വാഷിംഗ്ടണ്‍: നവംബറില്‍ നടക്കുന്ന മിഡ്ടേം തിരഞ്ഞെടുപ്പിന് മുന്നോടിയായി രാഷ്ട്രീയ പരസ്യങ്ങള്‍ക്കായി ഇനി സ്വന്തം പണം ചെലവഴിക്കുമെന്ന് യുഎസ് പ്രസിഡന്റ് ഡൊണാള്‍ഡ് ട്രംപ്. നികുതിദായകരുടെ പണം ഉപയോഗിച്ച് തന്നെ പ്രോത്സാഹിപ്പിക്കുന്ന ടെലിവിഷന്‍ പരസ്യങ്ങള്‍ നല്‍കിയെന്ന വിമര്‍ശനം ശക്തമായതിനു പിന്നാലെയാണ് ട്രംപിന്റെ പുതിയ പ്രഖ്യാപനം. നേരത്തെ സര്‍ക്കാര്‍ ഫണ്ട് ഉപയോഗിച്ചുള്ള പരസ്യങ്ങളെ ശക്തമായി ന്യായീകരിച്ചിരുന്ന ട്രംപ് ഇതോടെ നിലപാട് മാറ്റുകയായിരുന്നു.
ട്രംപിനെയും വൈറ്റ് ഹൗസിനെയും ലക്ഷ്യമിട്ട് പരസ്യങ്ങള്‍ക്കെതിരെ ഡമോക്രാറ്റിക്, റിപ്പബ്ലിക്കന്‍ പാര്‍ട്ടികളില്‍നിന്നും വിമര്‍ശനം ഉയര്‍ന്നിരുന്നു. മുന്‍ പ്രസിഡന്റുമാരും സമാനമായ രീതിയില്‍ രാജ്യസ്‌നേഹവുമായി ബന്ധപ്പെട്ട പൊതു സേവന അറിയിപ്പുകള്‍ നടത്തിയിട്ടുണ്ടെന്നും അതിനാല്‍ നിലവിലെ പരസ്യങ്ങളും അതേ വിഭാഗത്തില്‍പ്പെടുന്നതാണെന്നുമായിരുന്നു വൈറ്റ് ഹൗസിന്റെയും ട്രംപിന്റെയും വാദം. എന്നാല്‍ പരസ്യങ്ങള്‍ രാഷ്ട്രീയ നേട്ടത്തിനായി ഉപയോഗിക്കുന്നുവെന്ന വിമര്‍ശനം ഡെമോക്രാറ്റുകള്‍ക്കൊപ്പം റിപ്പബ്ലിക്കന്‍ പാര്‍ട്ടിയിലെ ചിലരില്‍നിന്നും ഉയര്‍ന്നു.
ഇതിന് പിന്നാലെയാണ് പരസ്യങ്ങളുടെ ചെലവ് താന്‍ തന്നെ വഹിക്കുമെന്ന് ട്രംപ് തിങ്കളാഴ്ച ട്രൂത്ത് സോഷ്യലിലൂടെ അറിയിച്ചത്. സാധാരണ ഇത്തരം കാര്യങ്ങള്‍ സര്‍ക്കാര്‍ ഫണ്ട് ഉപയോഗിച്ച് ചെയ്യുന്നതാണെങ്കിലും, വിമര്‍ശകരെ തൃപ്തിപ്പെടുത്താന്‍ യാതൊന്നിനും കഴിയില്ലെന്നും അതിനാല്‍ രാജ്യസ്‌നേഹപരമായ പരസ്യങ്ങള്‍ ഉള്‍പ്പെടെയുള്ളവയ്ക്ക് താന്‍ തന്നെ പണം നല്‍കാന്‍ തീരുമാനിച്ചെന്നും ട്രംപ് പറഞ്ഞു.
MAGA പ്രചാരണത്തിനായി താന്‍ സമാഹരിച്ച പണത്തില്‍ നിന്നായിരിക്കും പരസ്യങ്ങള്‍ക്കുള്ള ചെലവ് വഹിക്കുകയെന്നും ട്രംപ് വ്യക്തമാക്കി. അതേസമയം, സര്‍ക്കാര്‍ സംവിധാനങ്ങളും പൊതുഫണ്ടും ഉപയോഗിച്ച് നടത്തുന്ന രാഷ്ട്രീയ പ്രചാരണത്തിന്റെ പരിധി സംബന്ധിച്ച ചര്‍ച്ചകള്‍ക്ക് ട്രംപിന്റെ പുതിയ തീരുമാനം കൂടുതല്‍ ശ്രദ്ധ നേടുകയാണ്.
നവംബറിലെ മിഡ്ടേം തിരഞ്ഞെടുപ്പ് യുഎസ് രാഷ്ട്രീയത്തില്‍ നിര്‍ണായകമാകാനിരിക്കെയാണ് പരസ്യങ്ങളെച്ചൊല്ലിയുള്ള വിവാദം. കോണ്‍ഗ്രസിലെ അധികാര സന്തുലനം നിര്‍ണയിക്കുന്ന തിരഞ്ഞെടുപ്പിന് മുന്നോടിയായി ട്രംപിന്റെ രാഷ്ട്രീയ പ്രചാരണവും ധനസമാഹരണവും കൂടുതല്‍ ശ്രദ്ധ നേടുകയാണ്. സ്വന്തം ഫണ്ട് ഉപയോഗിച്ചുള്ള പരസ്യപ്രചാരണത്തിലേക്ക് മാറാനുള്ള ട്രംപിന്റെ തീരുമാനം വരും ദിവസങ്ങളില്‍ രാഷ്ട്രീയമായി എങ്ങനെ പ്രതികരിക്കപ്പെടുമെന്ന് ഉറ്റുനോക്കുകയാണ്.
Trump responds to the controversy over the use of tax money for advertisements: Says he will spend his own money on political ads from now on.
