വാഷിംഗടണ്‍: യുഎസിലെ ഇടക്കാല തിരഞ്ഞെടുപ്പില്‍ ഏഴ് സംസ്ഥാനങ്ങളില്‍ കൂടി വോട്ടെടുപ്പ് അവസാനിച്ചു. യുഎസ് സമയം സമയം വൈകുന്നേരം ഏഴോടെ ഫ്‌ലോറിഡ, ജോര്‍ജിയ, സൗത്ത് കരോലിന, വിര്‍ജീനിയ, വെര്‍മോണ്ട്, കെന്റക്കി, ഇന്‍ഡ്യാനയിലെ ചില മേഖലകള്‍ എന്നിവിടങ്ങളിലെ പോളംഗ് പൂര്‍ത്തിയായി . കോണ്‍ഗ്രസിന്റെ നിയന്ത്രണം നിര്‍ണയിക്കുന്ന നിര്‍ണായക തിരഞ്ഞെടുപ്പിന്റെ വോട്ടെണ്ണല്‍ നടപടികളിലേക്ക് രാജ്യം കടക്കുകയാണ്. ജനപ്രതിനിധിസഭയിലെയും സെനറ്റിലെയും ഭൂരിപക്ഷം ഏത് പാര്‍ട്ടിക്ക് ലഭിക്കുമെന്നതാണ് ലോകശ്രദ്ധ നേടുന്ന പ്രധാന ചോദ്യം.
അതേസമയം, ഒഹായോയിലെ സെനറ്റ് തിരഞ്ഞെടുപ്പുമായി ബന്ധപ്പെട്ട എബിസി നടത്തിയ സര്‍വേയിലെ പ്രാഥമിക ഫലങ്ങള്‍ പ്രസിഡന്റ് ഡൊണാള്‍ഡ് ട്രംപിനോടും രാജ്യത്തെ നിലവിലെ സാഹചര്യങ്ങളോടുമുള്ള വോട്ടര്‍മാരുടെ അതൃപ്തി വ്യക്തമാക്കുന്നു. രാജ്യത്ത് കാര്യങ്ങള്‍ മുന്നോട്ടുപോകുന്ന രീതിയില്‍ മൂന്നിലൊന്ന് വോട്ടര്‍മാര്‍ കടുത്ത അമര്‍ഷം പ്രകടിപ്പിച്ചപ്പോള്‍ മറ്റൊരു മൂന്നിലൊന്ന് പേര്‍ അതൃപ്തി രേഖപ്പെടുത്തി. രാജ്യത്തിന്റെ നിലവിലെ രാഷ്ട്രീയ-സാമ്പത്തിക സാഹചര്യങ്ങളിലുള്ള ജനങ്ങളുടെ പ്രതികരണമാണ് സര്‍വേയില്‍ പ്രതിഫലിക്കുന്നത്.
ഒഹായോയിലെ സെനറ്റ് തിരഞ്ഞെടുപ്പില്‍ വോട്ട് ചെയ്തവരില്‍ പത്തില്‍ ഏഴ് പേരും രാജ്യത്തിന്റെ സമ്പദ്വ്യവസ്ഥയെ പ്രതികൂലമായാണ് വിലയിരുത്തിയത്. ഇതില്‍ തന്നെ മൂന്നിലൊന്ന് പേര്‍ സാമ്പത്തിക സ്ഥിതി വളരെ മോശമാണെന്നും അഭിപ്രായപ്പെട്ടു. കഴിഞ്ഞ രണ്ട് വര്‍ഷത്തെ അപേക്ഷിച്ച് തങ്ങളുടെ കുടുംബത്തിന്റെ സാമ്പത്തിക സ്ഥിതി മെച്ചപ്പെടുന്നതിനു പകരം മോശമായെന്ന് പറയുന്നവരുടെ എണ്ണം ഇരട്ടിയിലധികമാണെന്നും പ്രാഥമിക സര്‍വേ വ്യക്തമാക്കുന്നു.
ഇന്ധനം, ഭക്ഷ്യവസ്തുക്കള്‍, പലചരക്ക് സാധനങ്ങള്‍, വൈദ്യുതി ഉള്‍പ്പെടെയുള്ള യൂട്ടിലിറ്റി ചെലവുകള്‍, ആരോഗ്യപരിരക്ഷ എന്നിവയുടെ വിലവര്‍ധനയിലും വോട്ടര്‍മാര്‍ ആശങ്ക പ്രകടിപ്പിച്ചു. ഒഹായോയിലെ സെനറ്റ് തിരഞ്ഞെടുപ്പില്‍ പങ്കെടുത്ത പത്തില്‍ ആറ് പേരും ഈ ചെലവുകളെക്കുറിച്ച് കടുത്ത ആശങ്കയുള്ളവരാണെന്നാണ് സര്‍വേയിലെ കണ്ടെത്തല്‍. ജീവിതച്ചെലവിലെ വര്‍ധന സാധാരണ കുടുംബങ്ങളുടെ സാമ്പത്തിക സ്ഥിതിയെ എത്രത്തോളം ബാധിച്ചുവെന്നതും ഇതിലൂടെ വ്യക്തമാകുന്നു.
അമേരിക്കന്‍ കോണ്‍ഗ്രസിന്റെ നിയന്ത്രണം നിര്‍ണയിക്കുന്ന തിരഞ്ഞെടുപ്പില്‍ സാമ്പത്തിക സ്ഥിതിയും ജീവിതച്ചെലവും നിര്‍ണായക ചര്‍ച്ചാവിഷയങ്ങളായി മാറിയിരിക്കുകയാണ്. ഒഹായോയിലെ പ്രാഥമിക വോട്ടര്‍ സര്‍വേ ഫലങ്ങള്‍ രാജ്യത്തെ സാമ്പത്തിക സാഹചര്യങ്ങളോടുള്ള വോട്ടര്‍മാരുടെ പ്രതികരണത്തിന്റെ സൂചന നല്‍കുന്നു.
Voting has concluded in seven more states, including Florida.
