അമേരിക്കൻ ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിക്കും പ്രസിഡന്റ് ഡോണൾഡ് ട്രംപിനുമുണ്ടായ കനത്ത തിരിച്ചടി ആഘോഷമാക്കി ഇറാൻ. തിരഞ്ഞെടുപ്പ് ഫലങ്ങൾ പുറത്തുവന്നതിന് പിന്നാലെ ട്രംപിനെ പരിഹസിച്ച് ഇറാൻ രംഗത്തെത്തി. അന്താരാഷ്ട്ര തലത്തിൽ ട്രംപിന്റെ നയങ്ങൾക്കെതിരെ കടുത്ത വിമർശനങ്ങൾ നിലനിൽക്കെ, ഇറാന്റെ ഔദ്യോഗിക കേന്ദ്രങ്ങളും ഭരണാധികാരികളും ഈ രാഷ്ട്രീയ പരാജയത്തെ വലിയ വിജയമായാണ് നോക്കിക്കാണുന്നത്.
ഇന്ത്യയിലെ ഇറാൻ എംബസി സമൂഹമാധ്യമമായ എക്സിൽ പങ്കുവെച്ച ഒരു ആക്ഷേപഹാസ്യ മീം ഇതിനോടകം വലിയ രീതിയിൽ വൈറലായിക്കഴിഞ്ഞു. ‘അപകടകരമായ മാലിന്യം’ (Hazardous Waste) എന്ന് എഴുതിയ ചവറ്റുകുട്ടയിലേക്ക് ചിലർ ചേർന്ന് ട്രംപിനെ എറിഞ്ഞു കളയുന്ന തരത്തിലുള്ള ചിത്രമാണ് എംബസി പങ്കുവെച്ചത്. ‘യു.എസ്. ഇടക്കാല തിരഞ്ഞെടുപ്പ്’ എന്ന അടിക്കുറിപ്പോടെ പങ്കുവെച്ച ഈ പോസ്റ്റ് ട്രംപിനെതിരെയുള്ള തുറന്ന പരിഹാസമായിട്ടാണ് ലോകം വിലയിരുത്തുന്നത്.
അമേരിക്കൻ ജനത യുദ്ധത്തെയും തെറ്റായ നയങ്ങളെയും തള്ളിക്കളഞ്ഞുവെന്നാണ് തിരഞ്ഞെടുപ്പ് ഫലങ്ങളെക്കുറിച്ച് ഇറാൻ പ്രതികരിച്ചത്. അമേരിക്കക്കാർ യുദ്ധം വേണ്ടെന്ന് വിധിയെഴുതിയെന്നും ആ ജനവിധിയെ തങ്ങൾ പൂർണ്ണമായി പിന്തുണയ്ക്കുന്നുവെന്നും ഇറാൻ പാർലമെന്റ് സ്പീക്കർ മുഹമ്മദ് ബഖർ ഗാലിബാഫ് വ്യക്തമാക്കി. പണപ്പെരുപ്പവും ഇറാനുമായുള്ള സംഘർഷങ്ങളും കാരണം വലഞ്ഞ അമേരിക്കൻ ജനത ട്രംപിന്റെ ഭരണകൂടത്തിന് നൽകിയ ശക്തമായ പ്രഹരമാണ് ഈ തിരഞ്ഞെടുപ്പ് ഫലമെന്നും സമൂഹമാധ്യമങ്ങളിൽ അടക്കം ചർച്ചകൾ സജീവമാണ്.
