വാഷിംഗ്ടൺ: ഇറാനുമായുള്ള സമാധാന ചർച്ചകൾ വഴിമുട്ടി നിൽക്കുന്ന പശ്ചാത്തലത്തിൽ, മിഡിൽ ഈസ്റ്റിലുടനീളം അമേരിക്കൻ സൈന്യം അതീവ ജാഗ്രതയോടെ സജ്ജമായി തുടരുകയാണെന്ന് യുഎസ് സെൻട്രൽ കമാൻഡ് അറിയിച്ചു. പാകിസ്ഥാനിൽ നടക്കേണ്ടിയിരുന്ന നിർണ്ണായക ചർച്ചകൾ പ്രസിഡന്റ് ഡോണൾഡ് ട്രംപ് റദ്ദാക്കിയതിന് പിന്നാലെയാണ് സൈനിക നേതൃത്വത്തിന്റെ ഈ പ്രസ്താവന പുറത്തുവന്നത്. ഏപ്രിൽ 13-ന് ആരംഭിച്ച നാവിക ഉപരോധം കർശനമായി തുടരുന്നതായും ഇറാനിയൻ തുറമുഖങ്ങളിലേക്കും അവിടെ നിന്നുമുള്ള കപ്പൽ നീക്കങ്ങൾ നിരീക്ഷിച്ചു വരികയാണെന്നും സെൻട്രം വ്യക്തമാക്കി.
ഇറാനുമായുള്ള ചർച്ചകളുടെ കാര്യത്തിൽ തങ്ങൾക്കല്ല, മറിച്ച് ഇറാനാണ് കൂടുതൽ തിടുക്കം വേണ്ടതെന്ന സൂചനയാണ് ട്രംപ് നൽകുന്നത്. “അവർക്ക് ചർച്ച ചെയ്യാൻ താൽപ്പര്യമുണ്ടെങ്കിൽ ഞങ്ങളെ വിളിക്കാം” എന്ന് ഞായറാഴ്ച ട്രംപ് മാധ്യമങ്ങളോട് പറഞ്ഞു. ദീർഘദൂര വിമാന യാത്രകൾ നടത്തി പ്രതിനിധികളെ അയച്ച് സമയം കളയാൻ ഇനി ഉദ്ദേശിക്കുന്നില്ലെന്നും, ചർച്ചകൾക്ക് ഇറാൻ മുൻകൈ എടുക്കട്ടെ എന്നുമാണ് അദ്ദേഹത്തിന്റെ നിലപാട്.
അതേസമയം, ഇറാൻ തൃപ്തികരമായ നിർദ്ദേശങ്ങൾ മുന്നോട്ട് വെക്കാത്തതാണ് സമാധാന ശ്രമങ്ങൾ തടസ്സപ്പെടാൻ കാരണമെന്ന് വൈറ്റ് ഹൗസ് വൃത്തങ്ങൾ ആരോപിക്കുന്നു. വെടിനിർത്തൽ നിലവിലുണ്ടെങ്കിലും ഏത് നിമിഷവും സൈനിക നീക്കങ്ങൾ പുനരാരംഭിക്കാൻ തയ്യാറാണെന്ന മുന്നറിയിപ്പും അമേരിക്ക നൽകുന്നുണ്ട്. ഇറാന്റെ ആണവ പദ്ധതികൾ പൂർണ്ണമായും ഉപേക്ഷിക്കണമെന്ന നിലപാടിൽ അമേരിക്ക ഉറച്ചുനിൽക്കുമ്പോൾ, അത് തങ്ങളുടെ പരമാധികാരത്തിന്റെ പ്രശ്നമാണെന്ന് ഇറാൻ ആവർത്തിക്കുന്നു. മേഖലയിലെ അനിശ്ചിതത്വം തുടരുന്നത് അന്താരാഷ്ട്ര തലത്തിൽ വലിയ ആശങ്കകൾക്ക് കാരണമായിട്ടുണ്ട്.
