ് റെയ്നി (40) എന്നയാളെ റിവർസൈഡ് കൗണ്ടി ഷെരീഫ് വിഭാഗം കസ്റ്റഡിയിലെടുത്തു.
ഒക്ടോബർ 23-ന് അൻസയിലെ ബാറ്റിസ്റ്റ കാന്യോൺ റോഡിനും വില്ലിസ് റോഡിനും സമീപത്തുനിന്നാണ് ജെസ്സിക്കയുടെ മൃതദേഹം കണ്ടെത്തുന്നത്. തുടർന്ന് നടത്തിയ പോസ്റ്റ്‌മോർട്ടം പരിശോധനയിലാണ് ഇത് കൊലപാതകമാണെന്ന് വ്യക്തമായത്. റിവർസൈഡ് ഷെരീഫിന്റെ സെൻട്രൽ ഹോമിസൈഡ് യൂണിറ്റ് നടത്തിയ അന്വേഷണത്തിനൊടുവിൽ പ്രതിയായ റെയ്നിയെ സ്റ്റേറ്റ് സ്ട്രീറ്റിലെ 1400 ബ്ലോക്കിൽ വെച്ച് അധികൃതർ അറസ്റ്റ് ചെയ്യുകയായിരുന്നു.
പ്രതിയുടെ വസതിയിൽ നടത്തിയ തെരച്ചിലിൽ കേസിന് ആസ്പദമായ നിരവധി സുപ്രധാന തെളിവുകൾ അന്വേഷണ സംഘം പിടിച്ചെടുത്തു. കൊലപാതക കുറ്റം ചുമത്തി പ്രതിയെ നിലവിൽ കൊയ്‌സ് ബേർഡ് ഡിറ്റൻഷൻ സെന്ററിൽ പാർപ്പിച്ചിരിക്കുകയാണ്. സംഭവം സംബന്ധിച്ച് കൂടുതൽ വിവരങ്ങൾ നൽകാൻ കഴിയുന്നവർ അന്വേഷണ ഉദ്യോഗസ്ഥനായ ഡാനിയൽ ഡിമാജിയോയുമായി (951-955-2777) ബന്ധപ്പെടണമെന്ന് പോലീസ് അഭ്യർത്ഥിച്ചു.
