എ.എസ് ശ്രീകുമാര്
ഹൂസ്റ്റണ്: ജനിച്ചുവളര്ന്ന നാടിന്റെ മണ്ണിനോടും മനുഷ്യരോടുമുള്ള ആത്മബന്ധം ഹൃദയസ്പര്ശിയായ സംഗീതാനുഭവമാക്കി മാറ്റുകയാണ് ‘പാലക്കട് എന് ആത്മാവിന് നാട്’ എന്ന ഓഡിയോ ആല്ബം. പാലക്കാടിന്റെ പ്രകൃതിഭംഗിയും ഗ്രാമീണ ജീവിതത്തിന്റെ നന്മകളും ഗൃഹാതുരമായ ഓര്മ്മകളും ഇഴചേര്ത്ത ഈ ഗാനത്തിന്റെ ഓഡിയോ ആല്ബം ഹൂസ്റ്റണില് പ്രകാശനം ചെയ്തു. മോട്ടി മാത്യുവിന്റെ രചനയ്ക്ക് ബിജു മോഹന് സംഗീതം പകര്ന്ന് പ്രശസ്ത സംഗീതജ്ഞനും ഗായകനുമായ ഫാ. ഡോ. പോള് പൂവത്തിങ്കല് ആലാപനം നിര്വഹിച്ച ഗാനം ഇതിനോടകം ശ്രദ്ധ നേടിക്കഴിഞ്ഞു.
ഹൂസ്റ്റണ് ക്നാനായ കാത്തലിക് സൊസൈറ്റിയുടെ ആഭിമുഖ്യത്തില് സംഘടിപ്പിച്ച വെറ്ററന്സ് ഡേ ആഘോഷവേദിയിലായിരുന്നു ഓഡിയോ റിലീസ്. പാലക്കാടിന്റെ പ്രകൃതിയും സംസ്കാരവും ജീവിതരീതികളും ഓര്മകളിലൂടെ പുനരാവിഷ്കരിക്കുന്ന ഗാനങ്ങള്, പ്രവാസലോകത്ത് കഴിയുന്ന മലയാളികള്ക്ക് സ്വന്തം നാടിന്റെ ഹൃദയത്തുടിപ്പ് അനുഭവിക്കാനുള്ള അവസരമായി മാറി. നേര്കാഴ്ച ചീഫ് എഡിറ്ററും മാധ്യമപ്രവര്ത്തകനുമായ സൈമണ് വളാച്ചേരിലാണ് ഗാനത്തിന്റെ എക്സിക്യൂട്ടീവ് പ്രൊഡ്യൂസര്.
ഈ ആല്ബത്തിന്റെ ഏറ്റവും വലിയ പ്രത്യേകത അതിന്റെ വിഷയത്തിലും അവതരണത്തിലുമാണ്. ഒരു നാടിന്റെ ഭൂപ്രകൃതിയെ മാത്രം പാടിപ്പുകഴ്ത്തുകയല്ല ചെയ്യുന്നത്. മറിച്ച്, ആ നാടിനോടുള്ള മനുഷ്യന്റെ വൈകാരികമായ അടുപ്പവും വേരുകളിലേക്കുള്ള തിരിച്ചുപോക്കും അടയാളപ്പെടുത്തുന്നു. പച്ചപ്പാര്ന്ന വയലുകള്, തെങ്ങിന്തോപ്പുകള്, ഗ്രാമീണ വഴികള്, നാടന് ജീവിതത്തിന്റെ നിഷ്കളങ്കത, ജന്മനാടിന്റെ സ്നേഹസ്പര്ശം എന്നിവയെല്ലാം ശ്രോതാവിന്റെ മനസ്സില് തെളിയിക്കുന്ന തരത്തിലാണ് ഗാനത്തിന്റെ ഭാവലോകം.
മോട്ടി മാത്യുവിന്റെ ലളിതവും ഹൃദ്യവുമായ വരികള് ഗാനത്തിന് പ്രത്യേകമായൊരു ഗൃഹാതുരത്വം നല്കുന്നു. ബിജു മോഹന്റെ സംഗീത സംവിധാനം വരികളുടെ വൈകാരികതയ്ക്ക് അനുയോജ്യമായ മാധുര്യവും ഒഴുക്കും പകരുന്നു. അമിതമായ സംഗീതാഭാസങ്ങളേക്കാള് വരികളുടെ ആത്മാവിനും ഈണത്തിന്റെ സൗന്ദര്യത്തിനും പ്രാധാന്യം നല്കുന്ന അവതരണമാണ് മോഹന രാഗത്തില് ചിട്ടപ്പെടുത്തിയ ആല്ബത്തെ വേറിട്ടുനിര്ത്തുന്നത്.
ആല്ബത്തിന്റെ മറ്റൊരു പ്രധാന ആകര്ഷണം ഫാ. ഡോ. പോള് പൂവത്തിങ്കലിന്റെ ആലാപനമാണ്. കര്ണാടക സംഗീതത്തിലും ശാസ്ത്രീയ സംഗീതാവതരണത്തിലും വ്യക്തിമുദ്ര പതിപ്പിച്ചിട്ടുള്ള അദ്ദേഹത്തിന്റെ ശബ്ദമാധുരിയും ഭാവസാന്ദ്രതയും ഗാനത്തിന് കൂടുതല് ആഴം നല്കുന്നു. വരികളിലെ ഗൃഹാതുരത്വവും നാടിനോടുള്ള സ്നേഹവും ശ്രോതാവിന്റെ ഹൃദയത്തിലേക്ക് നേരിട്ടെത്തിക്കുന്നതാണ് ആലാപനത്തിന്റെ പ്രത്യേകത.
പ്രവാസജീവിതത്തിന്റെ തിരക്കുകള്ക്കിടയിലും ജന്മനാടിന്റെ ഓര്മകളെ ഹൃദയത്തില് ചേര്ത്തുപിടിക്കുന്ന മലയാളികള്ക്ക് ഈ ആല്ബം ഒരു പ്രത്യേക അനുഭവമാണ്. വര്ഷങ്ങള്ക്കിപ്പുറം സ്വന്തം ഗ്രാമവും വീടും വയലുകളും നാട്ടുവഴികളും ഓര്ത്തെടുക്കുമ്പോള് മനസ്സില് നിറയുന്ന വികാരങ്ങളെ സംഗീതത്തിലൂടെ വീണ്ടെടുക്കാന് ഈ ആല്ബത്തിന് കഴിയുന്നു. അതുകൊണ്ടുതന്നെ ഇത് പാലക്കാടിനെക്കുറിച്ചുള്ള ഒരു ഗാനമെന്നതിലുപരി സ്വന്തം വേരുകളെക്കുറിച്ചുള്ള ഓരോ പ്രവാസിയുടെയും ഓര്മകളെ തൊട്ടുണര്ത്തുന്ന സംഗീതസൃഷ്ടിയായി മാറുന്നു.
The Audio Album ‘Palakkad, My Homeland’ Sung by Fr. Paul Poovathinkal Gains Widespread Attention
















