‘ജാനകി’ വിവാദം തുടരുന്നു: പേര് മാറ്റാതെ സെൻസർ സർട്ടിഫിക്കറ്റ് നൽകില്ലെന്ന് സെൻസർ ബോർഡ് ഹൈക്കോടതിയിൽ

കൊച്ചി: സുരേഷ് ഗോപി നായകനായ ‘ജാനകി V/S സ്റ്റേറ്റ് ഓഫ് കേരള’ (ജെഎസ്‌കെ) എന്ന ചിത്രത്തിൻ്റെ പേര് സിനിമയുടെ ടൈറ്റിലിൽ നിന്നും സംഭാഷണങ്ങളിൽ നിന്നും ‘ജാനകി’ മാറ്റാതെ യു/എ സർട്ടിഫിക്കറ്റ് നൽകില്ലെന്ന് സെൻസർ ബോർഡ് ഹൈക്കോടതിയിൽ വ്യക്തമാക്കിയതോടെ വിവാദം പുതിയ തലങ്ങളിലേക്ക്. ഇന്ന് ഹൈക്കോടതിയിലാണ് സെൻസർ ബോർഡ് തങ്ങളുടെ നിലപാട് അറിയിച്ചത്.

ജാനകി എന്ന പേര് മതപരവും ജാതീയവും വംശീയവുമായ കാര്യങ്ങളുമായി ബന്ധപ്പെട്ടതാണെന്നും, സിനിമയിലാകട്ടെ പ്രായപൂർത്തിയായവർ മാത്രം കാണേണ്ട രംഗങ്ങളും അനുബന്ധ സംഭാഷണങ്ങളുമുണ്ടെന്നും സെൻസർ ബോർഡ് ചൂണ്ടിക്കാട്ടി. ഈ സാഹചര്യത്തിൽ, ആവശ്യമായ മാറ്റങ്ങൾ വരുത്തിയാലേ സെൻസർ സർട്ടിഫിക്കറ്റ് നൽകൂ എന്ന് ചൂണ്ടിക്കാട്ടി നിർമ്മാതാക്കൾക്ക് ഷോകോസ് നോട്ടീസ് നൽകിയിട്ടുണ്ടെന്നും സെൻസർ ബോർഡ് കോടതിയെ അറിയിച്ചു.

സുരേഷ് ഗോപി നായകനായ ചിത്രം ഇന്ന് റിലീസ് ചെയ്യാനിരിക്കെയാണ് ഈ വിവാദം തലപൊക്കിയത്. സെൻസർ ബോർഡിന്റെ നടപടിക്കെതിരെ സിനിമാ സംഘടനകൾ തിങ്കളാഴ്ച മാർച്ച് നടത്താനും തീരുമാനിച്ചിട്ടുണ്ട്.

ഹൈക്കോടതിയുടെ ചോദ്യങ്ങൾ: സെൻസർ ബോർഡിന്റെ നടപടിക്ക് ഹൈക്കോടതിയിൽ നിന്ന് ചോദ്യങ്ങളുയർന്നു. എന്തു സാഹചര്യത്തിലാണ് ഇത്തരം നിയമങ്ങൾ ഈ സിനിമയ്ക്ക് ബാധകമാകുന്നതെന്ന് കോടതി ആരാഞ്ഞു. “സീത, ഗീത എന്നൊക്കെ ഇവിടെ സിനിമകളുണ്ടായിട്ടുണ്ട്. ജാനകിയുടെ അർത്ഥവും സീത എന്നാണ്. ‘റാം ലഖൻ’ എന്ന പേരിൽ ഇവിടെ സിനിമയുണ്ടായിട്ടുണ്ട്. എന്നാൽ അന്നൊന്നും ഒരു പരാതിയും ഉയർന്നിട്ടില്ല,” ജസ്റ്റിസ് എൻ. നഗരേഷ് നിരീക്ഷിച്ചു.

മതപരമായ വിഷയമാണെന്ന് സെൻസർ ബോർഡ് ആവർത്തിച്ചപ്പോൾ, “ജാനകി എന്ന പേര് മാറ്റി വേറെ ആരുടെയെങ്കിലും പേര് വച്ചാൽ പ്രശ്നമില്ല എന്നാണോ ഉദ്ദേശിക്കുന്നത്?” എന്നും ജസ്റ്റിസ് നഗരേഷ് ചോദിച്ചു. എന്തിനാണ് ഷോകോസ് നോട്ടീസ് അയയ്ക്കുന്നതെന്നും കോടതി ചോദ്യമുയർത്തി.

