വാഷിംഗ്ടൺ: ജൂത സംഘടനകൾക്കും മിഷിഗൺ സർവകലാശാലാ അധികൃതർക്കും ഇസ്രയേലുമായി ബന്ധമുണ്ടെന്ന് കരുതപ്പെടുന്ന സ്ഥാപനങ്ങൾക്കും നേരെ ഭീഷണികളും ആക്രമണങ്ങളും നടത്തിയെന്ന കേസിൽ ഇന്ത്യൻ വംശജയായ യുവതിയടക്കം നാല് പേർക്കെതിരെ കൂടി യുഎസിൽ ഫെഡറൽ കുറ്റപത്രം. 23കാരിയായ സൃഷ്ടി തരണ ശർമ്മ ഉൾപ്പെടെയുള്ളവർക്കെതിരെയാണ് പുതിയ കുറ്റങ്ങൾ ചുമത്തിയിരിക്കുന്നത്. ഇതോടെ കേസിൽ പ്രതിചേർക്കപ്പെട്ടവരുടെ എണ്ണം 12 ആയി ഉയർന്നു.
ഹെൻറി ഡേവിഡ് മക്കെൻ-ഷാപിറോ (23), ആരോൺ ഹണ്ടർ വോൺബാർഗൻ (25), ജോസഫ് മാർക്ക് ഫിഷർ (23) എന്നിവരാണ് പുതിയ കുറ്റപത്രത്തിൽ ഉൾപ്പെട്ട മറ്റ് മൂന്ന് പേർ. ഇവരിൽ രണ്ടുപേരെ കഴിഞ്ഞ ആഴ്ച അറസ്റ്റ് ചെയ്തതായും സൃഷ്ടി ശർമ്മ ഉൾപ്പെടെയുള്ള മറ്റ് രണ്ട് പേർക്കായി അന്വേഷണം തുടരുകയാണെന്നും യുഎസ് അറ്റോർണി ഓഫീസ് അറിയിച്ചു.
ഡിട്രോയിറ്റിലെ ജൂത ഫെഡറേഷൻ, മിഷിഗൺ സർവകലാശാലാ നേതൃത്വം, നിയമപാലകർ, ഇസ്രയേലുമായി ബന്ധമുള്ള ബിസിനസ് സ്ഥാപനങ്ങൾ എന്നിവരെ ഭീഷണിപ്പെടുത്താനും സമ്മർദത്തിലാക്കാനും പ്രതികൾ ഗൂഢാലോചന നടത്തിയെന്നാണ് ഫെഡറൽ അന്വേഷണ സംഘത്തിന്റെ ആരോപണം. 2023 ഒക്ടോബർ ഏഴിലെ ഹമാസ് ആക്രമണത്തിന് പിന്നാലെ സർവകലാശാലകളും സ്വകാര്യ സ്ഥാപനങ്ങളും ഇസ്രയേലുമായുള്ള ബന്ധം വിച്ഛേദിക്കണമെന്ന് ആവശ്യപ്പെട്ട് സമ്മർദം ചെലുത്തുകയായിരുന്നു പ്രതികളുടെ ലക്ഷ്യമെന്നും കുറ്റപത്രത്തിൽ പറയുന്നു.
ആവശ്യങ്ങൾ അംഗീകരിച്ചില്ലെങ്കിൽ കൂടുതൽ ആക്രമണങ്ങളും ഭീഷണികളും നേരിടേണ്ടിവരുമെന്ന് സംഘം മുന്നറിയിപ്പ് നൽകിയതായും അന്വേഷണ സംഘം ആരോപിക്കുന്നു. എൻക്രിപ്റ്റ് ചെയ്ത സന്ദേശമയയ്ക്കൽ ആപ്പുകളും സാമൂഹിക മാധ്യമങ്ങളും ഉപയോഗിച്ചാണ് ലക്ഷ്യങ്ങൾ കണ്ടെത്തിയതും ആക്രമണ പദ്ധതികൾ ഏകോപിപ്പിച്ചതും.
വീടുകളുടെ പുറംഭിത്തികളിൽ ചുവന്ന പെയിന്റ് ഉപയോഗിച്ച് ഭീഷണിസന്ദേശങ്ങൾ എഴുതുക, ജനലുകൾ തകർക്കുക, രാസവസ്തുക്കൾ അടങ്ങിയ ഗ്ലാസ് ജാറുകൾ വീടുകളിലേക്ക് എറിയുക തുടങ്ങിയ അതിക്രമങ്ങൾ നടത്തിയെന്നാണ് കുറ്റപത്രത്തിലെ ആരോപണം. ഇത്തരം സംഭവങ്ങളുടെ ചിത്രങ്ങൾ സാമൂഹിക മാധ്യമങ്ങളിൽ പങ്കുവെച്ച് ഇസ്രയേലിനെ പിന്തുണയ്ക്കുന്ന മറ്റ് ആളുകൾക്കും സ്ഥാപനങ്ങൾക്കും മുന്നറിയിപ്പ് നൽകാനും ശ്രമിച്ചതായാണ് അന്വേഷണ സംഘത്തിന്റെ കണ്ടെത്തൽ.
മിഷിഗൺ സർവകലാശാലാ ഉദ്യോഗസ്ഥർ, ഒരു പോലീസ് ലഫ്റ്റനന്റ്, ഒരു വിദ്യാർത്ഥി, ഇസ്രയേലുമായി ബന്ധമുള്ള രണ്ട് ബിസിനസ് സ്ഥാപനങ്ങൾ എന്നിവരാണ് പ്രധാനമായും ലക്ഷ്യമാക്കപ്പെട്ടതെന്ന് അധികൃതർ വ്യക്തമാക്കി.
ജൂത സമൂഹത്തിനും പൊതുപ്രവർത്തകർക്കും നേരെയുള്ള ഇത്തരം ഭീഷണികൾ അംഗീകരിക്കാനാവില്ലെന്ന് യുഎസ് അറ്റോർണി ജെറോം എഫ്. ഗോർഗൻ ജൂനിയർ പറഞ്ഞു. സമൂഹത്തിൽ ഭീതി പരത്താൻ ശ്രമിക്കുന്നവർക്ക് നിയമനടപടികളിൽനിന്ന് രക്ഷപ്പെടാനാകില്ലെന്ന് എഫ്ബിഐ ഡെട്രോയിറ്റ് സ്പെഷ്യൽ ഏജന്റ് ജെന്നിഫർ റുന്യാനും മുന്നറിയിപ്പ് നൽകി.
