വാഷിങ്ടണ്‍: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ വ്യക്തിപ്രഭാവത്തിനു വലിയ മങ്ങല്‍ ഏല്‍പ്പിച്ച് ഇടക്കാല തിരഞ്ഞെടുപ്പില്‍ റിപ്പബ്ലിക്കന്‍ പാര്‍ട്ടിക്ക് അപ്രതീക്ഷിത നഷ്ടങ്ങള്‍. സെനറ്റിലും ജനപ്രതിനിധി സഭയിലും ഡെമോക്രാറ്റുകള്‍ മുന്നേറ്റം നടത്തിയതോടെ കോണ്‍ഗ്രസിലെ അധികാര സമവാക്യങ്ങളില്‍ മാറ്റമുണ്ടായി. റിപ്പബ്ലിക്കന്‍ പാര്‍ട്ടിയുടെ ശക്തികേന്ദ്ര ങ്ങളിലൊന്നായ ടെക്‌സസില്‍ 32 വര്‍ഷമായി തുടര്‍ന്നുവന്ന പാര്‍ട്ടിയുടെ ആധിപത്യം അവസാനിപ്പിച്ച് ഡെമോക്രാറ്റുകള്‍ വിജയം നേടിയതും ശ്രദ്ധേയമായി.
ട്രംപിന്റെ രണ്ടാം ഭരണകാലത്തെക്കുറിച്ചുള്ള ജനവിധിയായാണ് തിരഞ്ഞെടുപ്പ് വിലയിരുത്തപ്പെടുന്നത്. ജീവിതച്ചെലവിലെ വര്‍ധന, ഇറക്കുമതി തീരുവ, ഇറാനുമായുള്ള അമേരിക്കയുടെ യുദ്ധം തുടങ്ങിയ വിഷയങ്ങളിലെ ജനങ്ങളുടെ അതൃപ്തിയും തിരഞ്ഞെടുപ്പില്‍ പ്രതിഫലിച്ചതായാണ് വിലയിരുത്തല്‍.
തിരഞ്ഞെടുപ്പ് പ്രചാരണത്തിനിടെ വോട്ടര്‍മാര്‍ താന്‍ തന്നെയാണ് ബാലറ്റിലുള്ളതെന്ന് കരുതി വോട്ട് ചെയ്യണമെന്ന് ട്രംപ് ആവര്‍ത്തിച്ച് ആവശ്യപ്പെട്ടിരുന്നു. എന്നാല്‍ ഈ തന്ത്രം റിപ്പബ്ലിക്കന്‍ പാര്‍ട്ടിക്ക് അനുകൂലമായ ഫലം നല്‍കിയില്ല. ഡെമോക്രാറ്റുകളുടെ നിയന്ത്രണത്തിലുള്ള കോണ്‍ഗ്രസ് പാസാക്കുന്ന ബില്ലുകള്‍ വീറ്റോ അധികാരം ഉപയോഗിച്ച് തടയുമെന്ന് ട്രംപ് നേരത്തെ വ്യക്തമാക്കിയിരുന്നു. തിരഞ്ഞെടുപ്പിലെ തിരിച്ചടിക്കുശേഷം തന്റെ പ്രസിദ്ധമായ ചുവന്ന ‘മാഗ’ തൊപ്പിയുടെ ചിത്രം ‘വീറ്റോ’ എന്ന ഒറ്റവാക്കിനൊപ്പം അദ്ദേഹം സമൂഹമാധ്യമത്തില്‍ പങ്കുവെക്കുകയും ചെയ്തു.
ഡെമോക്രാറ്റിക് സ്ഥാനാര്‍ഥിയും മുന്‍ അധ്യാപകനുമായ ജെയിംസ് ടലാരിക്കോ ടെക്‌സസിലെ സെനറ്റ് തിരഞ്ഞെടുപ്പില്‍ വിജയിച്ചു. ‘സ്‌നേഹത്തിന്റെ രാഷ്ട്രീയം’ എന്ന ആശയം ഉയര്‍ത്തിപ്പിടിച്ചായിരുന്നു അദ്ദേഹത്തിന്റെ പ്രചാരണം. പ്രസിഡന്റ് ട്രംപിന്റെ അടുത്ത അനുയായിയും ടെക്‌സസ് അറ്റോര്‍ണി ജനറലുമായ കെന്‍ പാക്സ്റ്റണെയാണ് അദ്ദേഹം പരാജയപ്പെടുത്തിയത്. 1994നുശേഷം ടെക്‌സസില്‍ സംസ്ഥാനതല പദവിയിലേക്കുള്ള തിരഞ്ഞെടുപ്പില്‍ വിജയിക്കുന്ന ആദ്യ ഡെമോക്രാറ്റായി ടലാരിക്കോ മാറി. പാക്സ്റ്റണിന് പിന്തുണ പ്രഖ്യാപിച്ച് പ്രചാരണരംഗത്തിറങ്ങിയ ട്രംപിനും ഈ ഫലം തിരിച്ചടിയായി.