നിർമ്മാതാക്കളുടെ വാദം: ഷോകോസ് നോട്ടീസ് അയച്ചതിൻ്റെ സാംഗത്യം സിനിമ നിർമ്മാതാക്കളുടെ അഭിഭാഷകനും രാജ്യസഭാ എംപിയുമായ അഡ്വ. ഹാരിസ് ബീറാനും ചോദ്യം ചെയ്തു. സിനിമയ്ക്ക് സർട്ടിഫിക്കറ്റ് നൽകാത്തതിൻ്റെ കാരണം സെൻസർ ബോർഡ് ഇതുവരെ അറിയിച്ചിട്ടില്ലെന്നും അദ്ദേഹം വ്യക്തമാക്കി.

ഷോകോസ് നോട്ടീസ് അയയ്ക്കാൻ സെൻസർ ബോർഡിന്റെ റിവ്യൂ കമ്മിറ്റിക്ക് അധികാരമില്ലെന്നും നിർമ്മാതാക്കൾ വാദിച്ചു. ഈ സാഹചര്യത്തിൽ നോട്ടീസിന് മറുപടി നൽകാനോ അല്ലെങ്കിൽ കോടതിയിൽ ചോദ്യം ചെയ്യാനോ ഹർജിക്കാർക്ക് മാർഗങ്ങളുണ്ടെന്ന് കോടതി ചൂണ്ടിക്കാട്ടി. തുടർന്ന്, ഹർജി തിങ്കളാഴ്ച പരിഗണിക്കാനായി മാറ്റി. ടീസറിനും ട്രെയിലറിനും അനുമതി നൽകിയ അതേ സെൻസർ ബോർഡാണ് സിനിമയ്ക്ക് അനുമതി നിഷേധിച്ചതെന്ന ഹർജിക്കാരുടെ വാദം കോടതി അംഗീകരിച്ചില്ല.

സിനിമാ ലോകത്തിന്റെ പ്രതിഷേധം: നേരത്തെ, സിനിമ സംബന്ധിച്ച് കോടതിയുടെ അഭിപ്രായത്തിനു കാത്തിരിക്കുകയാണെന്ന് ഫെഫ്ക ജനറൽ സെക്രട്ടറി ബി. ഉണ്ണികൃഷ്ണൻ വ്യക്തമാക്കിയിരുന്നു.

തിങ്കളാഴ്ച തിരുവനന്തപുരത്ത് വിവിധ സിനിമാ സംഘടനകൾക്കൊപ്പം ഫെഫ്കയും പ്രതിഷേധിക്കുമെന്ന് ഉണ്ണികൃഷ്ണൻ അറിയിച്ചു. ഫെഫ്ക, അമ്മ, നിർമ്മാതാക്കളുടെ സംഘടന, സീരിയൽ താരങ്ങളുടെ സംഘടനയായ ആത്മ ഉൾപ്പെടെ സിനിമാ മേഖലയിലെ എല്ലാ സംഘടനകളും പ്രതിഷേധത്തിൽ അണിചേരുമെന്ന് പ്രതീക്ഷിക്കുന്നു.

സെൻസർ ബോർഡ് ഉൾപ്പെടെ സ്വയം എഴുതിച്ചേർത്ത മാർഗ്ഗനിർദ്ദേശങ്ങൾ അനുസരിച്ചാണ് പ്രവർത്തിക്കുന്നതെന്നും ഇത് സിനിമയുടെ മാത്രം പ്രശ്നമല്ലെന്നും രഞ്ജി പണിക്കർ അഭിപ്രായപ്പെട്ടു. സെൻസർ ബോർഡിന്റെ നടപടി സംബന്ധിച്ച് കേരളത്തിലെ എല്ലാ രാഷ്ട്രീയ പാർട്ടികളുമായും സംസാരിച്ചെന്നും ഇത് ചോദ്യം ചെയ്യപ്പെടേണ്ടതാണെന്ന് എല്ലാവരും അറിയിച്ചെന്നും ഫെഫ്ക ഭാരവാഹികൾ കൂട്ടിച്ചേർത്തു.

‘Janaki’ controversy continues: Censor Board tells High Court that it will not issue censor certificate without changing the name