28 വര്‍ഷത്തിലേറെയായി റിപ്പബ്ലിക്കന്‍ പാര്‍ട്ടിയുടെ നിയന്ത്രണത്തിലുണ്ടായിരുന്ന സൗത്ത് കരോലിന സെനറ്റ് സീറ്റില്‍ ഡെമോക്രാറ്റിക് സ്ഥാനാര്‍ഥി ആനി ആന്‍ഡ്രൂസ് വിജയിച്ചു. ശിശുരോഗ വിദഗ്ധയായ ആന്‍ഡ്രൂസ്, അന്തരിച്ച സഹോദരന്‍ ലിന്‍ഡ്‌സി ഗ്രഹാമിന്റെ രാഷ്ട്രീയ പാരമ്പര്യം പിന്തുടരാന്‍ ശ്രമിച്ച റിപ്പബ്ലിക്കന്‍ സ്ഥാനാര്‍ഥി ഡാര്‍ലിന്‍ ഗ്രഹാമിനെയാണ് പരാജയപ്പെടുത്തിയത്. 1998നുശേഷം ഈ യാഥാസ്ഥിതിക തെക്കന്‍ സംസ്ഥാനത്ത് ഡെമോക്രാറ്റുകള്‍ക്ക് സെനറ്റ് തിരഞ്ഞെടുപ്പില്‍ വിജയിക്കാനായിരുന്നില്ല.
നോര്‍ത്ത് കരോലിനയില്‍ ട്രംപ് പിന്തുണച്ച മൈക്കല്‍ വാട്ട്ലിയെ പരാജയപ്പെടുത്തി ഡെമോക്രാറ്റ് റോയ് കൂപ്പര്‍ സെനറ്റ് സീറ്റ് സ്വന്തമാക്കി. 2008നുശേഷം സംസ്ഥാനത്ത് സെനറ്റിലേക്ക് തിരഞ്ഞെടുക്കപ്പെടുന്ന ആദ്യ ഡെമോക്രാറ്റാണ് കൂപ്പര്‍. കന്‍സാസില്‍ മെത്തഡിസ്റ്റ് സഭയിലെ പ്രമുഖ പാസ്റ്ററായ ആദം ഹാമില്‍ട്ടണ്‍ റിപ്പബ്ലിക്കന്‍ സെനറ്റര്‍ റോജര്‍ മാര്‍ഷലിനെ പരാജയപ്പെടുത്തി. ഇതോടെ സെനറ്റ് തിരഞ്ഞെടുപ്പുകളില്‍ കന്‍സാസില്‍ ഡെമോക്രാറ്റുകള്‍ നേരിട്ട 94 വര്‍ഷത്തെ തോല്‍വിക്കാലത്തിന് വിരാമമായി. ഒഹായോയില്‍ മുന്‍ സെനറ്റര്‍ ഷെറോഡ് ബ്രൗണ്‍ നിലവിലെ റിപ്പബ്ലിക്കന്‍ സെനറ്റര്‍ ജോണ്‍ ഹസ്റ്റഡിനെ പരാജയപ്പെടുത്തി.
ഈ വിജയങ്ങളോടെ റിപ്പബ്ലിക്കന്‍ പാര്‍ട്ടിക്ക് നിര്‍ണായകമായിരുന്ന നിരവധി സീറ്റുകള്‍ ഡെമോക്രാറ്റുകള്‍ സ്വന്തമാക്കി. ആ സീറ്റുകള്‍ ഒരിക്കല്‍പ്പോലും നഷ്ടപ്പെടില്ലെന്ന റിപ്പബ്ലിക്കന്‍സിന്റെ ആത്മവിശ്വാസമാണ് കടപുഴകി വീണത്.
From South Carolina to Texas: Republicans suffer unexpected setbacks in five seats during the US midterm elections.
